Luke kumanina kebu Iesu yana tovetutuyamavo 'adi 'aila'a 12 'wainega wata kebu tomogo Diu, taunina tomogo Kuliki. We'e yana 'atamana voke Anitioki 'awalawa Silia nageneye. Nagami yana folova viga 'adi to'ive'atumai we'e bona Kuliki i 'asetai bega i kilumaga 'wa da vo to'aseta mogitana.
Buki de'e Luke 'ana kilukiluma kumekumetana, bukinina i kilumi bega me Kuliki Iesu ifufuna i na 'asetai wata i na nua'ewa ifufunina 'wainega. Bega yana veifufu 'waidie mali tomotoga kumanidiavo kebu Diu i veifufuyedi, nika ta 'asetai Iesu i mai fwayefwayeye tomotoga matatabuda 'ada 'ita'ita'i faifaina. Iesu yana vetomotogaotoga wata yana nuakalikali i veifufuyedi. Yana nuakalikalinina kebu luvetubama 'aisena faifaina, wata tomotoga 'aitamogana 'aitamogana faifaida. Wata side naninidi faifaidi i veifufu, Yaubada 'ana subia faifaina, 'Anu'anunu Magemagetana yana toketokena, velu'ui, tovewekowekoma wata tove'ai'aiwabu.
Luke kebu taunina matanega Iesu yana folova i da 'isedi, siwe i lauala-dewa bega yana 'aseta i 'ewai Iesu 'ana to'isa 'waidiega. 'Ai'edi yana kilumanina ta na lu'iawawai nika Toveimea Iesu yana vona 'ana 'aseta mogitana ta na nuamagetai.
1
1-2 Iaku Tiofilo, 'omu toveimea bwaikimu.
'Akonadi 'u 'asetadi nani 'ifwaidi i souyediga 'waideye tutuyanina Iesu i miamia fwayefwayeye. Tomotoga fuedi naninidi 'eba velamuyega i 'isedi i nagoga 'eba ve'a'ava 'waineye, 'akonadi i lu'ivoneyedi. 'Ifwaidi tomotoga nuanuadi i na kiluma Iesu valana faifaina bega i nagoi i na veifufu tomotoganidi basenadi Iesu taiadi i folofolovaga 'waidie, bega ma yadi 'aseta 'adi fata i na kiluma-'atumaia. 3 Yau basenadi wata 'asiau tomotoganidi yadi kiluma a lu'iawawa-dewadi, begaidi nuanuaku Iesu Valana matatabuna a na kiluma-vedulei nika 'ana fata 'u na lu'iawawai. 4 Basenadi vala'avadi 'u nogaidi, we'e yaku kiluma de'e 'wainega 'u na lu'iawawaiga 'u na 'aseta-'atumaia wata 'u na ve'awamogitana.
Elisabeti yadi miana
5[a]Side bani'odi. Tutuyanina Kini Elodi i veveimea 'awalawa Iudia 'waineye, tamu me Diu yadi tovelomu i miamia 'ana wagava Sekalaia. Taunina Ebaya yana 'aila'a taiadi i folofolova Vanuga 'Eba Velu'ui 'waineye. Yana vavine 'adi wagava Elisabeti, 'adi 'ailuga Eloni 'ana wauma 'wainega. 6 Sekalaia wata Elisabeti yadi sauluva tonovina Yaubada mataneye, yana ve'etoboda wata yana veimea matatabuna i vevematayakeyakedi. 7 Elisabeti kakalidi i vemo'ai wata Sekalaia i ve'auvea begaidi kebu tamu natudiga.
