Klisto niandi Pfumu yi zinganga Nzambi yilutidi kitoko
1 Diambu di mfunu mu mambu tuyolukidi diawu diadi : beto tubeki Pfumu yi zinganga Nzambi yinneni banga yayi, yidi ku Diyilu, va koko ku lubakala lu Kundu ki nkembo ki niandi veka Pfumu Nzambi. 2 Pfumu yi zinganga Nzambi beni widi banga kisadi mu buangu kilutidi nlongo ayi nlongo, nzo ngoto yitungu kuidi niandi Pfumu vayi bika kuidi batu.
3 Yoso-yoso Pfumu yy zinganga Nzambi yeti bieko mu diambu ditambikanga makaba ayi makaba mayoko. Diawu bufueni ti Pfumu yi zinganga Nzambi yayi, mamvandi kafueti ba ayi kima kioki kafueti tambikanga. 4 Enati wuba va ntoto, nganu kasia ba Nganga Nzambi ko, bila vadi ayi banganga Nzambi ziozi zintambikanga makaba boso buididi Mina. 5 Ziawu zieti sadila mfikula ayi kitsuisula ki bima bi diyilu banga Nzambi bu kalubudila Moyize bu kabaka lukanu lu tunga nzo ngoto ti : keba, ngeyo wela vangila bibioso boso buididi kifuani kioki bammonisa ku mbata mongo.
6 Vayi buabu Yesu wuyekodolo kisalu kilutidi mu kitoko bila niandi widi phovi yi nguizani yilutidi kitoko yitungu va zitsila zi kitoko.
Nguizani yikhulu ayi yimona
7 Bukiedika, enati Nguizani yitheti yiba yikambu tsembolo nganu kadi mfunu mu viakisa yawu mu nguizani yimmuadi.
8 Vayi bu kasemba, buna wutuba :
Pfumu wutuba : ti bilumbu bilembo yizi
biobi ndiela wizana nguizani yimona
va kimosi ayi dikanda di Iseli ayi dikanda di Yuda.
9Bika sia ti boso buididi Nguizani yoyi
ndiwizana ayi bakulu bawu
mu lumbu kioki ndiba simba mu koko ;
mu kuba totula mu tsi yi Ezipite
bila basia ba bakuikama ko mu Nguizani yama.
Buna ndiba yekula.
Pfumu tubidi buawu.
10Pfumu tubidi ti : mu bilumbu bina, yawu yayi
Nguizani ndiela wizana ayi dikanda di Iseli :
ndiela tula Mina miama mu mayindu mama
ayi ndiela misonika mu mintima miawu.
Minu veka ndiela ba Nzambi awu
ayi bawu bela ba batu bama.
11Kuisi ko mutu wela mona mfunu mu longa ndiandi
voti khomba mu longa khombꞌandi ti :
“Bufueni ngeyo wuzaba Pfumu”
Bila batu boso bela kunzaba :
tona ku muana wu lezi nate
kuidi lutidi mimvu mu bawu.
12Bila ndiela kuba mona kiadi mu zinzimbala ziawu.
Ndilendi buela tebukila ko masumu mawu moyo.
13 Bu katuba ti : Nguizani yimona buna wukitula yoyi yitheti yikhulu. Muaki yoyi yinkitukanga yikhulu ayi yoyi yeti nuna buna yimbanga nduka mu zimbala.
