1 Noa awene yoom dingkan yoom motod aom aomniwen kuu Godbed nonondandindo. Kwani kowe, yedmoon “Nuub monok.” andoone monoone ok kuu igakman andowe keekne wuneen. 2 Kwanoone, okad niindem yirimbed ok kuu menebuun kuu kebene am kebene keroone, 3 aron 150yiib kuyaron kuu ok ika keekne wuneen. 4 Wood 7 aron 17 arimbed kuu motod kuu aangko Ararat ari angkibureen. 5 Ok keekne wuneene wood 10 arimbed kuu aangko maa maa kuu dian kereen.

6 Wene aron 40yiib dowan keruune wene ari kuu Noambed bunangka wedmi yeman ambongko nandene 7 ayari on binmo on kurud areb yaningko Reven kankoraroone wanwene ok animari wedyambed dewenebeen. 8 Amaan on kawanmo on kawa areb yaningko Dav kankoraroon amborom kuu ok kuu keekne dowan kereen ande meenoon. 9 Kankoraroone wanwuneen kuned okad akmindo kowe, ika wanmuneen amborom kuu ok kuu keekne dowan kerindo kowe. Ika wanmunuune, Noambed nende motod aom kowoon. 10 Wene aron ediib dowan keruune, on kawanmo ika kankoraroone, 11 wanyarebuune oobnembed ika wanmuneen kuu atbiidiib domone kanmuneen. Kwani kowe “Ok keekne dowan kereen yo.” ande meene yekaadkeroon. 12 Wene aron ediib dowan keruune ika kankoraroone wanwuneen kuned kuu ika minindo.

13 Noa ye weeb kuu 601iib kuyaron kuu wood mimo aron mimo keruune ok keekne dowan kereen. Kwanoone, Noambed wid yena bongme benkatmekore kerekanabe okad yiri wedmoon kuu okad kuu kamkono kere weneen. 14 Wene wood ayoob aron 27 keruune, okad kuu kokne kamkono kere wuneen.|U

(Aronki yemoon dowan keruune, urok kuu keekne dowan keroone okad kuu kamkono kere kereen.)

15 Kwane, Godbed Noa yaa yedmoon, 16 “Eb yoom eb wonong yoom eb karub dana yoom yi amered yoom 17 okad yiri yemaniib ayari yemaniib dingkan maa maa koremiib bunangka angkanime. Dingkan korem ke be angkaneeb kee wenebe yemoon kere muubnaniib kii.” andoon. 18 Kwanandoone, Noa yoom ye wonong yoom ye karub dana yoom yi amered yoom kuu bunangka angkaniwen. 19 Angkaniiwa, dingkan maa maa korem kuu yeka yeka angkane wenebiwen.

20 Angkon, Noambed bot wuube dingkan nengke agedmo keri yeman ye bon ongmekore, dingkan durukmanbaniib ayari oniib yaa maa maa bene kwari kiribekore, nengkane agedmo keroone baeb kuu Yariman yaa konoon. 21 Kwane, Yarimanbed kuyaa kuwekore yekareb yedmoon, “Amaan angkon okad kamune ne ika arewa kerundainban, kwane karubbed komo kamaniib yaa kui. Ne nekaad aron korem kuu nimakarub danambed wene aamkono yaa yi inamen kuu arewamo. Kumban, angkon nembed okad yiri wad doriibdan kuu angkon ika monmarainban, kibikee monmaraan kwamune.” andekore, ika yedmoon