8 Tamu tutuya Sekalaia ma yana 'aila'a tovelomu yadi tutuya i veluagai, i folofolova Vanuga 'Eba Velu'ui 'waineye Yaubada mataneye. 9 Tovelomu yadi folova 'ana awave'eda'eda 'wainega, Sekalaia i venua'ivineni bega i na luku 'Auvea yana tutudaba tabutabuna 'waineye, vane magaina 'atumaina i na kabuni. 'Eda'edanina 'wainega kileu ma 'adi wagava i vevefolovedi bega tamu tovelomu i na sivemageseni folovanina faifaina. 10 Tutuyanina vane i kabukabuni, me Diu 'aila'a 'akonadi i va'auta tanotanoge i vevelu'ui. 11 Nika tamu 'Auvea yana anelose i souyeni i tovoi 'atagiega 'eba velomu lilivaneye. 12 Sekalaia i 'iseni nuana i vogani i kololo-'afo'afo. 13-14 Siwe anelosenina i vo, Sekalaia, kebu 'u na kolologa. Yaubada 'akonadi yamu velu'ui i nogai. Yamu vavine natumu iavetana i na venatuneni 'u na goleni Ioni bega 'omu ma yamu vavine wata tomotoga fuedi taiadi 'wa na sosoana yana tubuga faifaina. 15[b]'Wa na sosoanaga fai natumunina bola kumanina tomogo bwaikina Yaubada mataneye. We'e ufa toketokena bani'odi oine kebu i na yemudiga. Tutuyanina i na tubuga bei 'Anu'anunu Magemagetana i na age-vagaseni. 16 Wata taunina me Isileli fuedi 'adi tovagavai, i na miedi 'Auvea yadi Yaubada 'waineye. 17[c]Taunina 'awaie kebu i na kolologa, ma yana venuafoufa'ala i na vetomata'aulele 'Auvea faifaina, yana toketokena wata yana nuanua bani'odi Yaubada yana tolu'ivona Ilaitia. Yana lau'age 'wainega kwakwama tamadiavo yadi nuanua i na siviladi bega natudiavo i na nuakalikaliedi. We'e tovedumwe'ai'ai i na nuaviladi sakona 'wainega, ma'itufa nuamageta i na 'ewai tomotoganidi yadi sauluva tonovidi 'waidiega. Side bani'odi natumu tomotoga i na 'idewadi 'Auvea yana mai faifaina.”
18 Sekalaia anelose i velutolieni i vo, Bani'odi a na munega bega a na 'asetai, 'u vonavona mogitana 'alo 'u vevekali? Yau a ve'auvea wata yaku vavine i vemo'ai. Tamu 'eba 'isa 'u da veleku.” 19[d]Anelosenina i vo, Yau Gabalieli, Yaubada yana tofolova, tutuya fuedi mataneye a tovotovoi. Kumanina i vetuneku vala 'atumaina a mieni a lulu'ivoneyeni 'waimuye. 20 Fai yaku vona kebu 'u da vetumaganeniga, tutuya de'e ma'awa'ulumu 'ana tugusa natumu i na tubuga bei 'u na welava-vaitugana. Valanina a vonemuga, 'awaie 'ana tutuya mogitana i na veluagai nika i na souyeni.”
21 We'e tomotoga matatabudi tanotanoge i lulukamata 'awasasa manamanawena, nuadi i voganidi i vo, Awale Sekalaia yana mia i vemanawe Vanuga 'Eba Velu'ui nageneye?” 22 Tutuyanina Sekalaia i souyeni kebu 'ana fata i na welava fai 'awana i ve'u'u'u bega tomotoga i 'asetai 'ana ve 'wainega tamu nani i 'iseni tutudaba tabutabuna nageneye. Begaidi nimanega i veifufu 'waidie.
23 Mulieta Sekalaia yana folova 'adi 'aiata i ve'a'avadi i vilai i nago yana vanuge. 24 'Aiata 'ifwaidi i 'a'ava, mulieta Elisabeti i miana begaidi kebu i da yabayaba i miamia yadi vanuge weta'i 'adi 5. 25 Begaidi Elisabeti i vo, Tutuya de'e Yaubada i nuakalikaliema bwaikina. I 'ivaisema bega 'a miana, kakala 'ana bunumayaga 'waimega i 'a'ava.”
Iesu yana tubuga i lu'ivoneyeni
26 Elisabeti yadi miana 'ana weta'i 'ana ve-6 'waineye, Yaubada yana anelose Gabalieli i vetunei abamayega i mai 'atamana Nasaledi 'awalawa Galili nageneye. 27[e]I maiga tamu vavine ne'e'elina 'ana wagava Meli 'waineye, 'akonadi i veakutagoni tamu tomogo 'ana wagava Iosefa faifaina. Tomogonina Kini Devida 'ana wauma 'wainega i souyeni. 28 Anelose i mai i vo, Kaiwa Meli, 'Auvea 'amu 'weabu i nuakalikaliemu bwaikina.” 29 Meli nuana i vogani bega nuana i 'ivina vonanina 'ana 'aseta bani'odi. 30 Anelosenina i vo, Meli, kebu 'u na kolologa, Yaubada yana nuakalikali bwaikaotogina 'waimuye i 'eno'eno. 31[f]Begaidi a na vonemu, sai'afoga 'u na miana mulieta natumu iavetana 'u na venatuneni 'ana wagava 'u na goleni Iesu. 32-33 [g]Taunina tomogo bwaikaotogina, tomotoga i na 'ina'inanai i na vo, Yaubada Tabwaotogineye Natuna.’ We'e 'Auvea Yaubada i na silakai i na ve-kini tubuna Devida bani'odi, wata Iakobo 'ana wauma taunidi me Isileli i na veveimea-vagata 'waidie we'e yana 'Eba Veimea kebu 'ana 'eba ve'a'avaga.” 34 Meli anelose i voneni i vo, Bani'odi a na munega a na miana, fai yau ne'e'eliku kebu tamu aitoi taiadi a da veluaga?”
