LOMA 11

Nzambi kasia loza Iseli ko

1 Diawu minu thubidi ti : A buevi, Nzambi wulozidi batu bandi e ? Buawu ko. Bila minu veka ndidi muisi Iseli, mu nkuna Abalahami ; mu dikanda di Benzami. 2 Nzambi kasia loza ko batu bandi ; bobo kazaba tona thama. Lusi zaba ko mambu masonoko mantuba mu diambu di Eli, buevi kafundila Iseli kuidi Nzambi bu katuba : 3 Pfumu, bameni vonda mimbikudi miaku ayi bameni tulula mintala[a]miaku. Minu veka ndisiedi, vayi balembo tombi kuphonda.

4 Vayi buevi bubela mvutu wu Nzambi e ?

Ndisueka tsambudi mili yi batu mu diambu diama ;

bobo basia fukimina Bali ko.

5 Buawu kuandi buididi, mu thangu yayi, vadi ndambu yi batu basiedi boso buididi tsobodolo yi nlemvo wu Nzambi. 6 Enati mu nlemvo, buna yisiedi diaka mu mavanga ko. Bila enati buawu bobo buna nlemvo wusiedi nlemvo ko.

7 Buna buevi e ? Iseli kasia tambula ko mambu momo kaba tomba vayi bobo basobolo batambula mawu. Vayi bankaka bakitulu mintima mi matadi 8 banga bu disonimina :

Nzambi wuba vana Pheve yi tulu,

wuba vana meso muingi babika mona ;

wuba vana matu muingi babika wa,

nate lumbu kiaki !

9 Davidi wutuba :

Bika minyengo miawu mikituka mu diambu diawu dikondi,

ntambu ayi diluaku di balenda buila ayi thumbudulu awu.

10 Bika meso mawu maba mu tombi muingi mabika mona ;

bika mingongo miawu miba mikomvama mu zithangu zioso.

Mbuilu yi Iseli yisi mu zithangu zioso ko

11 Minu thubidi : babumina thutu muingi babua e ? Nana ! Mu mbuilu awu muawu Bapakanu batambudila phulusu muingi Bayuda babasila kiphala. 12 Vayi enati mbuilu awu yidi kimvuama ki nza ayi enati dekuka kuawu kuidi kimvuama ki Bapakanu, buna buevi buela bela kimvuama mu thangu Bayuda boso bela balula mavanga e ?

13 Bila kuidi beno Bapakanu ndintuba bu ndidi mvuala wu Bapakanu ; ndieti niemisa kisalu kiama 14 bila enati baka bubela, totula kiphala kuidi bibutu biama ayi vukisa bankaka mu bawu. 15 Bila enati ndozolo awu yidi mu diambu di vutula nguizani ayi nza buna buevi buela bela bu bela kuba tambula e ? Buna keti yela ba banga mfulukulu mu bafua. 16 Bila enati bitini bitheti bidi binlongo, buna kuku kimvimba kidi kinlongo. Enati muanzi widi wunlongo buna matafi madi manlongo.

17 Vayi enati ndambu yi matafi mankaka mazengo ayi ngeyo wubaditafi di nti wu olive wukambu kunu, wuyiza kuiku va buangu ki matafi mazengo ; wuyikidi kithuadi ayi bawu mu bakanga maka mantotukila mu muanzi wu nti wu olive wukunu 18 buna bika kukiniemisa mu diambu di matafi. Enati wulenda kukiniemisa, buna bika sia ngeyo wunnatanga mianzi vayi muanzi wawu weti kunatanga.

19 Ngeyo wulenda tuba : A keti matafi mazengo mu diambu minu ndikuiku. 20 Bumboti kuandi. Mawu mazengolo mu diambu di kambu ku minu vayi ngeyo widi wutelama mu minu. Bika kukiniemisa vayi mona tsisi. 21 Bila enati Nzambi kasia mona kiadi ko matafi momo madi khatika matafi ma nti, buna ngeyo kalendi kumona kiadi ko. 22 Tala buididi mamboti ayi nganzi yi Nzambi. Nganzi kuidi bawu babua, mamboti kuidi ngeyo ; enati wunzingila kaka mu mamboti momo. Bila enati buawu ko buna ngeyo mamvaku wela zengo.

23 Ayi bawu mamvawu, enati bakadi zingila mu kambu kuawu ku minu, buna bela kuiku. Bila Nzambi beki lulendo lu kuba kuikila diaka. 24 Bila enati ngeyo wuba wuzengo mu nti wu olive wukambu kunu wowo wumena wawu veka ayi wuyiza kuiku mu nti wu olive wukunu, buna keti matafi momo matotukila mu nti wowo wu olive mela kuiku mu nti beni e ?

Iseli dioso diela vuka

25 A bakhomba, thidi luzaba disuekama diadi muingi luedi kukimonanga banga batu badiela. Muaki ndambu yi Iseli bawilukilanga ko. Kambu kuawu ku minu kuela zingila nate Bapakanu boso bela kuiza kuidi Nzambi. 26 Buna bosi Iseli dioso diela vuka. Banga bu masonimina ti :

Nkudi wela totukila ku Sioni,

niandi wela katula kambu ku tumamana koso mu Yakobi

27 Tala buela bela Nguizani ama ayi bawu :

Ndiela lemvukila masumu mawu.

28 Mu matedi Nsamu Wumboti, bawu badi bambeni mu diambu dieno vayi mu matedi tsobodolo bawu badi bakiluzolo mu diambu di bakulu. 29 Bila makaba ma nlemvo ayi lutelo lu Nzambi bilendi balulu ko. 30 Mu thama, beno mamveno lusia tumukina Nzambi ko vayi buabu balumueni kiadi mu diambu di kambu ku tumama ku batu baba. 31 Bobuawu, enati kambu kuawu ku tumamana buabu kulunatini kiadi buna diodi didi mu diambu mamvawu bamono kiadi. 32 Bila Nzambi wukanga batu boso, mu diambu di kambu ku tumamana muingi kamona batu boso kiadi.

33 A nga phila thipula yidi mu kimvuama, mu nzayilu ayi mu nduenga bi Nzambi ! Zinzengolo ziandi zilendi fiongonono ko ayi zinzila ziandi zilendi bakulu ko. 34 Bila :

A buna nani wuzaba mayindu ma Pfumu e ?

Voti nani wuba kumvananga zindongi e ?

35 Voti nani wutuama kumvana makaba

muingi niandi kamvutudila ku nzimunina e ?

36 Bila kuidi niandi, mu niandi ayi mu diambu diandi, bima bioso bididi.

Bika nkembo wubanga yandi mu zithangu zioso. Amen.

<- LOMA 10 LOMA 12 ->