Un'kaan atàtwɛb akà

Tumàtɛ
Nsɛmà
Un'kaan atàtwɛb akà Tumàtɛ Pɔl kàsön kà isii a 64 - 65 ungö a Yɛsu Klistɔ, u Masɛdwan a Filipe.
Pɔl kàmɛn mpay ntɔn Ikööŋ kàsɛmà nde u Ɛfɛsɔ, anà baar kàyisälà nde anà ba. Mpay ande yà naa u Ɛfɛsɔ yàkäl anà ndwà a nzam a itɛk anà an'lɔɔŋ a loor. Kyakin kàkwen nde muswaŋ isal ande akà mbuur a balàbal, wàŋàbuul mpem, awà kan'kwo mutüüb anà nde ntɔn mukyer isal mulɔŋ Ikööŋ a Nzam.
Isal abi nde kàkyer a Tumàtɛ, un'lɔŋki ande wà lää. Taarànde kàkäl Ungɛlɛki, ngwän kàkäl Un'yudà awà kàbulà un'klistɔ. Pɔl kàkwen naa Tumàtɛ udübà mun a baar a an'lɔɔŋ a loor anà ulɔŋ Ndaa a ndandaa. Baar bàkwen mukyer isal a ikyɛɛŋ, ba ban'sɔɔl isal a ntsà, muswaŋ nkääl a asyääl anà aseey. Tumàtɛ kàkäl umbɛy. Pɔl kàkwen naa baar bàkɔɔn un'bɛy, wɛɛ nde ukäl mbaan.
Un'kaan awà wàŋàyilà abà: - 1.1-2: Mbɔr - 1.3-11: An'lɔɔŋ a bunàbun mà Un'kɔɔn - 1.12-20: Imbäl ande - 2.1-3.13: Mɔ̈ɔ̈ a Ikööŋ - 3.14-4.5: An'lɔɔŋ a loor - 4.6-6.19: Asyääl a Nzam - 6.20-21: Ntsülà.

Mbɔr

1 Mɛ Pɔl, ntööm a Klistɔ Yɛsu unsà nswɛɛŋ a Nzam awà Un'tswää a mɔ̈ɔ̈ abi anà Klistɔ Yɛsu awà làkyän abi.

2 Akà ngye Tumàtɛ, mwan amɛ wàndandaa unsà làkwikilà: Wɛy Taaràbi Nzam anà Mwol abi Klistɔ Yɛsu bapɛ kab angway, ndwääl a nkul anà duu.

Ikyɛɛŋ ntɔn an'lɔɔŋ a loor

3 Mulab nswɛɛŋ kapɛ mɛ umpal kàlwomà mɛ u Masɛdwan, sàkal u Ɛfɛsɔ, ntɔn mutsuŋ baar bamwɛy mukɔɔn alɔŋ ndaa asin 4 anà mukɔɔn alab in'sim anà in'lwaaŋ mpa ifàtsü: mya myàfàtwaal nsyeel a mbaaŋ kikal mulab ukwen a Nzam abà bàfàkwo unsà làkwikilà. 5 Isin a nswɛɛŋ ayi kyà ukwen bàfàfà u mpem aŋàpɔŋà, unsà an'kyän aŋàbwaŋ anà làkwikilà a ndandaa. 6 Bumwɛy bàsàwɛy indiir abi, waa bàdiimà mbwo, bàkyàbulà muyisà in'lɔn ikɔ̈ɔ̈n ndöŋ. 7 Ba bàfàkyey uyɔl naa ba bà alɔɔŋ a Un'kɔɔn, wɛɛ ba bàyöb anki itàkal indiir bàfàtɛn ba, itàkal ntɔn ndaa bàfàkyään ba a uyɔl banswà.

8 Bi ikyàyöb naa Un'kɔɔn wà ubwaŋ isàkal naa wa ban'syääl u mbwo aŋàbwaŋ. 9 Làyöb naa Un'kɔɔn bàkyer anki ntɔn ŋabalàbal, wɛɛ ntɔn aŋunkwɛm anà baar un'tswe ngwal, ntɔn baar mpa bàfàlab in'kɔɔn, baar abye anà mpem a kɔɔrà anà aŋaman'be, ntɔn baar bàfàbɛy Nzam anà indiir in'kyɛɛl, ntɔn baar bàfàdwa bàtaaràba anà bàngwän, ntɔn adwää baar anà 10 baar a ŋingyäy, ntɔn abaal bàfàbir ba a ba anà akaar bàfàbir ba a ba, ntɔn atɛɛl a yà a asɔ anà aŋaloor, ntɔn aŋimbäl a loor anà baar bàfàkyer undiir asin mpa ufàlab an'lɔɔŋ in'kyɛɛl. 11 An'lɔɔŋ amà mà uboo a Làsaŋ Aŋàbwaŋ alà ban'pɛ, alà làfü akà Nzam a làkɔɔ.

An'tɔɔn ntɔn ubwaŋ a Nzam

12 Mɛ kan'fuur an'tɔɔn mbɔɔn akà Mwol abi Klistɔ Yɛsu awà kan'pɛ ngwal aŋàkwo, ntɔn nde kan'si mpem mpal kan'wɛl nde unsà isal ande, 13 mɛ mbuur kàkäl ŋambɛɛy, ŋamɛɛy a nkwaaŋ anà un'too a in'tswe. Wɛɛ nde kan'wem ngyɛb, ntɔn mɛ kàyöbà anki indiir kàkyɛrà mɛ ntɔn mɛ kàkäl anki anà làkwikilà. 14 Kab a ngway a Mwol abi làkäl aŋàsöönà akà mɛ, anà làkwikilà anà ukwen abà amu Klistɔ Yɛsu. 15 Ayi ndaa a làkwikilà ban'kwo baar banswà musà u mpem anà bàkyey ya naa Klistɔ Yɛsu kàyi u mɛɛn ntɔn mutswà bàŋan'be banswà mɔ̈ɔ̈. Mɛ, mɛ in'wà wàtàtwɛb uboo a ba. 16 Wɛɛ ntɔn abà, mɛ ban'wem ngyɛb, naa amu mɛ, mbuur atàtwɛb, Klistɔ Yɛsu uswɛŋ nkääŋ a mpem ande yanswa, asànaa mbaan ntɔn baar bàsàsà làkwikilà amu nde ntɔn mɔ̈ɔ̈ a mbul a in'tye. 17 Akà Mfum a mbul a in'tye, mpa afàkwà, mpa afàmɛnà u mii, awà nde mpɛl Nzam, wɛy nsyäŋà anà làkoo ikäl anà nde ipepey! Abwɛy!

18 Mwan amɛ Tumàtɛ, le nswɛɛŋ amapà mɛ asànaa ngɔɔm bàtɛ itaan ntɔn ngye. Wɛy ndaa ayi ikäl ngwal a ngye unsà ità angye kyà ntsà, 19 kaar làkwikilà anà an'kyän aŋàbwaŋ. Bumwɛy bàkyàpiy an'kyän amà. Abun làkwikilà aba sye làkyàkyà bwà. 20 Uboo a baar abà bà Imɛnɛ anà Alɛksandre abà kàkäb mɛ akà Satanà ntɔn ba bàlɔŋkà mukɔɔn afàbɛy.

1 TUMÀTƐ 2 ->