EFESO Faulo yana kiluma me Efeso 'waidie 'Eba kiavemageta Tutuyanina Faulo i miamia Loma vanuga yogona nageneye, lubulubu 4 i kilumidi. Tamu lubulubu tovetumaganavo i miamiani Efeso 'waineye faifaidi, tamu me Filifai faifaidi, tamu me Kolose faifaidi, we'e tamu Filimoni faifaina. Lubulubu de'e i kilumiga me Efeso faifaidi nagami i na lu'iawawai i na 'a'avana mulieta tovetumaganavo 'atamana 'ifwaidi 'waidie lubulubunina i na lu'iawawai. Efeso tamu 'atamana 'ana wagava bwaikina 'awalawa Eisia nageneye. Tomotoganidi bei i miamianiga kukua 'ana nuanua 'waidie bwaikina wata taunidi i tauyedi tamu yaubada-vekavekali 'waineye 'ana wagava Atemisi. We'e Efeso nageneye tamu vanuga 'eba velu'ui 'atumaiotogina i tovotovoi Atemisi faifaina. (Folova 19:17) Faulo yana lauvivila 'ana veluga 'waineye bei i lau'age me Diu 'waidie 'Aiata Veawai 'waineye. (Folova 18:18-21) We'e yana lauvivila 'ana vetonu 'waineye i nago Efeso bei i miamia malamala 'aitonu 'waidie i veve. (Folova 19) Me Efeso fuedi kumanidiavo mali tomotoga kebu Diu, siwe wata 'ifwaidi me Diu taiadi i miamiani. Faulo yana ve 'wainega tomotoga fuedi i vetumagana, i miave'itubama Keliso taiadi nika 'aila'a 'aitamogana. Wata Faulo Keliso yana 'Aila'a i awatalatutuleni nani 'aitonu 'waidiega. 'Ida Keliso tomogona, taunina 'ada Toveimea. 'Ida Yaubada yana vanuga, we'e Keliso taunina 'asa'aiana vanuganina 'ana 'unututu. Keliso yana 'Aila'a bani'odi yana vavine. Lubulubu de'e 'ana 'idi side bani'odi. Vona-vekaiwa. 1:1-2 Yaubada yana nuakalikali wata yada miave'itubama Keliso taiadi faifaidi. 1:3-3:21 Tovetumaganavo i lubwainedi yadi nuanua 'aitamogana. 4:1-16 Tovetumaganavo i lubwainedi sauluva sakoidi i na bailedi. 4:17-5:20 Tovetumaganavo i lubwainedi ma yadi nuakalikali taunidi i na tauyedi ediavo tovetumagana 'waidie. 5:21-6:10 Keliso yana toketokena 'wainega tovetumaganavo i na vetoketoke Seitani ma yana 'aila'a 'waidie. 6:11-20 Faulo yana 'alanuai. 6:21-24
1
1 [a]Ekwavo, yau Faulo a vekaiwa 'waimie. Yaubada nuanuana, bega a vetomata'aulele Iesu Keliso faifaina, we'e 'omi Yaubada yana tomotoga 'wa miamianiga 'atamana Efeso 'waineye, kumanimiavo totokemaiga 'wa miave'itubama Keliso taiadi, 'waimie a kilukiluma.
2 A vevelu'ui faifaimi, nuanuaku Yaubada Tamada wata 'ada Toveimea Iesu Keliso ma yadi nuakalikali i na vevesauluva 'atumaina 'waimie wata nuanua bikana mia 'atumaina taiadi i na velevelemi.
Yaubada i vesauluva 'atumaina 'waideye Iesu Keliso 'wainega
3 Ma yada sosoana ta na vekaiwa 'ada Toveimea Iesu Keliso yana Yaubada wata Tamana 'waineye. I lubwaineda ta na subiai fai nuakalikali tulina tulina abamayega 'akonadi i veleda 'anu'anunuda yadi mia 'atumaina faifaina, 'ida kumanidavo ta miave'itubama Keliso taiadi. 4-5 Bola kebu fwayafwaya i da 'idewaiga, 'ida Keliso taiadi ta miave'itubama, Yaubada i venua'ivina-vagaseda bega mataneye yada sauluva magemagetadi kebu tamu yada sakonaga. Fai nagami i nuakalikalieda begaidi i venua'ivineda, Iesu Keliso 'wainega i fayayeda nika 'ida natunavo. De'e bani'odi i vesauluvediga 'waideye fai taunina yana nuanua 'wainega, yana 'eba sosoana faifaina. 6 Yaubada yana 'isanuakalikali magemagetana i vesauluva 'atumaina 'waideye Natuna nuafouna 'wainega begaidi ta na subiai ta na vo, Yaubada, yamu 'anivelena-maimaiga 'waimeye 'atumaiotogina.” 7 [b] Yaubada Natuna yana wafa 'wainega i tuveobuda, dayagina i ilolo faifaida i yavuda sakona 'wainega wata i nuatavunida. 8 Yana nuakalikalinina 'waideye 'etowava-wayoga, bani'odi yana nuamageta wata yana 'aseta matatabuna taiadi i veleda. 9 Basenadiotoga Yaubada yana nuanua givagivana i 'idewai Keliso faifaina, yana 'eba sosoana, 'akonadi i sivemageseni 'waideye. 10 Yana nuanuananina side bani'odi. Tutuyanina Yaubada nuanuana, tutuya 'eba ve'a'ava 'waineye, nani matatabuna abame wata fwayefwayeye i na va'augidi bega Keliso i na veveimeyedi.
