LUKA 2

Mbutukulu yi Yesu

(Matayi 1.18-25)

1 Mu bilumbu bina, ntinu Sezari Ogisite wuvana lutumu lu tangabatu boso disasama va ntoto wumvimba. 2 Disasama beni diawu diba dithete divangama mu thangu Kiliniusi kaba nyadi[a] wu Sili.

3 Kadika mutu wuyenda kisonikisa ku divula diandi. 4 Sumbu Zefu kaba mu nkuna wu Davidi, diawu kabotukila ku divula di Nazaleti, mu tsi yi Ngalili mu kuenda mu tsi yi Yuda ku divula di Betelemi, divula di Davidi. 5 Wuyenda va kimosi ayi Maliya, nketo wukazola kuela, wuba mu buemba.

6 Buna badi ku Betelemi, Maliya wutula mu thanguꞌandi yibutila. 7 Buna wubuta muana wubakala : muanꞌandi wuthete. Wunzinga mu minledi ayi wuntula mu dikulu ki bibulu bila bibuangu bisia bakana ko mu diambu diawu mu zinzo zinlekanga banzenza.

8 Minsungi mi mamemi miba mu zitsola zizungidila zunga beni mibansunga mu nkielo buisi minkangu miawu mimamemi. 9 Kuna mbasi yi Pfumu yiba monikina ayi nkembo wu Pfumu wubazungidila. Buna tsisi yingolo yiba buila.

10 Vayi mbasi yiba kamba :

—Bikanu mona boma. Tsangu yimboti ndilunatini. Yikuiza monisabatu boso khini. 11 Bila buabu balubutidi Mvulusi mu divula di Davidi. Niandi Mesiya, Pfumu. 12 Luela mona muana wu tsombi zingulu mu minledi ayi tululu mu dikulu ki bibulu. Kiawu kioki dimbu luela kunzabila.

13 Buela zimbukila nkangu wu zimbasi ziba mu dikabu di masodi ma diyilu wumonika va ndambu mbasi beni. Nkangu beni wuyimbila minzitusu mi Nzambi :

14 Nkembo kuidi Nzambi yizangama

Ndembama va ntoto kuidi batu baketa zola.

15 Zimbasi bu zibika minsungi, zivutuka ku diyilu, buna minsungi mi mameme mikambasana miawu na miawu ti :

—Bika tuendanu ku Betelemi mu kuenda tadi mambu momo mavangimini kuna ; momo Pfumu katusamunini.

16 Bayenda nsualu ayi bayenda bata Maliya ayi Zefu va kimosi ayi muana wu tsombi wulekusu mu dikulu ki bibulu. 17 Buna baba mona, basamuna mambu moso momo baba kamba mu diambu di muana. 18 Babo bobo bawu wawu, basimina buwombo mu diambu di mambu momominsungi mi mameme miba kamba. 19 Vayi Maliya wulunda mambu moso ayi wuba ku mayindulanga mu ntimꞌandi.

20 Bosi minsungi mivutuka, minkembisa ayi minsanisina Nzambi mu diambu di mamo ma bamona ayi ma bawa. Mawu maba banga kuandi bu babakambila mawu.

Yesu wunatu ku nzo Nzambi

21 Dinana di bilumbu bu biduka, thangu yi zengisa lunitu lu kibakala lu muana bu yifuana, buna bamvana dizina Yesu. Diawu dizina divana mbasi tuamina nguandi kaba mu buemba buandi. 22 Bilumbu bizengu mu Mina mi Moyize mu diambu di tsukudulu awu bu bifuana, bambuta ba Yesu zinnata ku Yelusalemi mu diambu dikummonisa kuidi Pfumu. 23 Boso buidi busonama mu Mina mi Pfumu ti :

Woso muana wuthete wu bakala wumbutuka,

wela tambuku kuidi Pfumu.

24 Bayiza diaka mu diambu di tambika dikaba boso buididi mu Minami Pfumu : biduka biodi voti bana buadi ba mabembi.

25 Mutu wumosi wuba ku Yelusalemi, dizina diandi Simewoni. Wubamutu wufuana ayi wusonga. Wuba vingila mbombolo yi Iseli ayi Pheve Yinlongoyiba va niandi. 26 Bila Pheve Yinlongo yinkamba ti kalendi vika fua ko enati kamuenieti ko Klisto yi Pfumu.

