1 Wo wéni mî loo, u kuwó dini ghi ngê Yesu ngê u dyépi pyile njini mbu mbêmê ńuwo, yi pi dmi Pita, Njems mbwémi Njon. 2 U dyépi pyile knî yi ngópu, Yesu u mo u nâmo ye mînê ghê wo, kââdî ntee a pil꞉apil꞉a yédi, kwódo ng꞉oo dmi yinté ye a pyodo. U kpîdî d꞉ud꞉umbiy꞉e kpaapîkpaapî ngê pyodo, myedoo a wuu mbele. [a] 3 Yi dini ghi ngê yi pini pyile knî y꞉oo Ilacha pini dê Mósisi Yesu u k꞉ii danêmbum têdê m꞉uu tumo. 4 Pita ngê Yesu ka kwo, A lémi. Kwo, U p꞉o chi yé, cha ńuw꞉o nmo. Kwo, U yi ṉga choo kwo knomomê, ye ngomo pee pyile nînê t꞉emî, kwo, ṉêni ngmê, Mósisi u nêni ngmê, Ilacha u nêni ngmê. 5 Pita ngê danêmbum ghêlî dêpê kêlî ngê, wod꞉oo nkalî too pee kpaapîkpaapî yi pwo ngmê yó. Yi nkalî too pee u mênê dnye ngmê ny꞉ee ngópu, yepê, Kî a tp꞉ee njini, u nuu ghi a nódo a tóó, dye ghi yintómu a nuu u kópu ye d꞉uud꞉uu too. Yepê, U kwo ntênê dmyinê ng꞉aa. 6 Dini ghi n꞉ii ngê u dyépi pyile knî y꞉oo yi dnyeni yi ny꞉ee ngópu, nkîngê ngê y꞉ay꞉a pwiyé dniye, kwódokwódombiy꞉e têpê mbêmê dyimê dniye. 7 Wod꞉oo Yesu ye a loo, kêê yi p꞉uu yó, yepê, Namê nkîngê, a pii dmyeno. 8 Yi vyu dniye, apê, Pi u chii daa kwo. Apê, Yesu u mo mu kwo.

9 Mbu paa dini ghi n꞉ii ngê dnya a wupwo, Yesu ngê yepê, Kópuni dmyi m꞉uu ngmê, pi ka ghêlî nangê vyi. Yepê, Kpêênî mwiyé anê pyidu, pi knî ye u ngwo dpî vyi yó. 10 Wod꞉oo yi tpóknî Yesu ka póó dniye, kwo, Lukwe dîy꞉o dêêpî pyu knî y꞉oo ala kópu a tpapê ngmê, apu, Ilacha mwiyé wa t꞉aa, pini n꞉ii Chóó Lémi ngê a ngmidi ngê, yi pini dîyo kuwó ada a kwo? [b] 11 Yesu ngê yepê, Nyââ. Yepê, Ilacha u taataa mwiyé, tpile yintómu yi l꞉âmol꞉âmo u l꞉êê dîy꞉o. 12 Yepê, Ngmênê ala kópu ny꞉ee yó. Yepê, Ilacha ntee pini wunê kî ta, a maa yinê a yó, ngmênê kada pini knî y꞉oo daa mya ngópu, kópuni dono yi nuw꞉o ngê ye vyu, yi kópu u ngwo d꞉uu ngópu. Yepê, Myenté, yinté kópu a nga amyeyi d꞉uu ngmê. Yepê, K꞉omo tpile nê Chóó Lémi u Pi Ndêndê, ngmênê daa myeme noo. [c] 13 Ilacha p꞉uu kópuni ye mwiyé a vyu, yi ngwo mînê w꞉ee ngópu, apê, Kî Njon Baptist p꞉uu nmo danêmbum. [d]

14 Yesu, u dyépi pyile knî yi k꞉ii, dini ghi n꞉ii ngê yoo vy꞉o mêdê diyé dniye, pi ngmê Yesu ka a loo, yu mbodo dê y꞉e k꞉ame u kwo ghê wo, 15 kwo, A lémi. Kwo, U ntââ a tp꞉ee ṉga wa ch꞉anê? Kwo, Nyuno pwopwo u ngwo a t꞉a, a mgînî vyîmî ndîî yédi. Kwo, Dye ghi knî ngmê ngê ndiya dpî d꞉ii, dye ghi knî ngmê ngê mbwaa paa dpî d꞉ii. 16 Kwo, M̱꞉uu ndiye pyu knî ye kîd꞉a ńuw꞉o, ngmênê a ka doo pyi ngópu. 17 Yesu ngê yepê, Nmyo yoo dono, lukwe dîy꞉o Chóó Lémi ka dp꞉ee kêlîmî té? Yepê, M꞉ââ yémi nmyi vy꞉o anî kwo, u dî Chóó Lémi ka mb꞉aamb꞉aa ngê anmyin꞉aa kêlîmî? Yepê, Yi tpémi a ka a ńuw꞉o yó. 18 Yi tpémi ngê kmênani dpîmo kwo, Yesu ngê ngm꞉ii kwólu, yi tpémi yi ngwo mê pyiyé wo.

19 Dini ghi n꞉ii ngê Yesu p꞉uu ndiye pyu knî yi k꞉ii yi mo dnyen꞉aa ya, u kwo póó dniye, kwo, Lukwe dîy꞉o dp꞉oo u ntââ dé, yi kmêna dp꞉oo ngm꞉ii kwólu? [e] 20 Yesu ngê yepê, Mu kópu u dîy꞉o nmyi kêlîmî têdê. Yepê, Ndê kópu nmye ngmên꞉aa tpapê, yepê, Chipa w꞉uu u mênê w꞉uu n꞉ii a kwo, yi tpile daa ndîî tp꞉oo, apii? Yepê, Nmyi kêlîmî wo yintoo, ye kî mbwini ka pîdmyi vyi ngmê, Kada a yéni, mwada y꞉i nyi ghé, yepê, yi kópu ntênê paa d꞉uu, mwada y꞉i paan꞉aa ghê. Yepê, Kópu ngmê doo u ntââ ngê nmye daapê tóó. [f] 21 (-)

22 Dini ghi n꞉ii ngê Yesu, p꞉uu ndiye pyu knî yi k꞉ii, Nkálili Wee u kwo mê diyé dniye, Yesu ngê p꞉uu ndiye pyu yoo nipi a danê too, yepê, K꞉omo tpile nê Chóó Lémi u Pi Ndêndê, ngmênê yoo dono yi kêê k꞉oo wanî ghê. 23 Yepê, Yi yéli y꞉oo wa vya nê, ngmênê wo pyoloni ngê amênê pyidu. Yi ngwo p꞉uu ndiye pyu yoo yi nuw꞉o dmi d꞉ud꞉umbiy꞉e dono ngê pyodo.