IBELIU
Leta deꞌe me Ibeliu faifaidi.
Deꞌe letanina me Diu faifaidi kumanidiavo i vetumaganaga Iesu Keliso ꞌwaineye. Bonadi ꞌana wagava Ibeliu begaidi ta golegoledi ta vo, Me Ibeliu.” Weꞌe deꞌe letanina ꞌana tokiluma kebu ta da ꞌasetaiga aitoi i kilumi.
Fai me Ibeliu tovetumagana vita i veveluagadi Iesu ꞌana tovedumweꞌaiꞌai ꞌwaidiega nuanuadi i na viladi yadi tafalolo tuatuaina ꞌwaineye. Begaidi deꞌe leta ꞌana tokiluma i ve ꞌwaidie i lubwainedi yadi tafalolo tuatuaina ꞌadi ꞌedaꞌeda i na bailedi, Iesu ꞌaiseotogina ꞌwainega i na veꞌatumai Yaubada mataneye. Iesu taunina Yaubada Natuna bwaikaotogina weꞌe anelose, Yaubada yana toluꞌivonavo wata Mosese saiꞌafo. Wata i ve ꞌwaidie tomotoga kebu ꞌadi fata i na veꞌatumai Yaubada mataneye veꞌetoboda ꞌadi vematayakayaka ꞌwaidiega ꞌalo velomu tulina tulina ꞌwaidiega. Iesu ꞌaiseotogina ꞌwainega Yaubada yada sakona i na ꞌuꞌumidi. Fai taunina yada Tovelomu Bwaikina faifaida i mia-vagata Yaubada ꞌana ꞌatagiega, i lubwaineda yada sauluva tuatuaidi ta na bailedi, yada vetumagana ta na yato-vagasedi Iesu ꞌwaineye. Deꞌe letanina ꞌana ꞌidi side baniꞌodi.

Yaubada taunina i sivemageseni ꞌwaideye Natuna ꞌwainega. 1:1-4
Keliso Yaubada yana anelose i vebwaika-ꞌiawedi. 1:5-2:18
Keliso Mosese wata Iosua i vebwaika-ꞌiawedi. 3:1-4:13
Keliso tovelomu i vebwaika-ꞌiawedi. 4:14-7:28
Veakutagona ꞌIvauna Keliso ꞌwainega Veakutagona Nagami i vebwaika-ꞌiaweni. 8:1-9:28
Keliso dayagina ꞌaisaya dayagidi i vebwaika-ꞌiawedi, ꞌeba velomunina ꞌana fata yada sakona i na ꞌuꞌumidi. 10:1-39
Vetumagana ꞌaiseotogina ꞌwainega ta na veꞌatumai. 11:1-40
Ma yada tokemaiga ta na vetumagana Keliso ꞌwaineye wata ta na vematayakeyakeni. 12:1-13:19
Leta ꞌana tokiluma yana ꞌalanuai. 13:20-25

Yaubada yana nuanua ꞌwaideye, ꞌana tosivemageta Iesu.

1 Basenadiotoga Yaubada yana nuanua i veve tubudavo me Diu ꞌwaidie. Tutuya fuedi ꞌedaꞌeda tulina tulina ꞌwaidiega yana nuanua i sivemagesedi yana toluꞌivonavo ꞌwaidie mulieta i luꞌivona tubudavo ꞌwaidie. 2 [a]Basenadi deꞌe baniꞌodi i veifufuyedi siwe ꞌasiau bega i na nagoga tutuya ꞌana ꞌeba veꞌaꞌava ꞌwaineye i veifufu ꞌwaideye Natuna ꞌwainega. Natunanina ꞌwainega nani matatabuna i ꞌidewadi abame wata fwayefwayeye, wata i venuaꞌivineni bega naninidi i ꞌidewadiga i na veveimeyedi. 3 [b]Yaubada yana ꞌaiꞌaiwabu mataududulina ꞌanununa ꞌada fata ta na ꞌiseni Natuna ꞌwainega. Natunanina Yaubada i sala-ꞌafoꞌafoi wata yana vona toketokena ꞌwainega nani matatabuna i kikiavefaꞌalidi wata i ꞌiꞌisaveꞌavinidi. Weꞌe yana wafa ꞌwainega tomotoga yada sakona i lekoaꞌaꞌavadi mulieta ma yana veimea i miabui abame, Yaubada Toketokeotogina ꞌana ꞌatagiega. 4 [c]Ma yana veimea i miabui bega taunina bwaikaotogina weꞌe anelose saiꞌafo. Weꞌe ꞌana ꞌeba ꞌainana Yaubada Natuna, wagavanina bwaikaotogina kebu anelose ꞌadi wagava baniꞌodi.

