Matyu 4

Setenbed Yesu Yaa Komboon Kaamoboon

(Mk 1:12-13, Lk 4:1-13)

1 Kwane, Yesu kuu Kingkin Karadmombed amboon angka nenwonoon. Ye kuu awad arewa yi korokbed komboon kaamobi ye dowad nenwonoon. 2 Nenwonoone, Yesu kuu animan koronde aronki 40yiib amnoom 40yiib doboroon kowe, mungimo keroon.

3 Kuye yoman kwamune awad arewa yi korok mene komboon kaamobi ye dowad yedmoon, “Eb kuu God ye Mingki keroka, bot kee yedmebko om keroko ane.” andoon.

4 Kumban Yesumbed inande yedmoon, “Yii, God Ye Weng wongkiwen kuu,

‘Nimakarub kuu animaniibmo ane dobaraibban,

wadkeri yeman anam kuu Godbed komo dakmeen

kwangkon wengambere dobaraniib kumbed yimin.’ ande wongkiwen.” andoon.

5 Kwanandoon kowe, awad arewa yi korok kuu Yesu nenwene God ye siti karadmo Yerusalem aom nande kurikuri boyambib darewoob aminim arimbed kowoona doboroon. 6 Kwane awad arewa yi korokbed yedmoon, “Eb kuu God ye Mingki keroka, ebka korongberenande kawene okad yiri kombere, amborom kuu God Ye Weng wongkiwen kuu,

‘Godbed ye engyus yedmaneena,

yimbed eb yaa ongme oonebdaniib.

Kwane yi dingkimbed eb awine kankoonaniiwa,

eb yon kuu bot arimbed wowaanban.’ ande wongkiwen.” andoon.

7 Kumban Yesumbed man yedmoon, “Kekamune angkon God Ye Weng wongkiwen kuu,

‘Yiib Yariman God yaa komboon kaamobaib.’ ande wongkiwen.” andoon.

8 Kwanandoon kowe, awad arewa yi korokbed Yesu nenwenene aangko ambab ari daanene kowoona doboroona, ambibkin koremiib korok dareb dareb yi aromkonoyiib korokbenoon. 9 Korokbenekore Yesu yaa yedmoon, “Eb kuu ne yaa okad yiri bumangke ne dabderem aom dobere naningko kankoonaneeb kuu, korem komo komo wedmeeb kuu kabdaniina yi korok keraneeb kii.” andoon.

10 Kumban Yesumbed neman yedmoon, “Seten, koronde wene! Amborom kuu God Ye Weng aombed wongkoon kuu,

‘Yiib Yariman God yaamo bumangkane yaningkomo kankoonenib,

ye yaamo wengambere kwanembirime.’ ande wongkoon kui.” andoon.

11 Kwane, awad arewa yi korok kuu koronde wonoone, engyus menenib Yesu yaa awanene ooniwen.

Yesu Andowe Weng Amun Daandenmo Yaroon

12 Aron maa, Yesu wengamboroonka Yoon Baptaisman kuu awine kan wii aom kaaniwen kowe, Yesu kuu ika Galeli ambibkin ari wonoon. 13 Kambong Nasaret koronde wene Kapeenaum aom doboroon, amyenimbon Sebulun yoom amyenimbon Naftalai yoom yi bidambib aom, bowan Galeli kebed yaa. 14 Kwane, komo komo profesiman Aisaiyambed wongkoon kuu anam kwamune id keroon. Ande wongkoon kuu

15 “Galelidan, amyenimbon Sebuluniib amyenimbon Naftalaiyiib kui.

Karamok wini ye kiwaan kuyiib, ok Yooden yara kuye okad kui.

Yuudan yoom ambibkin maa maadan yoom kui.

16 Yi kuu bobniyiib ambarakmiyiib ye kumun aombed doriib kuu

God ye nambiri darewoob kawure waroon kuu wedmiwen.” ande wongkoon.

17 Galeli ari wonoon kuye aron kuyaambed Yesu andowe God Ye Weng kee daandenmo yaroon, “Yiib amonombime, amborom kuu Ewen Yarimanbed nimakarub yi korok kere ooni yaron kuu dia muneen kowe.” andoon.

Ye Kedmengkandaneendan Ibduruk Boon

(Mk 1:14-20, Lk 5:1-11, Yn 1:35-42)

18 Kwane, Yesu kuu bowan ok Galeli kebed angka yare mene oon bi karub wedmendoon, ayi ningki. Yi kuu oon bi ye men kamberenib oon bandiwed. Yi aningko kuu Saimon yaningko maa Pita yoom Endru yoom. 19 Wedmekore, yedmendoon, “Yiib kuu ne yoman minibko, oon bi areb Godiib yaa nimakarub bi ye kiwaan yiib yaa kedmengkanda.” andoon. 20 Andoone, erebnariyiibban yimbed oon bi ye men nongkobiiwa, Yesu ye yoman kedmengkandok ande winiwen.

21 Kwane, kuyaambed wene ari angkon karub ayoob wedmendoon, ayi ningki, Yems yoom Yoon yoom. Yi kuu yi ambe Sebedi yoom oon bi motod aom oon bi ye men karangkane dibiib. Yi ayoob yaa kwangkon baande yedmendoona, 22 yi kwangkon erebnariyiibban yi ambeyiib oon bi ye meniib motodiib koronde Yesu ye yoman kedmengkandok ande winiwen.

Yesu Kuu God Yaromkonoyiib Kedmengkandoon

23 Kwane, Yesu kuu Galeli ambibkin aom dewenebe, Yuudan yi kurikuri ambiwoombed kedmengkandene, Godbed yi korok kere ooni ye weng amun daandenmo yarebene, nimakarub bob anikadiib maa maa korem ongmenaboon.

24 Kwanoon ye weng kuu Siria ambibkin aom daande yareen. Weng kee daande yaraune, nimakarub bob anikad maa maa kandiwendaniib, niindem aom yewed darewoob kandiwendaniib, awad arewa ibnendiwendaniib, kot yimaundaniib, yona dingkia ida yidne wonoondaniib korem kwamune benmenebiiwe ongmenaboon. 25 Kwane, kadaareb yemoon kuu ye akmok winiwen, Galeli ambibkindaniib, Dekapolis ambibkindaniib, Yerusalemdaniib, Yudea ambibkindaniib, ok Yooden yara doriibdaniib kwane ye akmok winiwen.

<- Matyu 3 Matyu 5 ->