Yook 140
Yook ambo bi ye karub yeman. God yaningko kankooni ye yook Dewidbed wongkoon.
1 O Yariman, ne kuu miin arewa kamenabidan yaambed nen burudande angka kowe.
Ne kuu yeremboromdan yaambed nen dorondare.
2 Yi kuu yi niindem aom inamen miin arewa ongmenabimaib,
kwane yi kuu aronki korem kuu ana nangmi inamen bangkandimaib.
3 Kwane yi ong kuu niin yi ong areb kerenib “ssss” andimaib,
kwane yi weng mongkodkono mandakadbed dembimaan kuu niindok arud ambod areb.Selah
4 O Yariman, ne kuu miin arewa kamenabidan yi dingki dem aombed nen burudande angka kowe.
Ne kuu yeremboromdan yaambed nen dorondare.
Yimbed ne kombiri ye inamen ongmiwen kui.
5 Kerengkandanbed kawaad nong ne kuu awinenok ande ongme daubiwen,
kwane yimbed karub awingki ye men kuu kan batangne awinewande kamiwen,
kwane yimbed ne kiwaan arimbed awinenok ande nongkobiwen.Selah
6 O Yariman, “Eb kuu ne God.” ande yedmimain.
O Yariman, ne yaa mimyob keewe awawe ande baandaan kuu wengamberewe.
7 O Yariman Ambengkan, ne nen aromkonomo dorondarimaabman kui,
ana nangmi yaron yaa kuu eb kuu ne korok yaa kombe areb kerimaab.
8 O Yariman, arewa kamenabidan yi inamen dowaken yaambed kamandamiib kuu ee kwanime andaab,
kwane yi inamen ongmiwen kuu kebene.
Yi inamen ongmiwen kuu id keraneen kuu kerengkan keraniib kii.Selah
9 Ne kanawanewande bon keriwendan yi korok ari kuu,
yi butun kamiwen kuu ben ikakman nongkobebko,
10 amoyidkob niminiib yi ari kiroboko,
yi kuu amot aom ben kiraroko,
ika kawinindeban ye dem kongdem yiri ben kirarok.
11 Wengamborokbanabidan kuu nuwokad kuyaom kuu yumboniibban kerime,
kwane yeremboromdan kuu arewa kaimbed kirodmo mene dabunde yenbande monmarok.
12 Yariman kuu dabab wayiroondan yaa koromone angkumondene,
kamboknondan yaa wengyundi anammo kondimaan kuu nekaad.
13 Anam kuu yorokmodan kuu ewaningko yaa eso andaniiwe,