Link to home pageLanguagesLink to all Bible versions on this site
3
Baptais ok wirubetem tame Jon ere tuma wusoubetem.
(Matyu 3:1-12; Mak 1:2-8; Jon 1:19-28)

1 Sisar Taiberius ere Rom tatame etemri keryen temenem. Nabe nogwape (15 yia) ere apeilake som temenem. Temenem, Pontius Pailat ere Judia distrikri tatame emri apeilake temenem, Herot ere Galili distrikri tatame etemri apeilake temenem. Eri mase ere Filip, ere Ituria distrik Trakonitis distrik etemri apeilake temenem, Lisanias ere Abilene yekwori tatame etemri apeilake temenem. 2 Anasken Kaiafasken epe God eteri ake eisauke yaku kerebetem tame etemri apeilake temenem. Ete yabel Jon, Sekaraia eteri yen, ere tameken berai emik temenem, God ere erne tuma wopete yeirim. 3 Wopete yeirim, Jon ere Jordan peik yekwori kom komke yin tatame emne tuma wusoubetem. Ere etep wobetem. Kem keremri wule yaper mesginte, an kemne baptais ok wirute. Baptais ok wirute, God ere kemri nenbetem wule yaper peten sepitte, ere kemne tuma beke kip namde. Ere etep wobetem. 4 Kiyi temenem tuma wusoubetem tame, Aisaia, ere ete tuma kiyi siglouke bas rasem. Ere etepke bas rasem.

Tame wuri ere tameken berai emik temente, ere tuma noubke etepke tebetem. Kem Keryen eri kelu noub eyarte. Kem eri yate nenbe kelu noub akwun eyarte.
5 Wauna wauna kem sel peren yente. Kelu kwokwore, kem noub borborke kayen eyarte. Me nenken kelu kem me nen kayen petewarte.
6 Etep nente, nemne sene pette tame erne God ere erne won yate. Nema etep late.
Aisaia ere etep kiyi bas rasem, Jon ere yurik yam.

7 Tatame nogwape eme Jon erne yan lam, ere emne ok wiruteke yam. Yam, ere emne etep wom. Kem wale yaperkap, kem porere yaper tatame. Beke kem ane late yawo? Yuri God ere tatame emne pakuk pete, ere kemne kir pete nenbe. 8 Kem yenbo nente. Kem etep nente, nema mette, kem wule yaper mesginye. Kem mane etep wote. Abraham ere neremri warege. Ere tame yenbo, eke nerem kir nema tame yenbo. Kemri etep wobe tuma e tuma seken berai. Kem Abraham eteri nan, kem tame yenbo berai. Eter nenbetemkap, kem etepwou beke nen. Kemri porere yaper kem mesginte, kem tame yenbo tete. God ere abote, ere gwo pape peten tame seikite, sene eme Abraham eteri yen tete. God ere etep kuyese nente. Kem mane etep wote, nema Abraham eteri yen. Etep bepou mane wote. 9 Yuri yate tame ere wor letke sete tamekap. Ere me teite, ere somosomok teite. Nogwape me eme supa yenbo beke ya, ere ete me emne teyin kerke liste nenbe.

10 Ere etep womke, tatame nogwape eme erne etep wometem. Nema be woske nente? 11 Ere awosein emne etep wom. Tame ere tame oub pes temente, wuri ere tame oubken berai tame erne newote. Awos tetan tame ere etepwou nente. Ere awos berai tame emne awos newote. Etep wom. 12 Takis kel petbe tame eme yan baptais ok wirute wom, eme erne etep wom. Tuma wusoube tame, nema be woske nente? 13 Ere emne awosein etep wom. Kem takis kel pette, kem kemri apeilake eter wobekapwou pette. Kem kel tep kera sirke mane pette. Etep wom. 14 Ei nai tame eme erne yan etep wometem. Nerem, nema mapeke tete? Ere emne awosein etep wom. Kem tuma mane yikwokwon tatame etemri kel sirke pette. Kem wos yaper beke nen tatame emne mane tuma bepou me namdete. Kem keremri yaku kerebe kelwouke peten metekwaste. Etep wom.

15 Tame eme Jon eteri tuma metem, eme eterne abon etep wom. Kap Jon ere Krais, God eter won yam tame o? 16 Etep womke, Jon ere emne etep wom. An kemne okke wirute. Yuri tame wuri ere yate, ere tame eisau, ere tame yenbo. An tame nebule. An tame yenbo berai, nesa wolbaye wurisubuk beke kip si. An tame nebule, an selke site. Ete tame ere kemne God Eteri Wou kemne newote. Kemri nenbe wule yaper ere kerke liste. 17 Kopi wus tame eme peten sepitbekap, ete tame ere tatame yaper emne kerke seitte. Ete ker ere som eibe. Tame eme kopi om peten akek rasbekap, ere tatame yenbo emne eteri komke panen yite. 18 Etep wom, Jon ere God eteri tuma yenbo emne wobetem, tuma nogwape ere emne kir wusoubetem.

