1 'Wɩ nɛn -a -cin 'e 'kɔn 'ka 'ji 'kʋ 'va zia bɛ -nyrɛn 'gʋ, kʋ ya Crizi 'sunɔn 'a, ɛn e 'kʋ 'pla 'nan 'kʋ Bali -le 'wɩ yɔɔdɩ "paa 'ka 'ji. 2 'Pian 'wɩ -dan nɛn "va "bɛ, -nyrɛn 'nan 'nyranman nɛn yaa -pɛba 'wʋ 'kʋ 'lɔ bɛ 'kʋ yiɛ -trɔa "da. 3 -Yee "wɛan 'an 'bɔ 'le vɛ bɛ, -te ka 'mɛn 'wɩ tin "baa oo, -te 'bɛ "cɛɛ dɩ, tin 'banɔn 'mɛn 'wɩ tin "baa oo, ma'an siala 'wɩ 'a dɩ. Ɛn "nyian bɛ 'an 'bɔ mɛɛn "cɛɛ 'an 'fli -le 'wɩ tin "baa dɩ. 4 Maan ve 'cɛɛ 'nan, -te 'an 'wulo -ji "nrɔndɩ 'ka tin tɛa 'an da dɩ oo, wa'a vɩlɛ 'nan 'wɩ zɩɛ -yee "wɛan 'mɛn tin a 'nɔnnɔn dɩ. 'Pian Minsan -tʋwli 'bɛ cɩ 'mɛn tin 'bazan 'a. 5 -Yee "wɛan te 'ka tin -tɛ min da, te -a tʋ 'ka tian bɔlɛ dɩ. 'Pian 'ka Minsan -tadɩ man -pɛn! Tʋ zɩɛ -a man nɛn, e 'wɩnun nɛn 'e yɔɔdɩ klun va bɛ -a ta bɔala. Ɛn "nyian bɛ, 'wɩnun nɛn min ji 'e yɔɔdɩ bɛ, yaa ta bɔala. Maan ve 'cɛɛ 'nan, yi zɩɛ -a da bɛ Bali min 'tɔ "yi "ve 'nyranman nɛn min 'bɔ -a 'pa bɛ -a man.

6 'An "bʋɩ Zozinɔn, 'cee "wɛan nɛn an "sia 'wɩnun 'gʋɛ -a vɩnan 'kʋ 'vale Apolo -a 'kʋ man. Waa 'vɩ 'nan: «'Wɩ nɛn 'e 'crɛn -tɛdɩ bɛ, te min 'e 'ciɩla "da "dɩ!» An ya "vale 'nan 'wɩ zɩɛ 'ka -tɔ 'nan, -a -tʋwli "nɛn "nyian 'kʋe vɛ -a. -Yee "wɛan te 'ka 'tʋ 'e -dandan 'tan 'kʋ "fli 'gʋɛ 'kʋ yei "min -tʋ -le "wɛan dɩ. 7 -Tɩɛ 'vɩ 'yiɛ 'nan i ya -dan 'i bɔɛzan -tʋ man? Fɛ -tʋ nɛn 'i 'lɔ, te Bali "cɛɛ 'nɔn 'yiɛ dɩɛ, e 'ka "fo "dɩ! -Yee "wɛan nɛn 'i -dandan 'tandɩ 'le 'tɔ!

8 -A -cin a 'ka 'ji 'nan fɛ -tʋ 'ka 'e 'klɩdɩ 'ka man dɩ, 'nan ka drɛ fɛnɔn 'a. Ɛn ka mingɔnnɛn -blɩdɩ 'sia 'va, 'pian kʋ 'ka wo "va dɩ. An ya "va 'nan 'wɩ zɩɛ 'e drɛ 'wɩ 'kpa -a, 'dʋ -e "kʋ "kɔn wʋ "va. 9 -A -cin a 'an 'ji 'nan, kʋʋ nɛn kʋ cɩ Zozi 'le 'pasianɔn 'a bɛ, Bali 'kʋ drɛ minnun nɛn o 'ka min va minnun -a dɩɛ waa. Kʋ drɛ "le minnun nɛn o ya 'o 'pladɩ 'nan 'o -ka bɛ -wee 'wɩ 'zʋ. -Te e ya Bali -le 'pasianɔn 'a oo, ɛn -te e ya blamin -a oo, o pɛɛnɔn -a -nan ye. 10 Minnun 'kʋ "siala klinnɔn 'a Crizi -le "wɛan. 'Pian 'cee vɛ bɛ, 'ka 'fli "siala 'wɩ 'tɔnɔn 'a Zozinɔn yei. Ka ya min 'plɛblɛ nun -a, 'pian 'kʋe vɛ bɛ e 'ka zɩ dɩ. Minnun 'ka 'tɔ "yi "ve, 'pian 'kʋe vɛ bɛ o "naan "kʋe "man.

