GALETIA
Faulo yana kiluma me Galetia 'waidie
'Eba kiavemageta
Galetia nageneye tovetumaganavo 'aila'a tulina tulina bei i miamiani bega Faulo lubulubu de'e i kilumi i nago 'waidie. Basenadi Faulo taunina i nago 'atamana fuedi 'waidie Galetia nageneye Iesu Valana 'Atumaina faifaina i lau'age bega tovetumaganavo 'adi 'aila'a tulina tulina i souyedi.
Tovetumaganavo Galetia nageneye tomotoga tulidi tulidi, Faulo i lau'age 'waidie i vo, Vetumagana'ava 'wainega Yaubada i na awave'atumaiemi.” Mulieta me Diu 'ifwaidi i maia Faulo yana ve i awavesakoyeni i vo, Tovetumaganavo i lubwainedi veimea Mosese 'wainega i maiga i na vematayakeyakedi nika 'wainega i na ve'atumai Yaubada mataneye.” We'e bunu 'aibobo 'ana veimea faifaina i ve'ikwayekwayega.
Yadi venina faifaina Faulo i nuasako bwaikina. Bega i vo, 'Ai'edi veimeanidi 'adi vematayakayaka 'waidiega ta da ve'atumaiga, Keliso yana wafa sakona 'adi nuatavuna faifaina i da venani-'avo'avovo kebu lamunaga.” Faulo lubulubu de'e i kilumi me Galetia i velu'ase'asedi, nuanuana tovetumaganavo ve-vekavekali i na bailedi i na viladi Iesu yana 'eda'eda mogitana 'waineye. Lubulubu de'e 'ana 'idi side bani'odi.
Vona-vekaiwa wata Vala 'Atumaina 'ana nuanua mogitana. 1:1-10
Faulo yana vetomata'aulele faifaina i veifufu. 1:11-2:21
Yaubada i na 'ive'atumaida yada vetumagana 'waidiega, kebu veimea 'adi vematayakayaka 'waidiega. 3:1-4:31
Sakona i veveimeyedaga 'wainega Keliso i yavuda bega 'Anu'anunu Magemagetana yana nuanua ta na 'i'idewadi. 5:1-6:10
Yana 'alanuai wata yana nuanua bwaikidi 'adi 'eba kiavemageta. 6:11-18

1 Ekwavo, yau Faulo, Iesu Keliso yana tomata'aulele a vekaiwa 'waimie. A vetomata'aulelega kebu tamu aitoi yana venua'ivina 'wainega, 'alo tamu tomogo yana veimea 'wainega. We'e mogitana Iesu Keliso wata Yaubada Tamada, kumanina Keliso i sivetovoia wafayega, i venua'ivineku bega a vetomata'aulele.

2 Yau wata edavo tovetumaganavo taiadi 'a miamianiga, yama vekaiwa 'ana lubulubu 'a vevetunei 'omi Keliso yana 'Aila'avo 'waimie, 'wa miamiani 'awalawa Galetia nageneye.

3 A vevelu'ui faifaimi, nuanuaku Yaubada Tamada wata 'ada Toveimea Iesu Keliso ma yadi nuakalikali i na vevesauluva 'atumaina 'waimie, nuanua bikana wata mia 'atumaina taiadi i na velevelemi.

4 Yada Yaubada Tamada yana nuanua Keliso i vematayakeyakeni, taunina i tauyeni i wafa yada sakona 'adi nuatavuna faifaina bega i 'ita'ita'ieda fwayafwaya 'ana sakona tulina tulina 'wainega. 5 Yaubada ta na subisubiai tutuya matatabuna 'waidie, yana 'ai'aiwabu kebu i na 'a'avaga i na 'eno-vagata. Vona mogitana, yaku nuanua bani'odi.

Vala 'Atumaina Iesu 'aisena Valana

6 Yau nuaku i vogani, kebu tutuya manamanawenaga Yaubada, kumanina i vagavaimi Keliso yana 'isanuakalikali 'wainega, 'wa baibaileni. Basenadi taunimi 'wa tauyemi Iesu Valana 'Atumaina 'waineye, we'e tutuya de'e 'wa damadamana vala tulina 'waineye igodina Vala 'Atumaina. 7 Siwe kebu tamu vala tulina 'ita'ita'i faifaina i da 'eno'eno. A vonevonemiga fai tomotoga 'ifwaidi Keliso Valana 'Atumaina i 'ivesakoi vekaliega i nua'animi. 8 We'e 'ai'edi 'ima 'alo tamu anelose abamayega, tamu vala tulina 'a na lau'age 'waimie igodina 'ami 'ita'ita'i faifaina, siwe kebu i na vesala Valanina a lu'ageyeniga taiadi, i lubwaineni Yaubada yana vematavuloga toketokena i na veluagai. 9 Ava'ai 'akonadi a vonemiga wata a na luvaitugani. 'Ai'edi tamu aitoi vala tulina i na lalau'age 'waimie igodina 'ami 'ita'ita'i faifaina, siwe kebu i da vesala Valanina nagami 'wa vetumaganeniga 'waineye, i lubwaineni tomogonina Yaubada yana vematavuloga i na veluagai.

