IONI
Iesu Valana 'Atumaina Ioni 'ana kilukiluma
'Eba kiavemageta
Ioni tamu Iesu yana tovetutuyamavo 12 'adi 'aila'a 'wainega. Taunina tutuya fuedi Iesu taiadi i yabayaba bega yana folova i 'isedi wata yana ve i nogaidi. We'e Malika, Madiu wata Luke i kumeta i kiluma, mulieta Ioni i vemuli i kiluma.
Ioni yana veifufu ta na 'iseni 'wa da vo tamu tomogo i da kiluma we'e mogitana 'asa'aiana kumanina i kiluma. Siwe kebu nuanuana taunina i na awa'ai'aia begaidi i vo, Yana tovetutuyamavo i vona,” we'e mogitana i da vo, Yana tovetutuyamavo 'a vona.”
Malamala fuedi i 'a'ava tomotoga nuadi i fani Iesu yana wafa, yana tovoi-vaitugana wata yana laka abame faifaidi. Faifainanina Ioni nuanuana Iesu ifufuna i na kilumi tomotoga fueda faifaida. Vonanidi i kilumidiga 'Anu'anunu Magemagetana yana 'aivaita 'wainega, 'ada fata 'waidiega ta na vetumagana.
Yana kiluma 'eba velamu 'waineye Ioni i kiavemageta Keliso yana 'eba velamu faifaina, Keliso nagamidiotoga Yaubada taiadi i miamia mulieta Tamana i voneni i mai fwayefwayeye. Yaubada i kiavemageta 'waideye Keliso 'wainega taunina yana 'aseta faifaina, bega Keliso 'ana wagava 'eba 'ainana tamu, Yaubada 'ana Tosivemageta. Wata Ioni i veifufu Iesu 'eba nuavogana wata 'eba nua'ewa i 'idewadiga faifaidi, bega ta na lu'iawawai nika ta na 'aseta-'atumaia Iesu mogitana Yaubada Natuna. We'e me Diu fuedi i baila kebu nuanuadi Iesu bega i luvewafai. Iesu yana wafa, yana tovoi-vaitugana wata yana souyagi enavo 'waidie faifaidi i kiluma.
Iesu folova toketokedi fuedi 'eba nuavogana wata 'eba nua'ewa i 'idewadi yana tovetutuyamavo matadie, siwe kebu matatabuna 'adi kilumaga buki de'e 'waineye. Naninidi 'akonadi kilukilumidi 'wa na lu'iawawadi bega 'wa na vetumagana Iesu Keliso taunina Yaubada Natuna wata 'ana Venua'ivina. Vetumagananina 'wainega mia 'ivauna wata miamia-vagaina 'wa na veluagai Iesu 'wainega. (Ioni 20:30-31)

Keliso taunina Yaubada yana Tosivemageta i vetomotogaotoga

1 Basenadiotoga Yaubada fwayafwaya wata abama bola kebu i da 'idewadiga, nagamidiotoga yana Tosivemageta i miamia.

Tosivemagetanina Yaubada yana nuanua matatabuna 'ana tolu'ivona.

Taunina Yaubada 'ana labilabina

wata taunina 'asa'aiana Yaubada.

2 Tutuya 'eba velamunina 'waineye Tosivemageta Yaubada taiadi i miamia.

3 Yaubada yana nuanua 'wainega Tosivemageta nani matatabuna i 'idewadi abame wata fwayefwayeye,

kebu tamu nani taunina i da souya-maimaigeni.

4 Taunina miamia-vagaina yawaida lamuna

wata 'wainega mia 'ivauna wata 'atumaina ta veluagai, bani'odi mageta 'waideye.

5 Yaubada yana Tosivemageta nani matatabuna dududubalidi i magemagesedi,

we'e dudubalanina kebu 'ana fata i na vetoketoke magetanina i na luve'weuya.

6-7 [a]Yaubada nuanuana tomotoga magetanina i na 'asetai, begaidi yana tomata'aulele i vetunei bega i na lu'ivona 'waidie. Tomogonina 'ana wagava Ioni Tobafitaiso, i mai i lulu'ivona magetanina faifaina, bega tomotoga i na vetumagana. 8 Ioni kebu taunina mageta, i vetolu'ivonamo mageta faifaina. 9 Yaubada yana Tosivemagetanina 'asa'aiana taunina mageta mogitana, i obuma tomia fwayafwaya matatabudi nuadi i kikiavemagetadi.

10 Avinodi fwayefwayeye i mai kumanina fwayafwaya 'ana to'idewadewa, siwe tomia fwayafwaya kebu i da 'isa'inanai. 11 I mai taunina yana 'awalaweye siwe yana 'aila'avo i vedumwe'ai'aieni. 12 We'e egavo ma yadi vetumagana i lu'uma'umaieni wata taunidi i tauyedi 'waineye, Yaubada veimea i veledi bega kumanidiavo natunavo. 13 Tomotoganidi i tubuve'ivauga, kebu tomogo ma yana vavine 'waidiega wata kebu tamu tomogo yana nuanua 'wainega, tubuve'ivaunina Yaubada 'wainega yana 'aila'a faifaina.

Nuakalikali bwaikina i mai Keliso 'wainega

14 Yaubada yana Tosivemageta i obuma i vetomotogaotoga taiadi 'a miamia, yana nuakalikali 'eno'eno-vagaina wata nani matatabuna tonovina lamuna. I mai tamada 'wainega, taunina Natuna tubu'eana, we'e 'ifwaima yana mageta mataududulina 'a 'iseni.

15 Ioni Tobafitaiso i maiga bonana bwaikinega i lu'ivona 'aila'a 'waidie Yaubada yana Tosivemageta faifaina i vo, Sino taunina, kumanina faifaina a lulu'ivona 'waimie a vo, Avinodi yau a kumeta, taunina i mimai mulikuye, siwe taunina bwaikaotogina yau kebu bani'odiga fai yau bola kebu a da tubugaga nagamidiotoga taunina i miamia.’ ”

16 Yaubada yana Tosivemageta tonuakalikali mogitana, nuakalikali tulina tulina ma 'adi 'imoso'i ta veveluagadi 'wainega. 17 Yaubada yana veimea i veleda Mosese 'wainega, we'e yana nuakalikali 'eno'eno-vagaina wata nani matatabuna tonovina i souyeni Iesu Keliso 'wainega. 18 Kebu tamu aitoi Yaubada i da 'iseniga, 'aiseotogina Natuna, kumanina 'asa'aiana Yaubada. Natuna Tamana 'ana labilabina bega i sivemageseni 'waideye.

Ioni Tobafitaiso yana lau'age

(Madiu 3:1-12; Malika 1:2-8; Luke 3:15-17)

19 Me Diu to'edakumetavo i miamiani Ielusalema 'waineye nuanuadi i na 'asetai Ioni Tobafitaiso aitoi, begaidi tomotoga 'ifwaidi i vetunedi i nagoi 'waineye i velutolieni. Tomotoganidi tovelomu 'ifwaidi wata Vanuga 'Eba Velu'ui 'ana to'isave'avinavo. 20 Ioni yadi velutoli kebu i da vedumwe'ai'aieni nani matatabuna i lu'ivoneyedi i vo, Yau kebu Keliso, Yaubada 'ana Venua'ivinaga.” 21 [b]Bega i velutolieni i vo, We'e 'omu aitoi? 'Alo 'omu Ilaitia 'u vilamu Yaubada 'wainega?” Ioni i vo, Kebu.” Wata i velutoli i vo, 'Alo 'omu tolu'ivonanimu, kumanimu faifaimu basenadiotoga Yaubada i lu'ivona Mosese 'waineye, i vo, Bola i na mai?’ ” Nika wata i vo, Kebu.” 22 Wata tovelutolinidi i vo, Vetuma 'omu aitoi? Nuanuama taunimu 'u na lu'ivoneyemu bega 'a na vilama 'a na nagoi 'ama tovetune 'waidie 'a na veifufu.” 23 [c]Bega Ioni yadi velutoli i tutuli Yaubada yana tolu'ivona Aisea 'ana kilukiluma 'wainega i vo,

Sali'avu'avuye a vevegolegole a vo,

'Auvea yana 'eda 'wa na vusia

wata 'wa na sivetonovi yana 'eba nago.’ ”

24-25 Tovelutolinidi Falisi i vetunediga Ioni i velutolieni i vo, 'U vonaga 'omu kebu Keliso, kebu Ilaitia wata kebu Yaubada yana tolu'ivona bwaikina, siwe awale tomotoga 'u babafitaisodi?” 26 I vonedi i vo, Yau ufa 'aisena 'wainega tomotoga a bafitaisodi, we'e tamu tomogo 'awasasamie i tovotovoi siwe kebu 'wa da 'isa'inanai. 27 Avinodi yau a kumeta a folova, siwe kumanina mulikuye i mimaiga, 'awaie tomogo bwaikina, yau kebu bani'odi. Kebu i da i lubwaineku 'waineye 'ana vetofolova 'ana 'ageyafayafa a na ta'ia.”

28 De'e bani'odi Ioni i veifufuyediga Bedani 'waineye, Ufa Iolidani we'e no'o bega, wata bei tomotoga i bafitaisodi.

Iesu taunina Yaubada yana Sifi Siaina

29 I 'atai Ioni i veveifufu 'aila'a 'waidie nika Iesu i 'isanaweni i mimai i vonedi i vo, Sino tomogonina, Yaubada yana Sifi Siaina[d] i mai 'wainega. Taunina yana wafa 'wainega tomia fwayafwaya matatabuda yada sakona i na 'ewayavuledi. 30 Kumanina basenadi faifaina a lu'ivona 'waimie a vo, Avinodi yau a kumeta, taunina i mimai mulikuye, siwe bwaikaotogina yau kebu bani'odi fai bola kebu a da tubugaga nagamidiotoga i miamia.’ 31 Yau nagami Yaubada 'ana Venua'ivina kebu a da 'isa'inanai, siwe a mai tomotoga a babafitaisodi ufayega bega a na sivemageseni me Isileli 'waidie.”

32 Wata Ioni side bani'odi i lu'ivoneyedi tomotoga 'waidie i vo, Tutuyanina 'waineye 'Anu'anunu Magemagetana a 'iseni abamayega i obu Iesu 'waineye, i age-vagaseni, yana yaveobu 'ana 'isa'isa bani'odi bunebune. 33 Yaubada 'ana Venua'ivina kebu a da 'asetai a vo 'ako aitoi, siwe tutuyanina Yaubada i vetuneku a na bafitaiso ufayega i voneku i vo, 'Awaie 'Anu'anunuku 'u na 'iseni i na obu tamu tomogo i na age-vagaseni nika bei 'u na 'asetai.’ 34 Tauniku matakuyega a 'iseni, a vona mogitana taunina Yaubada Natuna.”

Iesu yana tovetutuyamavo kumekumetadi

35-36 I 'atai Ioni Tobafitaiso yana tovetutuyamavo 'adi 'ailuga taiadi i tovotovoi, nika Iesu i 'iseni i mai i nunago. Bega Ioni i vonedi i vo, Sino tomogonina Yaubada yana Sifi Siaina.” 37 'Adi 'ailuga yana vona i nogai Iesu mulineye i nagoi. 38 Iesu i sivilai i 'isedi i velutoliedi i vo, Tamu ava'ai yami nuanua faifaina 'wa mimaia?” Velutoliega yana velutoli i tutuli i vo, Tove, ava'aibe bei yamu vanuga?” 39 Iesu i vo, 'Wa mai ta na nagoi a na vemi.” Taiadi i nagoi yana 'eba mia i vedi. Fai 'akonadi i lavia, bani'odi 4 kiloki, bei i miamiani nika i lovani.

40 Tomotoganidi 'adi 'ailuga Ioni yana vona i nogai bega Iesu taiadi i nagoi, tamu 'ana wagava Anidulu, Saimoni Fita taina. 41 Anidulu Iesu taiadi i veifufu'a'ava, tonovina i nago nika tatana i veluagai i voneni i vo, Saimoni, 'ima 'akonadi Keliso, Yaubada 'ana Venua'ivina 'a veluagai.” 42 Bega i vagavaia taiadi i maia Iesu 'waineye. Iesu Fita i 'iseni i vo, 'Omu Saimoni, Ioni natuna, siwe 'awaie 'amu wagava i na golegolemu Sifasa.” Sifasa 'ana 'aseta kileu bababana, Fita me Kuliki bonadiega.

Iesu Filifi wata Nataniela i venua'ivinedi

43 I 'atai Iesu nuanuana i na nago 'awalawa Galili, Filifi i veluagai i voneni i vo, 'U mai taiadi ta na nago yaku tovetutuyama.” 44 Filifi 'ana tuvada Bedasaida, 'atamananina 'wainega Anidulu wata Fita bega i maia. 45 Filifi Iesu yana vona i nogai Nataniela i veluagai i voneni i vo, 'U na nuani basenadiotoga Mosese wata tolu'ivonavo i kiluma Yaubada 'ana Venua'ivina faifaina yana Buki nageneye. Tomogonina 'akonadi 'a veluagai, 'ana wagava Iesu, Iosefa tomogo Nasaledi natuna.” 46 Nataniela i vo, Vona mogitana? Kebu 'ana fata tamu nani 'atumaina i na mai 'atamana Nasaledi 'wainega.” Yana vona Filifi i tutuli i vo, 'U mai ta na nago 'u na 'iseni.”

47 Tutuyanina Iesu Nataniela i 'iseni i mimai tomotoga i vonedi i vo, Sino taunina mogitana tomogo Isileli, yana sauluva matatabuna tonovina.” 48 Nataniela Iesu i velutolieni i vo, Bani'odi 'u munega 'u 'asetaku?” Iesu i vo, Nagami a 'isemu 'ala'ai lamuneye 'u tovotovoi mulieta Filifi i lu'ivona 'waimuye faifaiku.” 49 Nataniela i vo, Tove, 'omu mogitana Yaubada Natuna wata me Isileli yada Kini.” 50 Iesu i velutolieni i vo, 'U vetumagana fai yamu 'eba mia nagami a lu'ivoneyeniga 'waimuye? Siwe nani siaina. 'Awaie nani bwaikidi 'u na 'isedi, 'eba nuavogana wata 'eba nua'ewa a na 'i'idewadi. 51 [e]A vona mogitana, bola 'wa na 'iseni abama i na 'anikililia, Yaubada yana anelose 'wa na 'isedi i na lakalaka wata i na obuobuma yau a vetomotogaotoga 'waikuye. Yau kumaniku wanala abama wata fwayafwaya kamwadie.”

IONI 2 ->