IBELIU 13

Sauluvanidi 'waidiega Yaubada i na sosoana faifaida

1 Ma emiavo 'wa na vevenuakalikali fai matatabumi Keliso yana 'Aila'a. 2 [a]Kebu nuami i na fani 'wa na nuanuani bega tomotoganidi kebu 'wa da 'isa'inanadiga ma yami sosoana 'wa na lu'uma'umaiedi i na maia yami vanuge. Tomotoga 'ifwaidi bani'odi i munega anelose kebu i da 'isa'inanadiga siwe i tayegidi. 3 Egavo vanuga yogona nageneye i miamianiga 'wa na nunuave'avinidi, 'wa da vo 'omi taiadi 'wa da luku. Wata bani'odi egavo vita i veveluagadiga tomotoga 'ifwaidi 'waidiega 'wa na nuanuanidi 'wa da vo 'omi wata vita 'wa da veveluagadi.

4 I lubwaineda matatabuda nagi ta na ve'ililibuyeni. Iavetami kebu yami vevinevo 'wa na bailedi 'wa na lu'avo'avovo, wata 'omi vevine bani'odi yami lalamogavo 'wa na veve'ililibuyedi. Egavo taunidi i tauyedi bunu 'ana nuanua sakoidi wata ve'avula-'avo'avovo 'waidie, Yaubada i na veimeyedi vematavuloga faifaina.

5 [b]Taunimi 'wa na 'i'isave'avinimi bega mani 'ana nuakalikali kebu i na vebwaika 'waimie. Ava'ai 'akonadi 'waimie i 'eno'enoviga, siwe 'asa'aiana 'ami fata. Kebu fuedi faifaidi 'wa na nuanua fai 'akonadi Yaubada i vo,

Kebu tamu tutuya a na bailemiga,

kebu tamu sai'afo a na 'iawelovemiga.”

6 [c]Fai kebu i na 'iawelovedaga kebu ta na kololo 'alo ta na venuanaluga ta na vonavonamo ta na vo,

'Auvea 'aku to'aivaita, kebu a na kolologa.

Naninidi sakoidi tomotoga i na 'idewadiga 'waikuye, kebu faifaidi a na nuanua.”

Yami to'edakumetavo bonadi 'wa na nogaidi

7 Yami to'edakumetavo 'wa na nuanuanidi, kumanidiavo Yaubada yana Vona i lu'ivona 'waimie. Basenadi yadi sauluva 'atumaidi wata yadi folova 'waidiega nani fuedi 'atumaidi i souyedi, naninidi 'wa na nuanuanidi wata yadi vetumagana 'wa na vetutuyamedi. 8 Iesu Keliso kebu i na vetuli, bogi, 'asiau wata tutuya matatabuna i na nagoga siwe 'asa'aiana 'ana 'isa'isanina.

9 Taunimi 'wa na 'i'isave'avinimi i na nunago ve-vekavekali tulina tulina nuami i na 'ewadi 'wa na vuyo. Yaubada ma yana nuakalikali i vesauluva 'atumaina 'waimie bega 'wa vetoketoke, we'e egavo 'ani'ani 'adi veimea i veve'ililibuyediga, 'waidiega kebu 'aivaita i na veluagai.

10 'Ida tovetumaganavo ma yada 'eba velomu, taunina 'asa'aiana Iesu. Egavo bola i folofolova Vadavada Tabutabuna 'waineye kebu 'adi fata 'aivaita i na veluagai yada 'eba velomunina 'wainega. 11 [d]Me Diu yadi tovelomu bwaikina 'aisaya dayaga'avadi i lukulukuvedi Tutudaba Tabutabuotogina nageneye i 'a'anivelenedi Yaubada 'waineye tomotoga yadi sakona 'adi nuatavuna faifaina. We'e 'aisayadi i nunawedi mwalilige bei i kabukabunidi. 12 Begaidi wata Iesu i wafa mwalilige bega tomotoga i 'ivevunavunagidi yadi sakona 'waidiega taunina dayagina 'wainega. 13 Fai i 'ivevunavunagida, sauluva tuatuaidi ta na bailedi 'wa da vo ta da nunagoi mwalilige, bunumayaga wata saidibi ta na veluagai faifaina, taunina bani'odi i veluagai 'ai lagalagana 'waineye. 14 Vitanidi ta na veluagadiga faifaina, kebu faifaidi ta na nuanua fai 'ida kebu tamu yada 'atamana miamia-vagaina i da 'eno'enoga fwayefwayeye, bola ta lalauala Yaubada yana 'atamana faifaina, 'atamananina 'awaie i na souyeni.