10 De'e yaku vona 'ana nogaya kebu a da vo, Nuanuaku tomotoga i na awave'atumaieku,” we'e mogitana Yaubada 'ana awave'atumai faifaina a nuanua. 'Ai'edi a da nuanuaga 'aku subia faifaina, 'ako yau kebu Keliso yana tofolovaga.

Keliso Valana, tauniotogina i sivemageseni Faulo 'waineye

11 Ekwavo nuanuaku yaku lau'age faifaina a na vonemi bega 'wa na 'asetai Iesu Valana 'Atumaina a lalau'agega, kebu tomotogaotoga yadi nuanua 'wainega. 12 We'e yau, yaku 'aseta Valananina faifaina kebu a da veluagai tamu tomogo 'wainega wata kebu tamu aitoi i da ve 'waikuye, we'e mogitana Iesu Keliso tauniotogina i sivemageseni 'waikuye.

13 [a] 'Akonadi yaku sauluva valana 'wa 'asetai, yau tomogo Diu, yama veimea matatabuna a ve'ililibuyedi wata Yaubada yana tomotoga i vetumagana Keliso 'waineye a toke a 'ivekokovidi wata veviga bwaikina a veledi, igodi a da leo'a'avadi. 14 [b]We'e ekwavo me Diu 'waidiega yau a kumeta, sauluvanidi matatabuna i mai tubumavo 'waidiega a 'idewa'a'avadi, we'e ekwavo sai'afo.

15-16 [c]We'e Yaubada ma yana nuakalikali i vesauluva 'atumaina 'waikuye, bola kebu a da tubuga siwe nagami i venua'ivineku, yana veimea 'wainega a na vetofolova faifaina. Yaubada yana nuanua faifaiku 'ana tutuya i veluagaina, Natuna i sivemageseni 'waikuye, bega Natunanina Valana 'Atumaina a na lau'age mali tomotoga kumanidiavo kebu Diu 'waidie.

Tutuyanina i sivemageseni 'waikuye i 'a'avana, kebu a da nago tamu tomogo 'waineye i da kiavetonoveku Iesu Valana faifaina. 17 Wata kebu a da nago Ielusalema bega Iesu 'ana tomata'aulelevo taiadi 'a da veifufu, kumanidiavo tomata'aulele kumekumetadi we'e yau a vemuli. Siwe ma'itufa tonoviku a nago sali'avu'avuye 'awalawa Aleibia nageneye, bei a miamia mulieta wata a vilaku a nago Damasiko.

18 [d]A miamia, malamala 'aitonu i 'a'avana mulieta a laka Ielusalema Fita taiadi 'a veifufu, wata bei taiadi 'a miamia wiki 'ailuga. 19 Bei 'a miamia, 'ifwaidi tomata'aulelevo kebu a da 'isediga, Iemesa 'ada Toveimea Iesu taina wata Fita, 'aisedi a veluagadi. 20 'Akonadi Yaubada i 'asetaku, ava'ai a vonevonemiga yaku kiluma 'wainega, de'e vona mogitana, kebu a da vevekaliemiga. 21 Wiki 'ailuga i 'a'avana Ielusalemayega a tauya a nago 'awalawa Silia wata Silisia. 22 Tutuyanidi 'waidie Keliso yana 'Aila'a 'adi 'aila'a 'aitamogana 'aitamogana 'awalawa Iudia nageneye vala'avaku i noganogai, we'e 'aku 'isa'isa kebu i da 'asetaiga. 23 We'e mali tomotoga i vonevonedimo i vo, Tomogonina basenadi i 'i'ivekokovida, tutuya de'e Iesu Valana 'Atumaina 'ada 'ita'ita'i faifaina i lalau'age, we'e nagami igodi nuanuana 'ida Keliso 'ana tovetumaganavo i da leo'a'avada.” 24 Valakunina i nogai begaidi Yaubada i subiai ava'ai i 'idewaiga 'waikuye faifaina.

GALETIA 2 ->