1 'An "bʋɩ Zozinɔn, kaa 'yɩ 'nan Bali -le min nyrinda nɛn yaa "sia bɛ e ya -dan, -yee "wɛan an 'ka trʋ "baa 'nan, 'ka 'fli -nɔn Bali lɛ "le 'sraga nɛn kaa 'bʋ -yrɛ. 'Pian 'ka yiɛ 'e 'fʋ "man, ɛn 'ka 'kɔn Bali -le vɛ -a "fo, ɛn 'cee 'ta wʋ -pɛ pɛɛnɔn 'e 'sɔ -yrɛ. Bali bɔdɩ tɩglɩ nɛn e cɩ "le min 'e drɛ Bali lɛ bɛ, -nyrɛn zɩɛ. 2 'Wɩnun nɛn minnun -a dra 'trɛ 'gʋɛ -a da bɛ, te 'ka o si drɛ dɩ! 'Pian 'ka Bali 'tʋɩ -e 'e 'cee 'wɩ 'tɔdɩ pɛɛnɔn lila 'e -trɛ! -Te kaa drɛ zɩɛ, -a -nan nɛn 'wɩ nɛn Bali cɩ "va "bɛ, kaa -ci maan, -e 'ka 'wɩ nɛn e cɩ "yi "bɛ -a -tɔ, -e 'ka 'wɩ nɛn e 'sɔ Bali lɛ bɛ -a -tɔ, -e 'ka 'wɩ nɛn e cɩ tɩglɩ bɛ -a -tɔ.

3 Bali -le "yi "nɛn yaa drɛ 'mɛn bɛ, yaa -si -nɔan 'mɛn -e 'an vɩ 'ka -tʋdʋ pɛɛnɔn lɛ 'nan, te 'ka 'fli 'sia -dandan 'ka cin man 'nan cɛɛ cɩ dɩ! 'Pian Bali -le "yinun nɛn yaa drɛ 'cɛɛ -tʋdʋ 'cee yi -tɛradɩ Zozi da man bɛ, -a -cin nɛn 'e 'kɔn 'ka 'ji -e 'ka 'ci "nrɔn min nɛn ka drɛ -a bɛ -a da.

4 -Kaa po 'e drɛ -cee 'wɩ -kɔɔn "manvɛ -a. -Kaa -tɔa 'nan -a man mɛnnun a "kaga, 'pian man mɛn -tʋ 'lee 'yee 'nyranman. 5 -A -tʋwli "nɛn "nyian -cee vɛ -a. -Kaa ya "kaga, 'pian -cee -tɛdɩ 'e cin da 'bɛ cɩ Crizi po -a. Ɛn -kaa -tɔa -kaa cin wlu -tʋdʋ. 6 Bali "yi drɛ -kaa -tʋdʋ lɛ ɛn min -tʋ 'lee 'yee vɛ. -Te min -tʋ -le vɛ a Bali 'lewei vɩdɩ -a bɛ, 'e vɩ "le zɩ 'yee yi -tɛradɩ Bali da -a -cin -tɔa "ji "bɛ -yee 'wɩ 'zʋ. 7 Ɛn -te min -tʋ -le vɛ a "nyian 'nyranman -tʋ 'padɩ -a -leglizi bɛ, 'e drɛ. Ɛn -te min -tʋ -le vɛ a "nyian Bali -le 'wɩ "paadɩ -a bɛ, 'e "paa. 8 Ɛn -te min -tʋ -le vɛ a "nyian Zozinɔn "koe "tɔdɩ -a o da bɛ, 'e drɛ. Ɛn -te min -tʋ -le vɛ a "nyian fɛ -tʋ -nɔndɩ -a minnun lɛ bɛ, 'e drɛ 'e 'ci 'fɩdaa 'a. Ɛn -te min -tʋ -le vɛ a yiɛ -tɔdɩ -a -leglizi 'nɔn 'va bɛ, 'e drɛ 'e 'ta 'le "koe "a. Ɛn -te min -tʋ -le vɛ a "nyian min nyrinda 'sidɩ -a bɛ, 'e drɛ 'ci "nrandɩ -a.

9 'Ka min yɩ "yi 'ka 'ci 'fɩdaa 'a! -Yee "wɛan 'wɩ nɛn e cɩ "yi "bɛ, ka yɩ "yi, ɛn 'wɩ nɛn e cɩ -wlidɩ "bɛ, te 'cɛɛ yɩ "yi "dɩ. 10 'Ka cin yɩdɩ "yi 'ka Zozinɔn yei "bɛ, 'ka drɛ "le min 'lee 'e "bʋɩ -le vɛ zʋ! Ɛn 'ka yiɛ 'e 'nan 'ka cin man 'kpa tɩglɩ! 11 'Ka Minsan -le 'nyranman 'pa 'ka 'ta le "koe "a! Te 'ka kɔan wʋ "fo "dɩ! 12 Fɛ nɛn 'ka 'bli cɩ -yrɛ "bɛ -yee "wɛan 'ka 'ci 'e 'fʋ 'e "nrandɩ! Ɛn 'wɩ 'tɔndɔn pɛɛnɔn nɛn e bɔa 'ka man bɛ, 'ka 'pɛ -tɔ 'ka -pɔan "da! Ɛn te 'ka "koe 'e 'nyan Bali trʋ 'badɩ -a dɩ! 13 'Ka "bʋɩ Zozinɔn nɛn fɛ -tʋ 'wɩ -a o man bɛ, 'ka 'pa o va! Ɛn minnun nɛn o bɔala 'ka 'va bɛ, 'ka o 'kun 'ka 'pɛ "fli "a!

14 Minnun nɛn o 'tɛ "paa 'ka da bɛ, 'ka 'fɛa vɩ o man! Te 'ka wei 'pla o man dɩ, 'pian 'ka 'fɛa vɩ o man! 15 -Te minnun ci a "nrannan bɛ, 'ka 'ci 'e "nran waa 'e cin va! Ɛn -te minnun a -wuɔnan bɛ, 'ka 'wuɔ waa 'e cin va! 16 'Ka 'ci -pɔan 'e 'kɔn -tʋwli! Te 'ka -wɛɛ 'nan 'ka -dandan "taan 'ka cin man dɩ! 'Pian minnun nɛn blamin yiɛ 'ka 'naan o man dɩɛ, 'o 'kɔn 'ka beenun -a! Te 'ka 'fli 'sia 'ka cin man 'wɩ 'tɔnɔn 'a dɩ!

17 Te 'ka 'wɩ 'wlidɩ 'lɛji -tɔ min lɛ 'wɩ 'wlidɩ "a dɩ! 'Wɩ nɛn e cɩ "yi "bɛ, -a 'bɔ nɛn 'ka -wɛɛ 'nan 'ka dra min -tʋdʋ pɛɛnɔn lɛ! 18 'Ka man -wɛɛ 'kpa tɩglɩ 'nan, 'ka yei 'e 'kɔn 'e 'sɛndɩ 'e cin va 'ka 'vale min -tʋdʋ pɛɛnɔn 'a! 19 'An beenun, te 'ka -wɛɛ 'nan 'ka 'fli 'ta 'kuli -taan 'ka 'bɔ 'a dɩ. 'Pian 'ka Bali -le nyran -blɩdɩ 'tʋɩ -e 'e 'wɩ zɩɛ -a drɛ. Kɔɔ e ya 'e 'crɛn -tɛdɩ Bali -le 'fluba 'ji 'nan: