1 Wata a ꞌisanago, tamu anelose toketokeotogina a ꞌiseni i obuobuma abamega. Waowa i ꞌavui i mimaieni, ꞌunuꞌununeye abavole i vetovoia, maigina mataududulina inala baniꞌodi, weꞌe ꞌagena ꞌwa da vo baniꞌodi ꞌai i da luꞌaogi. 2-3 Nimaneye lubulubu nunumina siaina siwe i luyawagi. ꞌAgena ꞌana ꞌatagi i ba eyage, ꞌana wama ꞌavale, i toke i vegole ꞌwa da vo kuvakuvala butuꞌaina. I vegoleꞌaꞌavana, nika tomuyoana 7 i dududi ꞌasaꞌaiana bonana i tutuli. 4 Tutuyanina i dududi i ꞌaꞌavana igodi yadi vona a da kilumidi siwe tamu bona a nogai abamega i voneku i vo, Naninidi tomuyoana 7 i voneyediga nuamuye i na ꞌenoꞌeno, kebu ꞌu na kilumidi.”

5-6 Anelosenina, kumanina i ba eyage wata ꞌavale nimana ꞌana ꞌatagi i silakai i vegole i vo, A vona mogitana Yaubada ꞌana wagavayega, kumanina miamia-vagaina, abama, fwayafwaya, eyaga i ꞌidewadi wata nani matatabuna. Kebu wata ꞌa na lulukamata. 7 Tutuyanina anelose ꞌana ve-7 yana evulega i na yuvei, Yaubada yana nuanua givagivadi i na veꞌaꞌava-vagasedi, baniꞌodi basenadiotoga i voneyedi yana tofolovavo ꞌwaidie, kumanidiavo i vetoluꞌivona faifaina.”

8 Bonananina a nogaiga abamega wata i vona-vaitugana ꞌwaikuye i vo, ꞌU na nago anelosenina i baga eyage wata ꞌavale, nimanega lubulubu luyawagina ꞌu na ꞌewai.”

9 I vonaꞌaꞌava, a nago ꞌwaineye a voneni a vo, Lubulubunina siaina nuanuaku ꞌu na veleku.” I voneku i vo, ꞌU na ꞌewai ꞌu na ꞌania, ꞌawamuye ꞌu na ꞌalatonoviga dibidibina baniꞌodi maiꞌawa, weꞌe bola kamomuye yuyuna.” 10 Bega a nago lubulubunina a ꞌewai nimanega, a siꞌauleni a ꞌalatonovi dibidibina ꞌwa da vo maiꞌawa. Siwe tutuyanina a tononi kamoku i ꞌaiova. 11 A ꞌaniꞌaꞌavai wata i voneku i vo, ꞌU na nago ꞌu na luꞌivona-vaitugana Yaubada yana Vona wata avaꞌai saiꞌafoga i na souyediga tomotoga yadi toveimea taiadi ꞌwaidie. Tomotoganidi bonadi tulina tulina i miamiani ꞌawalawa ꞌaitamogana ꞌaitamogana ꞌwaidie.

<- VE 9VE 11 ->