35 Anelose Meli yana vona i tutuli i vo, 'Anu'anunu Magemagetana i na agemu wata Yaubada yana toketokena i na ve'i'wa'uyemu. Begaidi kwamana 'u na venatuneni magemagetana, tomotoga i na 'ina'inanai i na vo, Kumanina Yaubada Natuna.’ 36 'U na nuani nibaimu Elisabeti i vo, 'A kakala wata 'a vemo'ai, kebu 'ama fata 'a na venatunaga.’ Siwe 'akonadi yadi miana 'ana weta'i 6 i veluagai. 37[h]Fai nani matatabuna Yaubada 'ana sala.”
38 Meli i vo, Yau 'Auvea yana tofolova, ava'ai 'u voneyeniga 'waikuye 'ana mogitana i da souyeni.” Nika anelose Meli i 'iaweni.
Meli i nago Elisabeti i fogedi
39-40 'Aiata 'ifwaidi i 'a'ava Meli i 'idewadewa nika i tauya i nago 'oya siaidi 'waidie 'awalawa Iudia nageneye Elisabeti i na fogedi. I le'wa 'atamananina bei Sekalaia i miamia i luku yana vanuge i vekaiwa Elisabeti 'waidie. 41-42 Tutuyanina Elisabeti Meli yana vekaiwa i nogai kamodie kwamana i feto bwaikina. 'Anu'anunu Magemagetana Elisabeti i agedi mogitana begaidi bonadi bwaikinega i vo, Nibai, Yaubada i nuakalikaliemu bwaikina, vevine matatabuda 'waidega kebu tamu aitoi bani'odi 'omu'e. Natumunina 'u na venatuneniga Yaubada ma yana nuakalikali i na vesauluva 'atumaina 'waineye.” 43 Wata Elisabeti i vo, Nani 'atumaiotogina 'waimeye fai yama 'Auvea inana 'u mai 'ama foge faifaina. 44 Tutuyanina yamu vekaiwa 'a nogai, kwamana kamomeye ma yana sosoana i feto bwaikina. 45 We'e 'omu, 'Auvea yana vona 'u vetumaganeni 'ana mogitana i na souyeni, 'eba sosoana 'waimuye.”
Meli yana lei-subisubia
46 Meli i vo,
Nuakuyega 'Auvea a subisubiai.
47 Yaubada taunina 'aku To'ita'ita'i, faifaina 'anu'anunuku i sosoana-'afo'afo.
48[i]Yau kwamana siaiku ma yaku nuaobu a vetofolova-maimaiga 'waineye, siwe i nunuave'aviniku.
'Asiau wata tutuya i mimai 'aila'a 'aitamogana 'aitamogana faifaiku i na vo, Mogitana Yaubada i vesauluva 'atumaina 'waineye.’
49 I na vonaga fai Yaubada Toketokena, kumanina magemagetana,
egavo Yaubada i veve'ililibuyeniga i 'i'isanuakalikaliedi.
51 We'e tomotoganidi i nunualakaga wata taunidi i awa'ai'aidiga,
nimana yana toketokena 'wainega i luveyavulidi.
52[j]Toveimea toketokedi yadi 'eba mia 'ai'aiwabudi 'waidiega i siobuyedi,
we'e tonuaobu i silakaidi.
53 Wata tovewekowekoma, nani 'atumaidi i veledi bega i sososoana,
we'e 'ai'aiwabudi i veviladi nima'ava'avadi, kebu tamu ava'ai i da veledi.
54-55 [k]Yaubada i vona'awaufaufa tubudavo 'waidie kebu i na bailedi.
Vona'awaufaufanina Ebelamo 'waineye wata 'ana wauma 'waideye kebu i na 'a'avaga i na 'eno-vagata.
Begaidi 'ida me Isileli yana tofolovavo i 'ivaiseda, kebu i da venuafanida
we'e mogitana i 'i'isanuakalikalieda.”
