LOMA
Faulo yana kiluma me Loma 'waidie
'Eba kiavemageta
Lubulubu de'e Faulo i kilumi tovetumaganavo i miamia Loma faifaidi. Tutuyanina Faulo i miamia Kolinita, lubulubu de'e i kilumi, mulieta tamu vavine 'adi wagava Fibi i veledi i naweni 'atamana bwaikina Loma, 'awalawa Itali nageneye. Loma 'waineye toveimea bwaikaotogina i miamia 'ana wagava Sisa.
Faulo nuanuana i na ve 'waidie, tomotoga matatabuda ta sakona Yaubada mataneye, siwe kebu 'ada fata ta na ve'atumai yada folova 'alo yada sauluva 'atumaidi 'waidiega. 'Ai'edi ta na vetumagana Iesu Keliso 'waineye, Yaubada i na 'ive'atumaida wata yada sakona i na nuatavunidi.
Faulo nuanuana i na nago Loma, tovetumaganavo bei i miamianiga i na kiavetoketokedi. Tovetumagananidi 'ifwaidi me Diu we'e 'ifwaidi me Kuliki. Lubulubu nageneye Faulo yana nago wata 'ana 'aivaita faifaidi i veifufu. 'Ana 'idi side bani'odi.
Vona-vekaiwa wata lubulubu de'e inagena 'ana nuanua. 1:1-17
Tomotoga fueda tosakona bega Yaubada yana vematavuloga ta na veluagai. 1:18-3:20
Kebu 'ita'ita'i ta da veluagai veimea 'adi vematayakayaka 'waidiega, we'e mogitana Keliso 'ana vetumagana 'wainega. 3:21-4:25
Miave'itubama Keliso taiadi 'wainega mia 'ivauna wata miamia-vagaina ta na veluagai. 5:1-8:39
Me Isileli tovedumwe'ai'ai siwe 'awaie Yaubada i na veviladi yana 'Aila'a 'waineye. 9:1-11:36
Sauluvanidi 'ida tovetumagana 'ada laubwaina faifaina. 12:1-15:13
Faulo yana nuanua, yana 'alanuai wata yana velu'ase'ase. 15:14-16:27

1 Ekwavo, yau Faulo, Iesu Keliso yana tofolova, a vekaiwa 'waimie. Basenadi Yaubada i venua'ivineku veimea i veleku a vetomata'aulele Valana 'Atumaina faifaina. 2 Valanina 'Atumaina faifaina basenadiotoga Yaubada i vona'awaufaufa, yana tolu'ivonavo i kilumi yana Buki nageneye. 3-4 Valanina Natuna faifaina, taunina 'ada Toveimea Iesu Keliso i vetomotogaotoga i tubuga Kini Devida 'ana wauma 'wainega. Tutuyanina i wafaga, 'Anu'anunu Magemagetana yana toketokena 'wainega i tovoi-vaitugana, bega ta na 'asetai taunina mogitana Yaubada Natuna. 5 Keliso 'wainega Yaubada ma yana nuakalikali i tauyema 'a vetomata'aulele faifaina, bega yama folova 'wainega tomotoga 'aila'a tulina tulina 'waidiega 'ifwaidi i na vetumagana 'waineye wata i na vematayakeyakeni nika 'ana wagava i na vebwaika. 6 'Omi tovetumagananidi taiadi Yaubada i venua'ivinemi bega 'omi Iesu Keliso yana tomotoga.

7 Bega a kilukiluma 'omi 'wa miamianiga Loma 'waineye, Yaubada i nuakalikaliemi wata i venua'ivinemi bega 'omi yana tomotoga mogitana.

A vevelu'ui faifaimi, nuanuaku Tamada Yaubada wata 'ada Toveimea Iesu Keliso ma yadi nuakalikali i na vevesauluva 'atumaina 'waimie wata nuanua bikana mia 'atumaina taiadi i na velevelemi.

Faulo nuanuana Loma tovetumagana i na fogedi

8 Nagami faifaimi a vekaiwa Yaubada 'waineye Iesu Keliso 'ana wagavayega, fai 'wa vetumaganaga Iesu Keliso 'waineye bega tomotoga fuedi 'awalawa matatabuna 'waidie valami i 'asetai. 9 Yaubada i 'asetaku mogitana, tutuya fuedi yaku velu'ui 'waidie a nuanuanimi. Yaubada 'waineye tauniku a tauyeku mogitana a vetofolova bega Natuna Valana a lulu'ageyeni. 10 Wata a vevelu'ui nuanuaku 'ai'edi tutuya de'e 'waineye Yaubada nuanuana, i na tauyeku 'aku fata a na wai 'waimie. 11 Nuanuaku bwaikina a na wai bega tamu nuakalikali 'wa na veluagai 'Anu'anunu Magemagetana 'wainega, nuakalikalinina yami vetumagana i na kiavetoketokedi. 12 Yaku nuanuananina side bani'odi, yada vetumagananidi 'waidiega ta na ve'ivaivaita.

13 [a]Ekwavo, nuanuaku 'wa na 'asetai tutuya fuedi igodi a da viwai nika nani 'ifwaidi i vevesitagoniku. Nuanuaku a da folofolova 'awasasamie bega yaku folovanina 'wainega vuaga a da 'iseni 'ifwaidi i da vetumagana Iesu Keliso 'waineye, bani'odi basenadi a folova mali tomotoga kumanidiavo kebu Diu 'waidie nika i vetumagana.

14 Fai folovanina Yaubada i veleku, i lubwaineku a na lalau'age Iesu Keliso valana faifaina, tomotoga matatabuna 'waidie. Vona mogitana, 'atamana bwaikidi 'adi tomia wata 'atamana siaidi 'adi tomia 'waidie, taunidi ma yadi 'aseta wata taunidi kebu i da sikulu, matatabudi 'waidie a na lalau'age. 15 Bega nuanuaku bwaikina a na wai Loma 'waineye, Iesu Valana 'Atumaina 'waimie a na lau'age.

Keliso Valana 'Atumaina toketokena

16 [b]Valananina 'Atumaina faifaina kebu a da ve'awamayamayaga, fai kebu nani mweanaga. Keliso valana faifaina Yaubada yana 'eda'eda toketokena, egavo i na vetumaganeni i na 'ita'ita'iedi sakona 'waidiega. 'Ima me Diu nagami Valanina 'a nogai, mulieta mali tomotoga kumanidiavo kebu Diu. 17 [c]Valananina i veveda Yaubada i 'ive'atumaida nika yada sauluva i tonova mataneye vetumagana'ava 'wainega. Avinodi 'ida tosakona, fai ma yada vetumagana taunida ta tauyeda Keliso 'waineye bega Yaubada i awave'atumaieda. 'Ada 'ive'atumai Yaubada mataneye faifaina basenadiotoga i kilumi Yaubada yana Buki nageneye i vo,

Egavo yadi vetumagana 'wainega yadi sauluva i na tonova Yaubada mataneye,

mia 'atumaina wata miamia-vagaina i na veluagai.”

Tomotoga matatabuda ta sakona Yaubada mataneye

18 Yaubada yana nuasako tosakona 'waidie 'akonadi i veda abamayega. Fai tomia fwayafwaya fuedi Yaubada i vevedumwe'ai'aieni wata sakona tulina tulina i 'i'idewadi 'adi vematavuloga i na veluagai 'wainega. Yadi sakonanidi 'waidiega Yaubada yana nuanua tonovina i lulutamubodai tomotoga 'ifwaidi 'waidiega. 19 Naninidi tomotoga 'adi fata i na 'asetadi Yaubada faifaina mageseye 'waidie, fai Yaubada taunina i sivemagesedi. 20 Fwayafwaya 'ana 'idewavau 'wainega i maiga 'asiau, Yaubada yana toketokena i 'eno'eno-vagaina wata yana sauluva magemagetana mageseye. Avinodi tomotoga sauluvanidi kebu 'adi fata i na 'isaotogi, siwe i lubwainedi 'ana 'idewadewa 'waidiega Yaubada i da 'isa'inanai. Begaidi kebu 'adi fata i na vo, Yaubada 'a bavuyeni.”

21 [d]Vona mogitana Yaubada i 'asetai, i lubwainedi i da 'odu'odu wata i da vevekaiwa yadi Yaubada 'waineye siwe i baila, nika nuadi 'anigaugaudi fai nua'avadi wata nuadi dududubalidi. 22 Taunidi i awa'ai'aidi igodi tonuamageta, we'e mogitana yadi vona 'ana nogaya tove'wava'wava. 23 [e]Yaubada miamia-vagaina wata magemagetana 'ana 'odu'odu i baileni, we'e ma'itufa i 'odu'odu kumaea 'waidie, 'adi 'isa'isa bani'odi tomotoga-'avo'avovo, manuga, 'aisaya wata 'aisaya daledaledi. 24 Begaidi Yaubada i 'iawelovedi bega sauluvanidi sakoidi nuanuadi, i na 'i'idewadi. Sauluvanidi bunu 'ana nuanua 'eba bunumayaga, tauni'avadi tomogodiega i sakosakona. 25 Yaubada 'ana 'aseta i baila, ma'itufa taunidi i tauyedi nani-vekavekali 'waidie. Yaubada 'ana 'idewadewa 'waidie i 'odu'odu, we'e mogitana tomotoga i da 'odu'odu 'ada To'idewadewa 'waineye. I lubwaineda matatabuda ta na subisubiai, kebu ta na 'ailove. Vona mogitana, yaku nuanua bani'odi.

26 Fai tomotoga nuanuadi sakona, Yaubada i baila i tauyedi bunu 'ana nuanua 'eba bunumayaga 'waidie. Wata vevine bani'odi, sauluvanidi i lubwainediga i baila, vevine'ava i lulu'avo'avovo. 27 Wata bani'odi iaveta nagi i baila, nuanuaotogidi iaveta'ava i na lulu'avo'avovo. Iaveta'avadi i sakosakona 'eba bunumayaga bwaikaotogina, begaidi vematavuloga i veveluagai tomogodi wata nuadi 'waidie. Vematavuloganina i veveluagaiga i lubwainedi, yadi sauluva sakoidi 'adi tutula.

28 Wata fai Yaubada 'ana 'aseta 'waidie i venani-'avo'avovo kebu faifaina i da awavemogitana, bega Yaubada i 'anivelenedi yadi nuanua 'wavadi 'waidie, sauluvanidi kebu i da lubwainediga, i 'i'idewadi. 29-31 Sakona tulina tulina nuadi i 'ewadi, bani'odi kukua 'adi nuanua 'waidie i vebwaika, bunu 'ana nuanua sakoidi nuadi i 'ewai, i veve'unumagigi, i luluvewafa, i veveta'ata'ala, i vevekali wata i totolive'eda nuanuadi vita i na veveluagadi. Wata i vevebonaivo, i awavesako, Yaubada i vevedumwe'ai'aieni, i manimanini-'avo'avovo, i nunualaka wata taunidi i awa'ai'aidi. Tutuya fuedi nani sakoidi 'adi nuanua 'waidie i vevebwaika, tamadiavo wata inadiavo yadi veimea kebu nuanuadi, yadi nuanua dudubalidi, yadi vona'awaufaufa i geugeudi, kebu i da nunuakalikali wata kebu i da 'i'isanuakalikali. 32 Yaubada yana veimea i 'eno'eno, tomotoganidi bani'odi i vevesauluvediga 'ana tutula i na wafaotoga. Veimeanina i 'asetai siwe i kwayekwayega. Wata yadi sakona i 'i'imoso'ieni, tomotoga 'ifwaidi i nunua'anidi bega ma fuedie i sakosakona.

LOMA 2 ->