11 'Bɛ nɛn cɛɛgʋ yi -a 'gʋɛ, dra 'kʋ -tɛa tian, ɛn 'yi dra 'kʋ -tɛa tian. 'Kʋ man sɔnun "ka "dɩ. Minnun 'kʋ -sɔan, ɛn "nyian bɛ 'kʋ -nyran pei "ka "dɩ. 12 'Kʋ "koe -nyaan 'nyranman 'padɩ -a -e 'kʋ "nɛn "fɛ -blɩ. Minnun 'kʋ "srɔnman 'pian -fɛa nɛn kʋa ve o man. Minnun 'tɛ "paa 'kʋ da, 'pian 'kʋ 'wulo -tɔa "wlu. 13 Minnun "we 'kʋ man -wlidɩ, 'pian kʋa "sia "da -wlɛ wei 'nɔnnɔn 'a. Kʋ drɛ 'trɛdanɔn 'lɔ "le bli -le 'wɩ 'zʋ, ɛn kʋ da nɛn o 'wee "tri pɛɛnɔn 'wɛɛnman tian cɛɛgʋ yi -a.

14 -Te an 'wɩnun zɩɛ -a crɛn -tɛ 'cɛɛ bɛ, wa'a vɩlɛ 'nan -e 'yra 'e 'ka -tɛ dɩ. 'Pian an ya "vale 'nan ka -sɔɔnla -si tɩglɩ da, kɔɔ ka drɛ 'mɛn 'nɛnnun nɛn an o ye "yi "bɛ waa. 15 Maan ve 'cɛɛ 'nan -te min -kpi fu (10.000) 'bɛ Crizi -le 'wɩ "paaman 'ka 'ji oo, 'pian -a -cin 'e 'kɔn 'ka 'ji 'nan 'ka "tɩ 'ka "kaga "dɩ. 'An 'bɔ 'bɛ drɛ 'ka "tɩ "a, kɔɔ mɛɛn Crizi -le 'wɩ 'nɔnnɔn 'vɩ 'cɛɛ ɛn ka drɛ -yee vɛ -a. 16 -Yee "wɛan an 'ka trʋ "baa 'nan, 'ka drɛ 'an 'si drɛnɔn 'a. 17 Ɛn 'wɩ zɩɛ -a -ji bɛ, an Timote "paa -sia 'cɛɛ. Mɛɛn Bali -le 'wɩ 'vɩ -yrɛ ɛn e wɩɩ "man. Zozinɔn yei "bɛ, e drɛ "le 'an 'pɔn -ji 'nɛn nɛn maan ye "yi ɛn an yi -tɛala "da "bɛ -yee 'wɩ 'zʋ. Zɩ 'mɛn 'ta wʋ -pɛ cɩ Crizi -sru "bɛ, e "ta "lo -a -cin -tɔlɛ 'ka 'ji. Ɛn 'wɩ 'bɔ zɩɛ -a 'bɔ nɛn maan "paaman minnun ji -leglizi -tʋdʋ pɛɛnɔn 'ji.

18 Min -mienun a 'ka yei "bɛ waa nrɔn 'o 'ji 'nan ma'an "nyian lia 'an da 'ka 'va "fo "dɩ, ɛn o -dandan 'tandɩ 'sia. 19 'Pian maan ve 'cɛɛ 'nan -te Minsan wɩɩ "man "bɛ, -a -nan 'ka "nyian mɔan dɩ -e 'an 'lʋ 'ka 'va. -Te an 'lʋ bɛ, minnun 'bɔ nɛn 'o 'fli dra -dandan 'labɛ, wa'a vɩlɛ 'nan o wei lɛ nɛn 'an "trɔɛn -tɔa "dɩ, 'pian 'plɛblɛ nɛn Bali -a -nɔn -wlɛ "bɛ -a 'bɔ nɛn maan -nanjɛan. 20 Kɔɔ Bali -le mingɔnnɛn -blɩdɩ min da bɛ, wa'a vɩlɛ 'nan 'wɩ 'saza nɛn min -a tin "baa 'e 'le dɩ, 'pian Bali 'yee 'plɛblɛ 'ci -kɔɔnman. 21 'An sɔnba 'sia -e 'an 'lʋ 'ka 'va, 'bɛ a -tʋ. Ɛn 'an 'lʋdɩ 'ka 'va 'ka yɩdɩ "yi 'lee -pɔan "trɔɔ -a bɛ, 'bɛ a -tʋ. 'Wɩ "fli zɩɛ -a "cɛn 'va nɛn ka cɩ?

<- 1 Korɛnti 31 Korɛnti 5 ->