56 Meli yana vona i 'a'ava, bei Elisabeti taiadi i miamia bani'odi weta'i 'aitonu, mulieta i vilai i nago yana 'atamane.
Ioni Tobafitaiso yana tubuga
57 Meli i nago mulieta Elisabeti i vebutudi fai yadi tutuya i veluagai, i venatuna natudi iavetana i tubuga. 58 Tutuyanina ediavo wata yadi 'aila'avo valadi i nogai 'Auvea i 'isanuakalikaliediga, ma fuedi i sosoana.
59-60 [l]Mulieta kwamana yana tubuga 'ana 'aiata 8 i veluagai, ediavo wata yadi 'aila'avo i va'auta bununa i na boboi me Diu yadi sauluva bani'odi. Igodi nuanuadi i na goleni tamana wagavina Sekalaia, siwe inana i talaboda i vo, Kebu, ta na goleni Ioni.” 61 Siwe ediavo i vo, We'e wagavanina kebu tamu aitoi yami 'aila'a nageneye 'ana wagava.” 62 Begaidi nimadiega Sekalaia i velutolieni ava'ai wagavaga nuanuana i na goleni.
63 Sekalaia nimanega i vonedi nuanuana lubulubu i na mieni bei wagava i na kilumi. Lubulubu i 'ewai i kilumi i vo, 'Ana wagava Ioni.” Fuedi i 'iseni nuadi i voganidi. 64 Tutuyanina kwamana 'ana wagava i kiluma'a'avai, nika Sekalaia meana i tonova wata i welava-vaitugana, Yaubada i subiai. 65 Enavo i 'iseni nuadi i voganidi, bega valana i lulu'ivoneyeni 'oya 'ana tomia 'waidie 'awalawa Iudia nageneye. 66 Tomotoganidi kwamana valana i nogaiga nuadi i 'ivina wata tauni'avadi i velutoli i vo, Bola kwamana yana folova ava'ai?” Bani'odi i voneyediga fai 'Auvea yana nuanua wata yana toketokena 'waineye i 'eno'eno.
Sekalaia yana lei-subisubia
67-68 'Anu'anunu Magemagetana Ioni tamana Sekalaia i agei mogitana begaidi i vona-samula tutuya i mimai faifaina i vo,
'Auvea ta na subisubiai, taunina me Isileli yada Yaubada
fai 'akonadi i 'ivaiseda wata i 'ita'ita'ieda.
69 'Ada To'ita'ita'i Toketokena Yaubada i silakai faifaida
yana tofolova Kini Devida 'ana wauma 'wainega.
70-71 Basenadiotoga Yaubada i vona'awaufaufa yana tolu'ivona magemagetadi 'waidiega
i na 'ita'ita'ieda 'ada gaviavo 'waidiega
wata taunidi i vedumwe'ai'aiedaga yadi toketokena 'waidiega.
72 I vona'awaufaufa tubudavo 'waidie i na 'isanuakalikaliedi,
yana veakutagonanina magemagetana kebu i da venuafania.
73 Veakutagonanina Yaubada i 'idewai tubuda Ebelamo 'waineye
yana vona'awaufaufa toketokena 'wainega.
74-75 I na 'ita'ita'ieda 'ada gaviavo 'waidiega
bega kebu tamu ava'ai ta na kololoyeni.
Wata yana 'aivaitanina 'wainega 'ada fata ta na vetofolova faifaina,
tutuya matatabuna yada sauluva tonovidi wata magemagetadi mataneye.”
76[m]Wata Sekalaia i vona-samula natuna faifaina i vo,
We'e natuku, i na golemu
Yaubada Tabwaotogineye yana tolu'ivona,
fai 'Auvea yana 'eda 'u na vusia.
77 Yana tomotoga 'waidie 'u na mata'aulele yadi sakona i na vedumwe'ubu'ubusedi
bega Yaubada i na nuatavunidi nika 'ita'ita'i i na veluagai.
78-79 [n]Nani de'e matatabuna i na souyeni fai yada Yaubada i 'isanuakalikalieda bwaikina
wata 'ita'ita'i sai'afoga i na mai abamayega bani'odi mageta,
bega egavo wafa faifaina i kolokolologa wata dudubala 'waineye i miamianiga i na magesedi.
Magetanina i na kumeseda bega yada mia i na ve'atumai.”
80 Kwamananina i taulai toketokena wata yana nuanua matatabuna i tauyedi Yaubada 'waineye. Sali'avu'avuye i miamia, mulieta i souyeni yana folova i velamu me Isileli 'waidie.
LUKE 2 ->
