Un'kaan atàtwɛb akà

Akɔlintɔ
Nsɛmà
Pɔl kàbwaay u Kɔlintɔ isii a mbul an'kwem an'tyen anà an'kwem an'twen aŋitär. Nde kàtöŋ Ikööŋ atàtweb u bul ifàbäm an'swà u Ngɛlɛsi. Ntsü a mbul an'kwem an'tyen aŋinà, utaaŋ awà nde kà Efɛsɔ, nde kàsön ukaan a bwɛlàbwɛl, mutsuŋ ndaa a ngyɛb. Ntɔn yàkäl nsyääl a Angɛlɛki: baar a Kɔlintɔ bàfàsi naa ngwiiy a mɔ̈ɔ̈ a Nzam yà uboo a ngyööb a dudu, itàkal unsà an'yeerà.
Ungö mupà mbɔr, Pɔl kàfuur an'tɔɔn akà Nzam. Nde kàbiil ndaa a un'tüüb anà Klistɔ. Ntɔn mfurà ande, nde wàmulab ndaa unsà mbwo mbɔɔn.
Yàtàtwɛb, nde atɛɛnà ntɔn nkaabà ayà uboo a un'sɛŋ. Nkaabà yan'yà unsà an'kyän an'be amà uboo a isal a antööm, ungö, unsà Làsaŋ Aŋàbwaŋ, kà là ntɔn ndaa an'yeerà a imbuur anki, wɛɛ yà ntɔn mupay Làsaŋ a kulunsi a Klistɔ.
Mbwo yàyweel yà ntɔn mubilà unsà an'kyän a ndaa a ndandaa: Ndaa utà inswem uboo a bɔr, mukyà ntiin u làbay a nsaŋ, mukyer ipasàsɛ.
Mbwo yàtär yà ntɔn mutüüb unsà ngyamàkà anà Klistɔ, mulab ubwaŋàbwaŋ nkääl mubwaay uboo a Ikööŋ a ngyamàkà, mukal balàbal anà baar banswà, aŋunaaŋ itàkal aŋàlàmbwà.
Mbwo yà ngöngö yà ntɔn ngwiiyà a akü. Nsɛmà a ya yanswà yà musà làkwikilà akà Yɛsu awà kàkü anà kàwiyà. Abun, Pɔl akwen un'tüüb anà mpɛɛl a an'kab ntɔn atɔŋ abaal anà bakaar abà u Yɛlusàlɛm. Ntsü yanswà Pɔl kàsi Yɛsu kusà. Akà Klistɔ nde afàwal ndaa kan'kwo nde mukyer anà mukɔɔn akyer. Mukyà kwɛl, uboo a Ngɛlɛsi, ndür iswaŋà anki ndür mpɛl, wɛɛ ndür yanswà, baar banswà bà un'tüüb: mbulan'tär, ikööŋ a un'sɛŋ. Iswaŋà naa ndür a Klistɔ iyàbulà yà làkoo. Pɔl akwen un'tüüb aŋàbwaŋ a Klistɔ anà Ikööŋ.

Mbɔr

1 Pɔl, bun'bel mukal ntööm a Klistɔ Yɛsu, unsà ukwen a Nzam, anà un'tɔŋ abi Sɔstɛn.

2 Akà Ikööŋ a Nzam akyà u Kɔlintɔ, akà baar ban'si an'kɔɔ unsà Klistɔ Yɛsu anà babel mukal aŋikyɛɛl, mbwo mwɛy anà baar banswà bàfàtà ikɔb a Mwol abi Yɛsu Klistɔ din, Mwol aba anà wàbi, kà ikal kyanswà, 3 akà bɛ, kab a ngway anà duu byan'fà akà Nzam, Taaràbi, anà akà Mwol Yɛsu Klistɔ.

Indiir aŋàbwaŋ bàwɛl amu Klistɔ

4 Mɛ in'fàfuur an'tɔɔn akà Nzam amɛ taaŋ lanswà ntɔn bɛ, ntɔn kab a ngway a Nzam alà bàlapɛ amu Klistɔ Yɛsu. 5 Ntɔn, bɛ làkäl amu Nde, bàŋàyɔl a in'naaŋ myanswà, amu ndaa yanswà anà amu ngyööb yanswà. 6 Imbäl akyà bàtɛ ntɔn Klistɔ kyàŋàtsim amu bɛ, 7 lalan, akà kab làmwɛy là kab a ngway làlakɔ̈ɔ̈n anki, apaa làyadilà bɛ mɛɛy a Mwol abi Yɛsu Klistɔ. 8 Nde sye ayàlapà ngwal tii u ntsüü, ntɔn bɛ làkɔ̈ɔ̈n akal anà an'pɛl kà ilä a Mwol abi Yɛsu Klistɔ. 9 Nzam wà wàlää, Nde kàlabel mukal un'tüüb anà Mwan ande Yɛsu Klistɔ, Mwol abi.

