1 Kwane, Yesumbed kadaareb yaayiib ye kedmengkandeendan yaayiib daandoon, 2 “Yuudan yi amob kedmengkandidaniib Farisidaniib kuu Moses ye yumbon kandiwen kowe, God Ye Weng yaambed kedmengkandimaib. 3 Kwana kowe, yimbed komo kedmengkandiib korem kuu kwane wengambere ambangki yemanmo. Kumban yimbed komo komo doronib deme ambangkimaib kuu kwane yiib kuu kumunkingkaib, amborom kuu yi kedmengkandi kuu no wengmo daandimaib, yikareb ongme awinimokban. 4 Kwane, yi amowamob yemoon kuu nimakarub yaa bangkandimaib kuu dabab darewoob kondi yeman, kumban dabab kondiwendan yaa dingkiod ma yire kankoone awandimokban, korondiwen.

5 “Kwane, yi komo komo kamimaib kuu karub yi arinambo arimbed kamiiwe yika yi aningko kankooni yeman. Kwane, yi kuu God ye amob weng anded korok ariyiib dingki yaayiib borokimaib kuu karub yena yi anded burudande darewoob ongmimaib. Angkon, yi kuu ebkad wuub bendom bendom yaa yuwengkenabimaib God ye amob awina andi yeman kuu karub yena yi ebkad wuub burudande doboob doboobmo ongmimaib. 6 Kwane, yi dowaken miin darewoob kuu orokbon yaayiib kurikuri ambiwoomiib kuu karub aningkoyiib ye dibirimbon ari dibirimaib. 7 Kwane, yi dowaken miin darewoob kuu karub yenambed kambong kidangkambed yi yaa kubendenib ‘kedmengkandi korok’ ande yedmimamime andiwed.

8 “Kumban yiib kuu ‘kedmengkandi korok’ andimban, amborom kuu yiib kedmengkandi korok kuu mimo, ma, yiib korem kuu ambang oni damanmo kowe. 9 Ma, okad yiri karub maa yaa ‘ambe darewoob’ andaib, amborom kuu yiib Ambe Darewoob kuu mimo, ye kuu Ewen ari doreen kumbedmo kowe. 10 Ma, yiib kuu ‘korok’ andimban, amborom kuu yiib Korok kuu mimo, Keresu yembedmo kowe. 11 Kwane, kanembed yiib yena yiib deme awini ye karub keraneen kuu aningko darewoob kandaneen, 12 amborom kuu kane kanembed yikareb yi aningko kankoonaniib kuu Godbed be kubunaneen, ma kane kanembed yi aningko kankubunaniib kuu Godbed yaningko kankoonaneen.” andoon.

13-14 Andekore, Yesumbed korok korok yaa yedmoon, “Amob kedmengkandidan yoom Farisidan yoom, yiib kuu aadidmidan kui! Godbed yiib yaa arewa kerundaneen. Nimakarub Godbed korok kere ooni yeman aom awunandamiib kuu yiibbed kebengkimaib. Yiib kwangkon awunokban kere nimakarub yena kane kane kiwaan onme awunande kamiibdan kwangkon yiibbed kebengkimaib.*Buk Matyu kurin wongkiwen yenamo kuu weng keyiib: “Amob kedmengkandidan yoom Farisidan yoom, yiib kuu aadidmidan kui! Godbed yiib yaa arewa kerundaneen. Yiib kuu irare nima irib awandi ye kurikuri doboob karub yi murubia ari kamimaib kumban, nima irib yi od animaiwe kamboknon kerimaib. Kwana kowe, yiib kuu Godbed dabab miin darewoob kondaneen.

15 “Amob kedmengkandidan yoom Farisidan yoom, yiib kuu aadidmidan kui! Godbed yiib yaa arewa kerundaneen. Yiib kuu miin ambab angka wene karamok angkara angkara kere okad maa maa kere onmenib, kwane karub kane Yuumanban kuu Yuudan yi amowamob awinok ande kamimaib. Kwane, ye kuu Yuudan yi amowamob awinaneen kuu, yiibbed kedmengkanaiwe yiib inamen arewa kandene burudandene kumbaanban yamotbon ye kiwaan ari dobiri ye karub anam keraneen.