Herot ere Jon erne ake yaperke won wurim.
19 Yuri Jon ere apeilake Herot erne tuma etepke wom. Ne neri mase eteri ta, Herodias tene burkit peten panem. E yaperwai. Ne akeite wule yaper nogwape kir nenbetem. 20 Etep womke, Herot ere wule yaper wurinabu sene nenem, ere Jon erne ake yaperke won wurim.
Jon ere Jisas erne baptais ok wiruwum.
(Matyu 3:13-17; Mak 1:9-11)

21 Jon ere tatame nogwape emne kiyi baptais ok wiruwum, yuri ere Jisas erne baptais ok wiruwum. Baptais ok wiruwum, Jisas ere God erken tuma namdebetem, eme lam, gwan beram, 22 God Eteri Wou ere nelke ap bourkap yeirim, Jisas eterke yeirin sim. Yeirin sim, tuma wuri nelke etep wom. Ne Ari Yen yenbowai. An nene me metekwasbe. Etepke wom.

Jisas eteri yeiwarege etemri sig.
(Matyu 1:1-17)

23 Kiyi Jisas ere yaku tasem, eteri nabe e nogwape kera (30 yia). Tatame eme erne etep abom.

Ere Josep eteri yen.
Josep ere Hilai eteri yen.
24 Hilai ere Matat eteri yen.
Matat ere Livai eteri yen.
Livai ere Melki eteri yen.
Melki ere Janai eteri yen.
Janai ere Josep eteri yen.
25 Josep ere Matatias eteri yen.
Matatias ere Amos eteri yen.
Amos ere Nahum eteri yen.
Nahum ere Esli eteri yen.
Esli ere Nagai eteri yen.
26 Nagai ere Mat eteri yen.
Mat ere Matatias eteri yen.
Matatias ere Semen eteri yen.
Semen ere Josek eteri yen.
Josek ere Joda eteri yen.
27 Joda ere Joana eteri yen.
Joana ere Resa eteri yen.
Resa ere Serubabel eteri yen.
Serubabel ere Sealtiel eteri yen.
Sealtiel ere Neri eteri yen.
28 Neri ere Melki eteri yen.
Melki ere Adi eteri yen.
Adi ere Kosam eteri yen.
Kosam ere Elmadam eteri yen.
Elmadam ere Er eteri yen.
29 Er ere Josua eteri yen.
Josua ere Eleasar eteri yen.
Eleasar ere Jorim eteri yen.
Jorim ere Matat eteri yen.
Matat ere Livai eteri yen.
30 Livai ere Simeon eteri yen.
Simeon ere Juda eteri yen.
Juda ere Josep eteri yen.
Josep ere Jonam eteri yen.
Jonam ere Eliakim eteri yen.
31 Eliakim ere Melea eteri yen.
Melea ere Matata eteri yen.
Matata ere Natan eteri yen.
Natan ere Devit eteri yen.
32 Devit ere Jesi eteri yen.
Jesi ere Obet eteri yen.
Obet ere Boas eteri yen.
Boas ere Salmon eteri yen.
Salmon ere Nason eteri yen.
33 Nason ere Aminadap eteri yen.
Aminadap ere Atmin eteri yen.
Atmin ere Arni eteri yen.
Arni ere Hesron eteri yen.
Hesron ere Peres eteri yen.
Peres ere Juda eteri yen.
34 Juda ere Jekop eteri yen.
Jekop ere Aisak eteri yen.
Aisak ere Abraham eteri yen.
Abraham ere Tera eteri yen.
Tera ere Nahor eteri yen.
35 Nahor ere Seruk eteri yen.
Seruk ere Reu eteri yen.
Reu ere Pelek eteri yen.
Pelek ere Eber eteri yen.
Eber ere Sela eteri yen.
36 Sela ere Kainan eteri yen.
Kainan ere Arpaksat eteri yen.
Arpaksat ere Siem eteri yen.
Siem ere Noa eteri yen.
Noa ere Lamek eteri yen.
37 Lamek ere Metusela eteri yen.
Metusela ere Enok eteri yen.
Enok ere Jaret eteri yen.
Jaret ere Mahalalel eteri yen.
Mahalalel ere Kenan eteri yen.
38 Kenan ere Enos eteri yen.
Enos ere Set eteri yen.
Set ere Adam eteri yen.
Adam ere God eteri yen.

<- LUK 2LUK 4 ->