11 Wata fai Keliso taiadi ta miave'itubama, Yaubada 'ada veuveuta faifaina i vona'awaufaufaga ta veluagai. Fai basenadiotoga i venua'ivineda nika 'ana mogitana i souyeni, we'e nani matatabuna i 'i'idewadiga yana nuanua 'ana laubwaina bani'odi. 12 'Ima me Diu 'a kumeta yama vetumagana 'a yatoi Keliso 'waineye bega Yaubada magemagetana 'ana subia i na veluagai. 13 'Omi wata bani'odi, Yaubada yana Vona tonovina 'wa nogai, Vonanina 'asa'aiana Iesu Valana 'Atumaina 'ami 'ita'ita'i faifaina. Tutuyanina 'wa vetumagana Keliso 'waineye, Yaubada yana tugusa i yatoi 'waimie, tugusanina 'Anu'anunu Magemagetana i agemi, bani'odi basenadi Yaubada i vona'awaufaufa i na tauyeni 'waideye. 14 'Anu'anunu Magemagetana 'wainega Yaubada i veakutagonida 'ida yana tomotoga mogitana, yada 'eba 'isa 'awaie 'ada veuveuta ta na veluagadi 'wainega. Fai 'Anu'anununina i ageda, ta 'asetai 'awaie Yaubada i na yavuda sakona matatabuna 'wainega. Naninidi faifaidi Yaubada Magemagetana ta na subisubiai.
Faulo i velu'ui nuanuana me Efeso i na 'asetai Keliso bwaikaotogina
15-16 Fai Yaubada yana nuakalikali bwaikaotogina 'ida yana tomotoga 'waideye, tutuya matatabuna a vevekaiwa 'waineye faifaimi. Basenadi valami a nogai yami vetumagana toketokena 'ada Toveimea Iesu 'waineye wata Yaubada yana tomotoga 'wa nunuakalikaliedi, tutuyanina 'wainega i maiga 'asiau faifaimi a vevelu'ui-vebogi, kebu tamu tutuya a da venuafanimi. 17 Wata a vevelu'ui, nuanuaku 'ada Toveimea Iesu Keliso yana Yaubada, taunina Tamada Magemagetana, nuamageta i na velevelemi wata taunina i na sisivemageseni 'waimie nika yami 'aseta Yaubada faifaina i na vevebwaika. 18 Wata nuanuaku nuami i na magetadi bega 'wa na 'asetai i venua'ivinemiga 'ita'ita'i 'wa na veluagai, naninina bwaikaotogina faifaina ma yami vetumagana 'wa lulukamata. Begaidi nuanuaku 'wa na 'asetai 'ida tomotoga yana 'ai'aiwabu magemagetana, 'asa'aiana yana kukuafou. 19-20 [c]Wata nuanuaku 'wa na 'asetai Yaubada yana toketokena bwaikaotogina i folofolova 'ida 'ana tovetumaganavo 'waideye, kebu tamu aitoi yana toketokena bani'odi. Toketokenanina 'wainega Keliso i sivetovoia wafayega i vemiabuia 'ana 'atagiega, abame ma yana veimea i miamia. 21 I veveimea abama tabwaotogineye, taunina bwaikaotogina kebu tamu aitoi bani'odi. Kini, toveimea tulina tulina, anelose, yaiaina, kabemani, tomotoganidi toketokedi ma 'adi ve'ililibu tutuya de'e 'waineye wata tutuya i mimaiga 'waineye, matatabudi 'adi wagava sai'afo, we'e Keliso bwaikaotogina. 22 [d]Yaubada Keliso i silakai, nani matatabuna i veveimeyedi, wata i venua'ivineni i veto'isave'avina 'ida tovetumagana 'ada 'aila'a 'waineye. 23 Yana 'aila'anina 'asa'aiana tomogona, i kikiavetoketokei wata i 'i'isave'avini bega kebu tamu ava'ai 'wainega i da ve'ale'usa. Wata bani'odi ma yana toketokena nani matatabuna abame wata fwayefwayeye i 'i'isave'avinidi.
EFESO 2 ->