16 “Yiib kuu indob tut kere kiwaan kei ande ben kinban winimaibdan kui! Godbed yiib yaa arewa kerundaneen. Yiibbed kekane yedmimaib, ‘Karub kanembed kurikuri boyambib darewoob yaningko yaambed amob ongmaneen kuu amob bongmi kuu yimin. Kumban kanembed kurikuri boyambib darewoob yu od gold yaningko yaambed amob ongmaneen kuu amob bongmindeban keraneen.’ andimaib. 17 Yiib kuu indob tut warudkidan kii! Kunambed aningko darewoowiib? Od gold dee, kurikuri boyambib darewoob dee? Od gold kuu kurikuri boyambib darewoob aom nongkobaniib kumbed karadmo keraneen kowe, kurikuri boyambib darewoob kuu aningko darewoowiib kii! 18 Kwane, yiibbed kangkon kekamune yedmimaib, ‘Karub kanembed bot wuubimbon ari nengkiwed agedmo kere baeb God yaa koni yeman ye aningko yaambed amob ongmaneen kuu amob bongmi kuu yimin. Kumban kanembed bot wuubimbon kee ari nongkoboon ye munob koni ye yiribman yaningko yaambed amob ongmaneen kuu amob bongmindeban keraneen.’ andimaib. 19 Yiib kuu indob tutdan kii! Kunambed aningko darewoowiib? Munob koni yeman dee, bot wuubimbon dee? Munob koni yeman kuu wuubimbon ari nongkobaniib kumbed karadmo keraneen kowe, bot wuubimbon kuu aningko darewoowiib kii! 20 Kwana kowe, karub kanembed bot wuubimbon yaningko yaambed amob ongmaneen kuu komo yiribman kwari dangoon korem kuu daboknoon kowe aningko ayoob yaambed amob ongmaneen kii. 21 Kwane, kanembed kurikuri boyambib darewoob yaningko yaambed amob ongmaneen kuu ambib kuye Yariman yaningko kuu daboknoon kowe aningko ayoob yaambed amob ongmaneen kii. 22 Kwane, kanembed Ewen yaningko yaambed amob ongmaneen kuu God ye ooni ye dibirimboniib Godiib kuyiib daboknoon kii.

23 “Amob kedmengkandidan yoom Farisidan yoom, yiib kuu aadidmidan kui! Godbed yiib yaa arewa kerundaneen. Yiibbed God yaa kamaka bawanga animan ari bokni yeman mimimiib andokbe wenore angko angkoyiib kere mimo God yaa konimaib. Kukuu inamen embeng kumban yiib kuu God ye amob darewoob ke dangeen kee yangmadandiwen, wengyundi anam kondiyiib mimyob keene kakman are nonondandiyiib ma korondiyiibban weng awinimo dobiriyiib yaa yangmadandiwen kui. Inamen kuyiib awinime, andokbe wenore angko angkoyiib kere mimo God yaa konimaib kuu kuyiib daboknime. 24 Yiib kuu indob tut kere kiwaan kei ande ben kinban winimaibdan kui. Yiib kuu ambarakmi embeng kebengkimaib kumban ambarakmi darewoob kamimaib. Yiib kuu kekamune kii, yiib ok ani yeman aom kimiring kombere angkimbaraneen kuu emambed kan angka korarimaib kumban kemo darewoob kuu kwane kan yoobnimaib kii!

25 “Amob kedmengkandidan yoom Farisidan yoom, yiib kuu aadidmidan kui! Godbed yiib yaa arewa kerundaneen. Yiib kuu kabusa menekia yi angkamo ogimaib areb keriwen kowe, yiib niindem aom kuu birande yid bi ye inameniib kirim ye inameniib demboon. 26 Farisidan! Indob tutdan kui! Yiib niindem aom kuu arime. Kwananiib kuu yiib niindem aomiib yiib bunangkayiib kuu yiminmo keraneen.