Yaubada Natuna bwaikaotogina kebu anelose baniꞌodi.

5 [d]Vona mogitana ta ꞌasetai Yaubada Natuna bwaikaotogina fai basenadiotoga i kilumi Yaubada yana Buki ꞌwaineye faifaina. Yaubada i vona Natuna ꞌwaineye i vo,

ꞌOmu Natuku,

ꞌAsiau fai yau Tamamu veimea a velemu.”

Weꞌe kebu tamu tutuya deꞌe baniꞌodi i da voneyedi anelose ꞌwaidie. Wata tamu tutuya Yaubada i vona Natuna faifaina i vo,

Yau Tamana,

Weꞌe taunina Natuku.”

6 [e]Yaubada Natuna kumanina nani matatabuna ꞌadi toꞌedakumeta, saiꞌafoga i na vetunei i na mai fwayefwayeye, faifaina i vona i vo,

Yaku anelose matatabudi, i lubwainedi ma yadi subia i na ꞌoduꞌodu ꞌwaineye.”

7 [f]Ta ꞌasetai anelose tomotoga bwaikidi fai Yaubada i vona faifaidi i vo,

Yaku anelose a ꞌidewadi, yadi lilide kaukau baniꞌodi,

Taunidi yaku tofolovavo ꞌai-ꞌalaꞌalata baniꞌodi.”

8 [g]Weꞌe Natuna fai bwaikaotogina bega faifaina i vo,

ꞌOmu Yaubada, yamu ꞌEba Veimea kebu ꞌana ꞌeba veꞌaꞌavaga i na ꞌeno-vagata.

ꞌU veveimea, veimea tonovidi ꞌwaidiega.

9 Sauluva tonovidi nuanuamu bwaikina, weꞌe sakona ꞌu vedumweꞌaiꞌaieni.

Begaidi yau yamu Yaubada a venuaꞌivinemu a silakaimu, wata veimea bwaikina a velemu, ꞌamu kiavesosoana.

Weꞌe emwavo ꞌadi veꞌililibu saiꞌafo.”

10 [h]Wata Yaubada i vona Natuna ꞌwaineye i vo,

ꞌOmu Toveimea, ꞌeba velamu ꞌwaineye fwayafwaya ꞌu ꞌidewai,

Wata nimamuyega nani matatabuna abame i souyedi.

11-12 Naninidi ꞌaꞌaꞌavidi i na savovola, weꞌe ꞌomu ꞌu na mia-vagata.

I na venani-ꞌavoꞌavovo kaleko tuatuaina baniꞌodi.

Tomotoga kaleko tuatuaina i na sakoga i na nunumi i na taweni, maꞌitufa ꞌivauna i na ꞌewai.

Wata baniꞌodi fwayafwaya abama taiadi ꞌu na nunumidi weꞌe ꞌivaudi i na souyedi.

Weꞌe ꞌomu, ꞌasaꞌaiana ꞌamu ꞌisaꞌisanina, kebu ꞌu na vetuatuaiga.”

13 [i]Wata tamu tutuya Yaubada i vona Natuna ꞌwaineye i vo,

Veimea a velemuga bega ꞌu na miabui ꞌaku ꞌatagiega,

I na nagoga ꞌamu gaviavo a na leodi bega ꞌu na veveimeyedi.”

Weꞌe kebu tamu tutuya deꞌe baniꞌodi i da voneyedi anelose ꞌwaidie. 14 [j]Vetuma anelose egavo? Taunidi ꞌanuꞌanunu, Yaubada yana tofolovavo i vevetunedi bega egavo ꞌitaꞌitaꞌi i na veluagaiga i ꞌiꞌivaisedi.

IBELIU 2 ->