3 IONI
Ioni yana kiluma 'ana vetonu
'Eba kiavemageta
Lubulubu de'e 'ana vetonu Ioni i kilumi siwe kebu 'ana wagava i da yatoi, 'asa'aiana i vo, Yau 'auvea, yamu to'edakumeta 'waikuyega.” Lubulubunina i kilumi i nago tamu tovetumagana 'waineye, 'ana wagava Gaiasa. Yana kilumanina 'waineye i awave'atumaieni yana 'isave'avina Yaubada yana tofolovavo faifaidi. We'e tamu tovetumagana 'ana wagava Diotilifi yana sauluva i awavesakoyeni. Lubulubu de'e 'ana 'idi side bani'odi.
Vona-vekaiwa. 1:1-4
Gaiasa 'ana awave'atumai. 1:5-8
Diotilifi 'ana awavesako. 1:9-10
Dimitilasi 'ana awave'atumai. 1:11-12
Yana 'alanuai. 1:13-15

1 [a]Yau Ioni, 'amu to'isave'avina, a vekaiwa 'omu iaku Gaiasa 'waimuye, 'u vetumagana Yaubada 'ana 'aseta mogitana 'waineye bega a nuakalikaliemu. 2 Iaku, a vevelu'ui faifaimu bega kebu tamu vita i na sousouyeni 'waimuye wata 'amu lautonova matatabuna 'atumaidi, bani'odi yamu folova wata yamu sauluva 'akonadi 'atumaidi Yaubada mataneye. 3 A 'asetai yamu folova wata yamu sauluva 'atumaidi Yaubada mataneye, fai edavo tovetumagana 'ifwaidi i maia i lu'ivona 'waikuye, ma yamu 'idumwebika Yaubada 'ana 'aseta mogitana 'u vevematayakeyakeni. Valamunina faifaina a sosoana mogitana. 4 Nani fuedi faifaidi a sosoana, siwe 'ai'edi a na nogai natukwavo Keliso yana 'Aila'a, Yaubada 'ana 'aseta mogitana i na vevematayakeyakedi, 'eba sosoana bwaikaotogina 'waikuye.

Gaiasa 'ana awave'atumai

5 Iaku, mogitana 'omu ma 'amu vetumagana 'u folofolova edavo tovetumagana 'waidie. Tovetumagananidi 'ifwaidi taunidi tolau'age-vuvua, 'ifwaidi 'u 'isa'inanadi 'ifwaidi 'u bavuyedi, siwe matatabudi 'u 'i'isave'avinidi. 6 I veifufu Keliso yana 'Aila'a 'waidie yamu 'aivaita wata yamu nuakalikali faifaidi. I na tautauyaga, nuanuaku 'u na 'ivaisedi 'adi 'ibua 'u na veleveledi, nika Yaubada i na sososoana yamu folova faifaina. 7-8 'Ida Keliso yana 'Aila'a i lubwaineda tomotoganidi ta na 'i'ivaisedi, fai yadi 'atamana i 'iawedi i lalau'age-vuvua Keliso faifaina. I lalau'age, kebu tamu 'aivaita i da veveluagai Yaubada 'ana tobavu 'waidiega. Ta na 'i'isave'avinidiga, 'asa'aiana matatabuda ta ve'ivaivaita bega Yaubada 'ana 'aseta mogitana valana i na vebwaika tomotoga 'waidie.

Diotilifi wata Dimitilasi faifaidi

9 Basenadi tamu yaku lubulubu a kilumi tovetumaganavo taiadi 'wa miamianiga 'waidie siwe Diotilifi, kumanina nuanuana i na veto'edakumeta 'waimie, yama nuanua i vedumwe'ai'aiedi. 10 Tutuyanina a na wai, yana sauluva sakoidi a na lu'ivoneyedi 'waimie. I vevebonaivoyema wata i awavesakoyema, siwe wata tamu sauluva sakoiotogina i 'i'idewai. Tutuyanina Yaubada yana tofolovavo i le'wale'waga i baibaila wata 'ai'edi egavo nuanuadi i na lu'uma'umaiedi, i tatalabodedi. We'e 'ai'edi egavo i na lu'uma'umaiediga, i na veugeugedi Keliso yana 'Aila'a 'wainega.

11 Iaku, a nuakalikaliemu, sauluva sakoidi kebu 'u na vevetutuyamedi, nuanuaku sauluva 'atumaidi 'u na vevetutuyamedi. Egavo i vevesauluva 'atumaina taunidi Yaubada natunavo, we'e egavo i vevesauluva sakoina taunidi kebu Yaubada i da 'asetai.

12 Tomotoga fuedi i vo, Dimitilasi yana sauluva 'atumaidi.” Bani'odi i voneyediga vona mogitana fai yana sauluva tonovidi. 'Ima wata bani'odi 'a awave'atumaieni, fai 'akonadi 'wa 'asetama 'a veveifufuga vona mogitana 'wainega.

Yana veifufu nuakalikali 'ana 'eba ve'a'ava

13 Nuanuaku 'waimie a na veifufu manamanawena, siwe kebu kiluma 'aisena 'wainega. 14 A nuani 'awaie tauniotogiku a na wai taiadi ta na veifufu.

15 A vevelu'ui faifaimu, nuanuaku Yaubada nuanua bikana i na velevelemu mia 'atumaina taiadi. Emwavo de'e bei yadi vekaiwa i vetunei 'waimuye. Nuanuaku edavo taiadi 'wa miamianiga, matatabudi 'waidie 'u na lu'ivona yaku vekaiwa.

'Asa'aiana bani'odi,

Ioni