15 Begaidi Iesu 'wainega Yaubada ta na subisubiai kebu ta na 'ailove, yada subianina siwe 'asa'aiana yada 'anivelena-maimaiga 'waineye. Bonadega ta lulu'ivona faifaina bega subianina Yaubada 'waineye bonada vuagina.

16 Kebu nuami i na fani, tutuya fuedi 'wa na vevesauluva 'atumaina wata ma emiavo 'wa na veve'ivaivaita. Sauluvanidi siwe 'asa'aiana yami 'anivelena-maimaiga Yaubada 'waineye, faifaidi i sososoana.

17 Yami to'edakumetavo 'wa na vematayakeyakedi wata taunimi 'wa na tauyemi yadi veimea 'waidie. Tutuya fuedi i 'i'isave'avinimi kebu tamu tutuya i da 'ailove fai 'awaie yadi folovanina faifaina i na lu'ivona Yaubada 'waineye bega i na veimea tutula faifaina. 'Wa na vematayakeyakediga ma yadi sosoana i na folofolova, we'e 'ai'edi kebu, ma yadi nuavita i na folofolova siwe 'wainega kebu 'aivaita 'wa na veluagai.

18 Nuanuaku 'wa na vevelu'ui faifaima. 'Aku vebae 'waineye a lutonovi yaku folova wata yaku sauluva matatabuna tonovi'avadi, nuanuaku bani'odi i na 'eno-vagata. 19 Nuanuaku bwaikina 'wa na toke 'wa na vevelu'ui faifaiku bega Yaubada i na vetune-matayo'oku a na wai 'waimie.

Velu'ui tolu'iawawa faifaidi

20-21 A vevelu'ui faifaimi nuanuaku Yaubada, kumanina mia 'atumaina wata nuanua bikana 'adi to'anivelena wata 'ada Toveimea Iesu Keliso 'ana tosivetovoi, i na kiavetoketokemi bega 'ami fata yana nuanua 'wa na 'i'idewadi. Yana wafa 'wainega Iesu i veto'isave'avina bwaikina, bega 'ida yana sifi i 'i'isave'avinida wata yana wafanina 'waineye dayagina i ilolo, 'wainega Yaubada yana Veakutagona 'Ivauna wata miamia-vagaina i souyeni. Bega nuanuaku Iesu Keliso 'wainega Yaubada i na 'idewada nika yada sauluva matatabuna faifaidi i na sosoana. Iesu Keliso ma 'ana subia wata ma yana 'ai'aiwabu miamia-vagaina, kebu i na 'a'avaga. Vona mogitana, yaku nuanua bani'odi.

Veifufu 'ana 'eba ve'a'ava

22 Ekwavo, nuanuaku bwaikina 'wa na tokemaigemi, yaku velu'ase'ase de'e 'wa na nogai, fai lubulubu de'e a kilumiga faifaimi kebu manamanawenaga.

23 Nuanuaku a na vonemi 'wa na 'asetai, iada Timoti 'akonadi i souyeni vanuga yogona 'wainega. 'Ai'edi i na le'wa-matayo'oga, taiadi 'a na wai 'a na fogemi.

24 Yami to'edakumetavo 'waidie yaku vekaiwa 'wa na lu'ivona wata Yaubada yana tomotoga matatabudi 'waidie. Edavo 'awalawa Itali 'wainega yadi vekaiwa i vetunei 'waimie.

25 Nuanuaku Yaubada ma yana nuakalikali i na vevesauluva 'atumaina 'waimie.

'Asa'aiana bani'odi.

<- IBELIU 12