111
Yawe aŋkɨsino
1 Yawe dakon man aŋkɨsino!
Mɨŋat amɨn kabɨnikon nak but dasi nandaŋek ya yaŋ iyɨkeŋ.
2 Yawe uŋun pini wagɨl tagɨsi asak.
Amɨn morap Piŋkop dakon pi do galak toŋ pini uŋun do nandaŋ ekwaŋ.
3 Yo morap asak uŋun da tɨlɨmni aŋalon aban wagɨl tagɨsisi asak.
Aŋpakni kɨlegɨ uŋun toktogɨsi taŋ aŋaŋ kɨsak.
4 Yawe da mɨŋat amɨnyo dakon nandak nandakni paŋtagap aban yo madep madep agɨt uŋun do sigɨn nandaŋek ekwaŋ.
Yawe bɨsapmɨ bɨsapmɨ nandaŋ yawok nimɨŋek nin do bupmɨ nandɨsak.
5 Iyɨ do pasolgoŋ amɨn jap yomɨsak.
Saŋbek saŋbek agɨt uŋun dɨma ɨŋtosok.
6 Amɨn ŋwakŋwarɨ dakon mɨktɨm mɨŋat amɨni do yomɨŋek tapmɨmni madep aŋalon agɨt.
7 Aŋpakni uŋun bamɨsi ae kɨlegɨsi.
Gen morapni uŋun bamɨsi gɨn, do tagɨ guramɨtneŋ.
8 Gen tebani uŋun bamɨsi ae toktogɨsi taŋ aŋaŋ kɨkdaŋ.
Uŋun butdasi nandaŋek yol kɨmotneŋ do nimgut.
9 Piŋkop da iyɨ dakon mɨŋat amɨn kabɨni yumaŋ nagɨt.
Aŋek uŋun gat saŋbek saŋbek dagok dagogɨ mɨni agɨt.
Piŋkop uŋun mani telagɨ ae masɨ masɨmɨ.
10 Jop 28.28; YT 1.7; 9.10 Amɨn kɨnda nandaŋ kokwini tagɨsi amɨn kɨnda dagok do nandɨsak kaŋ, Yawe do pasal ɨmjak.
Amɨn geni guramɨkgaŋ uŋun nandak nandak tagɨsi yomɨsak.