1 Nangkodmia, meeni maa kuu kei. Yariman yaambed kubembirime. Weng keyiib kee yiib yaa ikakman wongke keendaan kuu yobdoodbanaa, kukuu yiib yaa kombaraib ande koromone awandi dowad. 2 Anon arewa arebdan yaa yiibkaadkerundime. Yi kuu miin arewa kamimaibdan, yi kuu id yaa yom nadme monmadmidan kui! 3 Yimbedban, nub kei nub kembed kad wanabi ye inamen ye weng id anam kanduwen. Inamen ye weng id anam kee, God ye Kingkin yaambed God yaningko kankoonenub, Yesu Keresu yaa nambiri konimaub, nub kangkon karubbed komo kamimaib yaa ma kangdom kerindo kii.

4 Karubbed komo kamimaib yaa kangdom keraniin kuu yimin, ye idiib kowe, kumban ne kuu kwanindo. Kanembed “Karubbed komo kamimaib yaa kangdom keraniin, ye idiib kowe.” andoka kuyaa meene. Kedi, ye yaa burudande id yemoon keraan. Id yemoon kuu kei, 5 ne kuu wooneenbed wene aron kaning kaningiib arimbed ne kad wandoon, angkon ne kuu Israeldan ye karub, angkon ne kuu Benjamin ye amyenimbonman, angkon ne awoya anuk yiri kuu Hibrudanmo, angkon Yuudan yi amob awini ye kerekmenbed kuu ne kuu Farisiman kere kuye amob awinimo keraan, 6 angkon Yuudan yi amob naawonmo awini ye kerekmenbed kuu ne kuu Yesu yaa anam andiwendan yenbande durud yewed kondaan, angkon Yuudan yi amob yaambed yorokmo dobiri ye kerekmenbed awinimo keraan kowe ne yaa kuu karub maambed ambarakmiyiib kii ande dedmone daandimokban, kukuu ne kei, kurin kuu.

7 Kumban, kekee kwana awene areb anuk komo komo naningko darewoob keri yeman korem kuu, kibikee Yesu Keresu ye dowad amonombe benkiranme bikni yeman andaan. 8 Keyiib kembedmomban, nembed komo komo yaambed awinaan korem kuu ben kiranme bikni yeman ande meenaan, amborom kuu kuye kumkam kuu yirimo, ne Yariman Yesu Keresu kaadkeruni kuu korem yaa burudandoon arimombed kowe. Ye dowadbed ne kumkam korem kuu kan bikderebe dowan keroon. Kumkam kuyaa kuu morokmorok andaan kumbed Keresu ye karub kere amun amun kandeni, 9 ye ibmo kereni, yorokmo kerundi kuu nembed Yuudan yi amob awinimbed kerain andeni, yorokmo kerundi kuu God yaambed Keresu yaa anam andimbed kera andid. 10 Ne dowaken kuu Keresuyiib ye bobnoon yiri ika demboon ye aromkonoyiib ye durud yewed kandoon kuyaa dabokne yonendiyiib yaa kaadkerandid. Ye bobnoon kwane ne kwangkon kwamune kerandid. 11 Kuye dowad kuu ne kuu bobni yaambed nenkoone wadkeri kawaneen andid.

12 Kumban ne kuu kuye inamen korem kuu bindo, mogeed, kwamune areb kuu ne yaa kuu demkoronmo yiminmo ongmindo, mogeed. Kuned Yesu Keresumbed ne awine ye areb keruni ye inamen kuu nembed awinande dedmone weniin. 13 Angkodmia, kuye inamen korem awinindo, mogeed andaan. Kumban mimo kumbedmo ambangkain kuu, anuk yiri komo komo keroon kuu nonondandekori, aman ari yeman yaa kuu naawonmo koromone ninabiin kuu, 14 Godbed Yesu Keresu yaambed ne yaa Ewen ari wini ye kiwaan daane baande yedmoon kowe, kabaanderi ye karub areb wadkeri aron korem ye trofi kandi dowad dedmoneni kabaaniin.

15 Kwane, kingkin kerekmen yaambed nub kainuwendan korem kuu daandaan kuye inamen yaambed awine doberembirime. Kumban yiib yena kuu yiib inamen kuu kimyen keraneen kuu, Godbed yiib yaa ongme ben dianmo keraneen. 16 Kuned, Yesu ye kiwaan wene kaadkere dowan keruwen kuyaambed kwane awine doberem.

17 Angkodmia, nimakarub yena yi yoom daboknenib ne kumun yaambed ine dodkanmo minime. Kwane, dobiri amun yiib yaa kedmengkanduwen kuye kerekmen yaambed doriibdan kuu wedme yi areb kerime. 18 Kumban yemoon yi dobiri kerekmen kumbed Keresu ye at ming arimbed bobnoon ye inamen yaa bondan areb kere doriib kii. Keyiib kee aron yemoon anukbed yiib yaa daandaan kumban, kibikee inok wani yiib yaa ikakman yedmaan kii. 19 Yi kuu Godbed monmari ye kiwaan kinoon yaa weniib. Yi id ye dowaken kuu yi god keriwen. Yi kerengkan inamen kuu yi yidbobni yeman. Yi kuu okad yiri ye inamen kuyaamo meenimaib.

20 Kumban nub aningko kuu Ewen aombed angkeen. Kwane, nub kuu kuyaambed menene Bobni Yaa Burudande Bindi Ye Karub yaa kuu dowaken darewoowiibbed meedmuub kii, kuu Yariman Yesu Keresu. 21 Ye kuu korem be ye dabderem yiri nongkobi ye aromkonombed kuu, nub id okad yiri yeman kuu nengkidme ye id nambiriyiib areb ongmendaneen.

<- Filipaidan 2Filipaidan 4 ->