Yook 112
1 Yariman ye aningko kankoonime.
Karub kanembed Yariman yaa unimaan kuu Yarimanbed amun kerunoon,
kwane karub kane kuu Yarimanbed kwanime andi ye weng yaa dowaken darewoob keroon kuu Yarimanbed amun kerunoon.
2 Kuye karub ye dana meed kuu okad yiri kuu aromkono darewoobdan keraniib,
kwane ye ayowa ari kuu kangdommo dobaraniiwe amun kerundaneen.
3 Odamoda yiribman yemoona kuu ye ambiwoom dangoon,
kwane ye yorokmo kerekmen kuu aron korem kwane angkimbaraneen.
4 Kuye karub kuu kangdommo doriibdan yi dowad kumun aombed namberemoon areb keroon,
kwane ye kuu kabamoon kondoon ye mimyob dowaken keendene yena yi dabab yaa mimyob keendene yorokmo dobirimaan ye karub.
5 Karub kanembed kubiyiib od darewoob kondene nindorokiibbed od araben kondimaan kuu amunmo dobaraneen,
yorokmo kerekmen yaambed deme awinimaan ye karub kui.
6 Amborom kuu ye kuu ma kan kiringmaanban kowe.
Yorokmo ye karub kuu Godbed aron korem meenenaneen nonondandunaanban.
7 Ye kuu weng yuk arewa yaa kuu ma unaanban,
kwane ye niindem aom kuu kiringmiyiibban kangdommo,
Yariman yaamo angkumone doreen.
8 Ye inamen kuu karub maambed ma nen kimyen wanaanban, ye kuu unaanban,
yeenbon arimbed yembed ye bondan burudande doraneen.
9 Yembed nindorokiibbed kamboknondan yaa munob bangkandimaan,
kwane ye yorokmo kerekmen kuu aron korem kwane angkimbaraneen,
kwane ye kuu aningko darewoob arimbed kankoonaniib.
10 Kwane, arewa kamenabi ye karub kuu wedmenekore noriniib keraneen,
kwane ye kuu ningkambo kabang kamene miin yiminban keraneen.