Matyu 4

Satan re Jisas rene seilam.

(Mak 1:12-13; Luk 4:1-13)

1 God Reri Wow re Jisas rene tamekene bo emik panen yim. Satan re Jisas rene etek seilam. 2 Neir tame pesri ok, yabel tame pesri ok Jisas re awos be am, re sekwoi sam. 3 Satan re yan Jisas rene op wem. Ne God Eterri Yen sekene, ne wetek, gwor pa rem nakwuk tete, ne poten ate. Ne etop nente, an late, ne God Reri Yen. Op wem. 4 Jisas re tuma sein op wem. God Reri Siglowri Tuma op webo.

Tatame rem awoswou habote, rem heyar be tete. Tame rem God Reri Tuma mette, rem heyar tete.

(Lo 8:3)

Op wemke, re Satan reri wem tuma be metem.

5 Sene Satan re Jisas rene panen kwom sag Jerusalemke yim. Re rene God Eterri Kwobor magelke panen yawum. 6 Re Jisas rene op wem. Ne God Eterri Yen temente, ne opu kirpen war. God Reri Siglowri Tuma op webo.

God re reri kwomri tame remne weraste, rem nene kwobo late.

Neri tewo pa be pete, rem nene letke potte, ne heyar waren tetete. Op wem.

(Buk Song 91:11-12)

7 Jisas re rene sein op wem. God Reri Siglowri Tuma kirkir op webo.

God re nereri Keryen Yen, ne rene kap seilate. Op webo.

(Lo 6:16)

8 Satan re rene sene panen kwow bukrek yawum, re rene aboyei kwom peteram, kwomke tetane nugwape wosbas kirkir peteram. 9 Re Jisas rene op wem. Ne gulke pan anne lom yokwotek, an nene gwor nugwape wos newote. 10 Jisas re sein op wem. Satan, ne anne pelebiten yite. God Reri Siglowri Tuma op webo.

Ne Keryen Yen God eternewou lom yokwote, eternewou yaku nenbet. Op webo.

(Lo 6:13)

11 Op wemke, Satan re rene seilaweyem, re rene pelebiten yim, God reri kwomri tame rem yan Jisas rene kwobo lam.

Jisas re Galilike yaku tobotam.

(Mak 1:14-15; Luk 4:14-15)

12 Jisas re metem, tame rem Jon rene ake yaperke panen yim. Op metemke, re Galilike yim. 13 Re reri maime kwom Nasaret be yin tem. Re Kaperneam kwom etek yin tem. Kaperneam kwom et wamebarke tetane, Sebulunkene Naptalikene yokwok tetane. 14 Re etek yin tem, kiyiri tuma wesowbem tame, Aisaia, reri wem tuma re sekene tem. Re op wem.

15 Sebulun yokwo, Naptali yokwo rep kersepkap okke yibo kelowke tetane.

Jordan peik kelarek tetane.

Er sel et Juda tatame, agerbo tatame remri sel wule.

Nugwape Juda tatamekene nugwape yatamekene rem etek tetane.

16 Wule yaper sebo tatame rem kerneirke simenbo tatamekap.

Yuri rem tuw bukre lam.

Er tuw bukre re kerneirke sin sabo tatame etemne tobkun rem kwom geike tem.

(Aisaia 9:1-2)

Jisas re God re nowsel panen sibo tuma wesowben re sikanuma tatame remne heyarbem.

(Sapta 4:17—9:34)

Jisas re omyen potbem tame eis remne wepotem.

(Mak 1:16-20; Luk 5:1-11)

17 Etek yin temenemke, re tuma tobotan wesowem. Re op wem. Kem kemri wuribai yaper mesegente. God re kemne kwom panen site yabel matnaye. 18 Jisas re Galili wame barke sewurbem, re lakemase per, Saimonkene Andrukene repne lam. Saimon reri agerbo sig et Pita. Rep omyen potbem tame, rep wuli wamek rasen omyen potbem. 19 Re repne op wem. Kep arenkene yate. Kep omyen potbo tame. Kepri omyen potbokap, an kepne peterate, kep tatame remne etopkap potte.

20 Agetage rep repri wuli mesegenen rekene yim. 21 Re sene yibem, re agerbo lakemase per Jemskene Jonkene repne lam. Rep Sebedi reri yen. Rep har Sebedikene perek simenem, wuli let mate nabem. Jisas re repne yate wem. 22 Agetage rep repri har rene perek mesegenen Jisas eterkene yim.

Jisas re tuma wesowbem, re nugwape tatame remne heyarem.

(Luk 6:17-19)

23 Jisas re yin Galili kwomke kwomke sewurbem. Re God reri akek tuma peikbem, re God Reri Tuma Yenbo remne wesowbem, re sikanumakene tatame remne heyarbem. 24 Siriari nowselri tatame rem op metemke, rem agerbo agerbo sikanumakene tatame remne panen yam. Gambo gureremenem tatamekene sabem tatamekene kuw let tewo negel met tatamekene Jisas re remne aboyei heyarbem. 25 Nugwape tatame rem rene semowbem. Galiliri tatame, Dekapolisri tatame, Jerusalemri tatame, Judiari tatame, Jordan peik kelarek temenem tatame rem rene semowbem.

<- Matyu 3 Matyu 5 ->