27 “Amob kedmengkandidan yoom Farisidan yoom, yiib kuu aadidmidan kui! Godbed yiib yaa arewa kerundaneen. Yiib kuu bot bobkonombon areb, bunangkamo are kawan ambe amun amun ongmiwen kumban, niindem aom kuu kono konoyiib karub id deende weneeniib dangoon. 28 Kwamune areb, nimakarub kuu yiib kad angka inware dobiri wedmimaib kuu yorokmodan ande yedmimaib kumban, yiib niindem aom kuu miin arewa kamiyiib aadidmiyiib kii.

29 “Amob kedmengkandidan yoom Farisidan yoom, yiib kuu aadidmidan kui! Godbed yiib yaa arewa kerundaneen. Yiib kuu profesidan yi bot bobkonombon yenbenib God ye yorokmodan yi bobkonombon inwarimaib. 30 Kwane, yiibbed kangkon yedmimaib kuu, ‘Nub awoya dobiriwen yaron yiri anuk doburuwen karen, nub awoyambed profesidan ku yiiwe dukniwen kuu nub yoom daboknuuwa yindo karen.’ andimaib kui. 31 Kowe, yiibkareb yiibmeren dakmiib kuu anam kii! Yiib kuu profesidan kuman yenbandiwendan yi awoya ari kui. 32 Kwana kowe, yiib awoya anuk yiri yi ambarakmi deme andowe awiniwen kuu awine dowan kerime!

33 “Yiib kuu niin arud niin kii! Niindok ye meed arebdan kii! Komarewa kerenib Godbed yiib ben kumbaanban yamotbon yiri kiraraneen yaa kuu kombiri wananiib? 34 Kedi, kwana kowe, ne kuu kwane God ye deme awinidan maa maa yedmaniina yiib yaa mananiib, yena kuu profesidan, yena kuu meeni kangdomdan, yena kuu God ye inamen kedmengkandidan kui. Kumban mananiib kuu yiibbed yena yenbandaniiwa duknaniib, yena kuu at ming ari nongkobaniiwa yoworaniib, yena kuu nong yikyikiibbed yiib kurikuri ambib maa maayaombed wangkaniib, yena kuu taun maaya maaya kamenmo yare yenbandenmo yarebaniiwa kirokmonaniib kamaniib kii. 35 Kwana kowe, God ye yorokmodan yi umkan kuburoon ye dowad kuu dabab darewoob yiib ari kombaraneen. Abel ye umkan kubudoroon kuyaambed mene Berekaiya ye mingki Sekaraiya yiibbed kurikuri boyambib darewoob dore dingkan nengkimaib ye bot wuubimbon dore wedkuyaa ayiwen ye umkan kuburoon, yi korem yiiwe dukniwen ye dabab kuu yiib kuu kandaniib. 36 Kwani kowe, nembed yiib yaa ke anam yedmendaan kei, dabab ke menebaneen kei, kibik doriibdan yi ari kombaraneen kii.

37 “Yerusalem, o Yerusalem, kub aom doriibdanbed profesidan yenib nongkobenib, Godbed yedmaana minimaibdan kwangkon kub aom doriibdanbed kwane botbed be yaiwa duknimaib. Aron yemoon kuu ne dowaken kuu ayam mana awaanbed be yu buraab aom kangkukanabekoru dabunimaun kwamune areb, kub nimaya karuwa yaa be nedbe amuknande kamimain kumban yiib kuu dowakeniibban kerimaib. 38 Kedi, Yerusalem, kub ambib kuu ambib dob keranuun. 39 Kowe, nembed yiib yaa ke yedmendaan kei, ne kuu ika wedmewaibban kwane wene yiibbed yedmaniib, ‘Ye kuu Yariman yaambed monoon kowe amun kerunok.’ andaniib yaron keraneen arimbed.” andoon.