Yook 49
Yook ambo bi ye karub yeman. Yook kuu Korah ye awoyambed wongkiwen.
1 Ambibkin koremdan, weng kee wengambirime,
kane kane okad kiri doriib, yiib korem ke wengambirime,
2 aningkoyiibbandaniib aningko ariyiibdaniib,
yiribman yemoondaniib kamboknondaniib, yiib korem kui.
3 Ne mongkodkonombed meeni kangdom ye weng dakmaniin,
kwane ne niindem aombed weng menebaneen kumbed kaadkeri kuu kondaniin.
4 Ne kerendem kuu ongkandi weng yaa kowe wengambaraniin,
kwane haawiibbed wangkeni weng yobdood ye id kuu kedmengkandaniin.
5 Ne yaa aron arewa mananuun kuu komande unaniin? Dowan, unainban.
Arewa kame birandimaibdanbed ne yaa kanawanewandaniib kuned unainban.
6 Kane kane yi yiribman yemoon yaa yone
nub kuu yiminmo ande kerengkan kamimaibdan kumbed manmo keruwaniib kangkon unainban.
7 Karub kanembed karub maa ye wadkeri dowad ma biddindeban,
kwane yembed karub maa ye dowad God yaa ma moonindeban.
8 Wadkeri ye dowad biddi kuu yeka mamaa,
odbed kowi kuu yiminban.
9 Biddaneen kuu aron korem ari wad doberembaraneen,
kwane biddaneen kuu ma deendaanban.
10 Kedi, wedmuub kuu meeni kangdomdan kuu duknaniib,
inameniibbandaniib awon korokdaniib kangkon duknaniib,
kwane yi korem kuu duknenib yi yiribman kuu yena yaa kirarundaniib.
11 Yi bobkonombon kuu yi dobirimbon keraneen aron korem,
kuyaa dobaraniib yaron kuu yimin wandaanban,
yi yirin kumbed yi okad kuu yika yi aningkoyiib ande kowaniib kuned.
12 Kukei, karub kuu ye yiribman yemooniib kuned doberembaraanban,
ye kuu dingkan areb, ye kangkon bobnaneen.
13 Inameniibbandan yi dobiri kiwaan kukui,
kwane yi yoman wene yi weng yaa amun andimaibdan kangkon kwamunemo dobirimaib.Selah
14 Yi kuu sibi areb, yika oonaibban, bobni yaromkonombed dedmondaneene bobkonombon yiri wene dobaraniiwe,
bobnimbed yi yaa oonaneen.
Kwane aron dukmen arimbed yi kuu yorokmodanbed oonendaniib.
Yi id kuu bobkonombon yirimbed deendaneen,
kowe yi kingkin kuu ambiwiibban keraniib.
15 Kumban Godbed ne wadkeri kuu bobkonombon yirimbed biddaneen,
amanaa, ne kuu yekareb yeyiib yaa nenwananeen.Selah
16 Kwane, karub maa kuu yiribman yemooniib keroko binangke unaib,
ye ambiwoom korem amun amunmo yidware wonoka kuyaa meenaib.
17 Amborom kuu ye bobnaneen kuu ye yiribman kuyiib yeka ma be wanaanban,
ye ambiwoom korem amun amunmo yidwaroon kuyiib bobkonombon yiri ben kubunaanban.
18 Ye kwane doreen kuu yekareb yemeren nekob yimin ande kubimaan.
Ye kuu yiminmo keraneen kuu yenambed ye aningko kankoonaniib kuned,
19 ye kuu yambe yawoya awoya yaa daboknendaneen,
yi kuu kumun aommo doberembaraniib kui.
20 Yiribman yemoondan kuu kaadkeri inameniibban keraniib kuu