Nkaabà uboo a Ikööŋ

10 Atɔŋ, mɛ amàlabɔɔn, kà ikɔb a Mwol abi Yɛsu Klistɔ: bɛ banswà làkäl mun mwɛy, nkaabà ikɔ̈ɔ̈n akal uboo a bɛ. Làkäl bàŋàtüüb unsà mpem mwɛy anà unsà an'kyän an'mwɛy. 11 Abun, atɔŋ amɛ, baar a ndwà a Klɔwɛ ban'sam naa bɛ làbye anà an'sye uboo a bɛ. 12 Mɛ in'tɛn naa: umwɛy uboo a bɛ atɛɛnà naa: « Mɛ, mɛ in'wà mbuur a Pɔl. » Wumwɛy naa: « Mɛ in'wà mbuur a Apɔlɔs. » Wumwɛy sye naa: « Mɛ in'wà wà Sɛfas. » Wumwɛy naa: « Mɛ in'wà wà Klistɔ. » 13 Nkye Klistɔ wàŋàkaabà? Nkye Pɔl bun'bɛɛrà u kulunsi ntɔn bɛ? Nkye bɛ ndüümà làwɛl kà ikɔb a Pɔl?

14 Mɛ an'fuur an'tɔɔn akà Nzam naa mɛ kàdümà anki akà mbuur mwɛy uboo a bɛ, nà Krispus anà Gäwus mpɛl. 15 Kyakin, akà mbuur mwɛy ukwe anki mutɛn naa bàladümà kà ikɔb amɛ. 16 Aa ndandaa, mɛ kàdümà sye ywar a Stɛfanas, mɛ in'manà anki naa mɛ kàfàdümà mbuur asin. 17 Ntɔn Klistɔ kan'töm anki mudümà, wɛɛ mukyään Làsaŋ Aŋàbwaŋ, ukɔɔn alab an'yeerà a ndaa, ntɔn kulunsi a Klistɔ làkɔ̈ɔ̈n amɛnà undiir a bunàbun.

Yɛsu Klistɔ, ngwal anà an'yeerà a Nzam

18 Ntɔn, ndaa a kulunsi yà ukɔŋ akà baar ban'diimà mbwo, wɛɛ akà bi baar ibà u mbwo a ntsweel a mɔ̈ɔ̈, ya yà ngwal a Nzam.

19 Ntɔn bàsön naa:

« Mɛ in'yàdwa an'yeerà a aŋayeerà,

mɛ in'yàpiy un'yɛnà a aŋun'yɛnà. »

20 Abun, wàken ŋan'yeerà? Wàken un'lɔɔŋ a Un'kɔɔn? Wàken un'yweer a taaŋ alà? Nkye Nzam kàbuul anki an'yeerà a mɛɛn ukɔŋ?

21 Abun, ntɔn mɛɛn, u mbwo a an'yeerà, màyöb anki Nzam unsà an'yeerà a Nzam, yà unsà ukɔŋ a an'lɔɔŋ waa Nzam kàtsül mutswà mɔ̈ɔ̈ a baar abye anà làkwikilà. 22 Ayudà bàlɔɔmà idiim, wɛɛ Angɛlɛki bàleŋà an'yeerà. 23 Wɛɛ bi, bi ifàlɔŋ Klistɔ bàbɛɛrà u kulunsi, isin a mbweel ntɔn Ayudà, ukɔŋ ntɔn baar mpa abà Ayudà. 24 Wɛɛ, akà baar kàbel Nzam, itàkal Ayudà, itàkal Angɛlɛki, Klistɔ wà ngwal a Nzam anà an'yɛɛrà a Nzam. 25 Ntɔn undiir awà ukɔŋ a Nzam wàŋàsöönà an'yeerà a baar, undiir awà gyɔ̈ɔ̈là a Nzam wàŋàsöönà ngwal a baar.

26 Làler, atɔŋ, bɛ làbà bànà, bɛ baar làwɛl mbeel a Nzam: uboo a bɛ, itàkal abyääl mbɔɔn u mii a baar, itàkal aŋangwal mbɔɔn, itàkal baar a ywar aŋàbwaŋ mbɔɔn batɛy. 27 Wɛɛ undiir awà ukɔŋ u mɛɛn, Nzam kun'sɔ̈ɔ̈l ntɔn musà aŋayeerà lingyoomà, undiir a gyɔ̈ɔ̈là u mɛɛn, Nzam kun'sɔ̈ɔ̈l ntɔn musà aŋangwal lingyoomà. 28 Indiir a bunàbun anà ikɔ̈ɔ̈n ndöŋ, indiir ikɔ̈ɔ̈n paa, Nzam kàsɔ̈ɔ̈l bya ntɔn mutyey ntal a indiir abyà paa. 29 Abun, akà mbuur mwɛy ukwe anki mukyey uyɔl kusà a Nzam. 30 Yà u mbwo a Nde waa bɛ làbà amu Klistɔ Yɛsu, awà kàbulà ntɔn bi an'yeerà màfü akà Nzam, balàbal, un'kyɛɛl anà ntsuuŋà, 31 lalan, asànaa itɛɛnà Ndaa Aŋàsɔn naa: « Mbuur usàkwen muswaŋ ngaal, wɛy nde uswɛŋ ngaal unsà Mwol. »

1 KƆLINTƆ 2 ->