2 TIMOTI

Faulo yana kiluma 'ana veluga Timoti 'waineye

'Eba kiavemageta

De'e Timoti yana lubulubu 'ana veluga. Lubulubunina Faulo i kilumi Loma 'wainega tutuyanina i miamia vanuga yogona nageneye. I yatoiga vanuga yogona nageneye fai i lalau'age Iesu Keliso faifaina. Faulo i nuani sai'afoga i na luvewafai, bega tutuyanina 'waineye lubulubu de'e i kilumi.

Timoti Faulo 'ana to'aivaita taiadi i folofolova, wata taunina tovetumaganavo Efeso 'waineye 'adi to'isave'avina. Timoti wata Faulo ma fuedie i vetumagana Keliso 'waineye bega i ve'awa-natuneni. Lubulubu de'e nageneye Faulo i veifufu yana nuakalikali Timoti 'waineye faifaina, wata vitanidi Keliso 'ana tovedumwe'ai'ai 'waidiega, nuanuana 'waidie i na tokemaigeni. Wata Faulo nuanuana Timoti taunina i na tauyeni ve tonovidi 'waidie. Lubulubunina 'ana 'idi side bani'odi.

Faulo yana vona-vekaiwa Timoti 'waineye. 1:1-2

Faulo yana vekaiwa Timoti i vetumaganaga faifaina. 1:3-7

Timoti i lubwaineni ma yana tokemaiga i na 'idumwebika yana folova 'waineye. 1:8-2:13

Tugusa i na veda ava'aibe bei mogitana Keliso yana tofolova. 2:14-26

Tutuya 'ana 'eba ve'a'ava 'waineye, tomotoga yadi sakona i na vebwaika-'afo'afo. 3:1-9

Faulo yana velu'ase'ase wata yana matakia Timoti yana folova faifaidi. 3:10-4:5

Faulo 'ana vebae wata yana nuanua. 4:6-18

Yana 'alanuai wata yana vona-vekaiwa 'ifwaidi. 4:19-22

3 Timoti, lovana wata 'aiata ma yaku vekaiwa faifaimu a vevelu'ui Yaubada 'waineye, kumanina faifaina a vetofolova. 'Aku vebae 'wainega a 'asetai a folofolova 'atumaina, tubukwavo basenadi bani'odi. 4 Yamu 'we'wela a nuanuani tutuyanina a 'iawemu bega nuanuaku bwaikina wata a na 'isemu a na sosoana mogitana. 5 [b]Yamu vetumagana toketokena Keliso 'waineye a nuanuani, vetumagananina nagami i 'eno'eno inamu Iunisi wata tubumu Loise 'waidie, we'e tutuya de'e a 'asetamu 'omu wata bani'odi ma yamu vetumagana toketokena. 6 Basenadi nimaku a yatoi 'waimuye a velu'ui, Yaubada 'amu veuveuta i velemu yamu folova faifaina. Fai yamu vetumagana mogitana i 'eno'eno, nuanuaku veuveutanina 'u na sisi'augi. 7 'U na sisi'augiga fai 'Anu'anunu Magemagetana Yaubada i veledaga kebu yada 'eba ve'awamayamayaga, yana 'aivaita 'wainega ta vevetoketoke, ta nunuakalikali wata taunida yada sauluva ta 'i'isave'avinidi.

8 Toketokena i velemuga, bega 'ada Toveimea Keliso 'ana vetolu'ivona faifaina kebu 'u na bunumayaga, wata yau Keliso faifaina vanuga yogona nageneye a miamia, kebu 'u na bunumayageku. 'U na vevetolu'ivonaga Iesu Valana 'Atumaina faifaina, vita 'u na veveluagadi yau bani'odi, siwe kebu 'u na kolologa 'u na tokemaigemu fai Yaubada toketokena i na velemu, 'amu vita 'adi fata bani'odi. 9-10 Yaubada i 'ita'ita'ieda wata i venua'ivineda bega yada sauluva magemagetana mataneye. Kebu tamu yada folova 'atumaina faifaina i da venua'ivineda, we'e fai taunina yana nuanua wata yana nuakalikali 'waidiega. Bola fwayafwaya kebu i da 'idewaiga ma yana nuakalikali i vesauluva 'atumaina 'waideye Iesu Keliso 'wainega, we'e tutuya de'e Iesu Keliso 'ada To'ita'ita'i yana mai 'wainega nuakalikalinina i vemageta. Keliso wafa yana toketokena i ve'a'avai wata Valana 'Atumaina 'wainega mia 'atumaina wata miamia-vagaina i sivemageseni.

11 [c]Yaubada yana venua'ivinayega i veimeyeku Valanina 'Atumaina faifaina a vetomata'aulele, a vevetolu'ivona wata a vetove. 12 A vetolu'ivonaga begaidi vita a veveluagadi, a miamia vanuga yogona nageneye, siwe kebu tamu sai'afo a da bunumayaga fai a nuani wata a 'asetai kumanina 'waineye yaku vetumagana a yato-vagaseni. A 'asetai mogitana nani matatabuna a 'anivelenedi 'waineye i na 'i'isave'avinidi i na nagoga yana 'Aiata Bwaikina 'waineye i na vila-vaitugani.

13 Fai ta miave'itubama Iesu Keliso taiadi, ta nuakalikali wata ta vetumagana 'waineye, begaidi nuanuaku ve tonovidi 'waikuyega yamu 'eba 'isa, 'waidiega 'u na veve tomotoga 'waidie. 14 Yaubada 'ana 'aseta mogitana i velemuga 'u na 'i'isave'avini, i lubwainemu 'ada labilabina 'Anu'anunu Magemagetana yana toketokena 'wainega, 'asetanina 'ai'aiwabuna 'u na ve'isabodebodeni.

15 'Akonadi 'u 'asetai tutuyanina vanuga yogona nageneye i yatoku, tovetumagana matatabudi 'awalawa Eisia nageneye i degaloveku, tomotoganidi 'waidiega 'adi 'ailuga side 'adi wagava, Fisilasi wata Elimotini.

16 We'e tamu, 'ana wagava Onesifolasi tutuyanina a miamia vanuga yogona nageneye kebu i da bunumayageku, i mimai i fogefogeku wata i 'ivesosoaniku. Begaidi a vevelu'ui nuanuaku 'Auvea i na vevesauluva 'atumaina taunina wata yana 'aila'a 'waidie. 17 Tutuyanina i le'wa Loma, i lualeku i nagoga nika i veluagaku. 18 'Awaie Keliso yana vila-vaitugana 'waineye, nuanuaku 'Auvea i na 'isanuakalikalieni. We'e tutuyanina 'a miamia Efeso, Onesifolasi yana 'aivaita 'waikuye 'akonadi 'u 'aseta'a'avadi.

2 TIMOTI 2 ->