27 Niandi wuyiza ku nzo Nzambi mu lutumunu lu Mpeve Yinlongo. Mu thangu bambuta ba Yesu zinata muana mu diambu di dukisa mambu madi mu Mina, 28 buna Simewoni wunsimba mu mioko ayi wusanisina Nzambi bu katuba :

29 A Pfumu, yekula buabu kisadi kiaku

kienda mu ndembama boso buididi tsilꞌaku

30 bila meso mama manueni phulusu aku

31 yoyi wukubika mu diambu di batu boso

32 yawu yidi muinda mu diambu di kienzula makanda ;

ayi nkembo wu Iseli, batu baku.

33 Dise ayi ngudi basimina buwombo mu wa mambu katuba mu diambu diandi.

34 Simewoni wuba sakumuna ayi wukamba Maliya, nguandi Yesu ti :

—Tala muana wawu wu kubukulu mu diambu di buisa ayi mu telimisa batu bawombo mu Iseli. Wela ba dimbu kiela bangusanga bawombo ; 35 muingi mayindu ma mintima mi batu bawombo matotuka. Vayi kuidi ngeyo veka, wela ba banga mbedi yela tobul mpeve aku.

36 Mbikudi wumosi wu nketo wuba diaka muna. Dizina diandi Anna, muana Fenueli, wuba mu dikanda di Aseli. Wuba wununa ngolo. Tsambudi di mimvu kaka kavuandila va makuela mu bumuana buandi. 37 Bosi wukituka difuola ayi wuzingila mu kidifuola nate mu tezo ki lunana lu mimvu ayi mimvu minya. Kadi lumbu kimosi kasia bika ko nzo Nzambi bila muna kaba nsadilanga Nzambi builu ayi muini mu lusambulu ayi mu kukifuisa nzala mu diambu di lusambulu[b]. 38 Niandi mamvandi bu kayiza muna thangu yina, wusanisina Nzambi ayi wuyolukila mambu ma muana kuidi batu bobo baba mvingilanga khudulu yi Yelusalemi.

39 Bu bamana dukisa mambu momo masonama mu Mina mi Pfumu, Maliyaayi Zefu bafutuka ku buala buawu, Nazaleti, didi mu Ngalili. 40 Muana wuyunduka ayi wukinda. Diela diwombo diba yandi ayi nlemvo wu Nzambi wuba mu niandi.

41 Kadika mvu bambuta ba Yesu ziba kuendanga ku Yelusalemi mu nyengo Pasika. 42 Yesu bu kadukisa kumi mimvu miodi buna bayenda ku Yelusalemi, mu diambu di nyengo, boso bubela kifu kiawu.

43 Nyengo bu wumanisa, bavutuka kuawu. Vayi muanꞌawu Yesu wusiala ku Yelusalemi ayi bambuta bandi zisia bu zaba ko. 44 Bawu babanzila ti widi muidi bakundi bawu bayenda yawu va kimosi. Bu badiata lumbu kimvimba, buna batona kuntomba muba bibutu biawu ayi bazabana yawu. 45 Vayi sumbu basia kummona ko ; diawu bavutukila ku Yelusalemi mu kuenda ntombi.

46 Bilumbu bitatu bu bivioka, bambakula muna nzo Nzambi, buna kavuendi va khatitsika minlongi mi mina. Wuba wa ayi wuba yuvula biuvu. 47 Babo bobo banwa, basimina mu diambu di diela diandi ayi mu diambu di mimvutuziandi. 48 Zimbuta bandi zisimina buwombo bu zimmona vana. Buna nguandi wunkamba :

—Muanꞌama, bila mbi wutuvangidi bobo e ? Zebi kuaku ti siaku ayiminu tsisi yiwombo tumueni ayi tutombidi ngolo.

49 Buna Yesu wuba vutudila :

—Bila mbi lufueti kuthombila e ? Lusi zaba ko ti mfueti ba mu nzo yi dise diama ?

50 Vayi basia sudika ko mambu momo ka bakamba.

51 Buna wuyenda yawu ayi wuvutuka ku Nazaleti. Wuba tumukina. Vayi nguandi wulunda bumboti mambu moso momo mavioka. 52 Yesu wuyunduka mu nduenga ayi mu ntela. Khini yiwombo kamonisa Nzambi ayi batu.

<- LUKA 1 LUKA 3 ->