1 U kuwó dini ghi ngê nmî Lémi ngê pi mê pyud꞉oy꞉a mê miyó ngmidi ngê, yepê, P꞉aani p꞉aani a kada miyó miyó choo kwo. 2 Yepê, Chóó Lémi u yâpwo têdê y꞉i nté dêdê ghêdê, ngmênê nté mgîpî pyu mdoo daa tóó. Yepê, Yâpwo têdê chóó ka dmyinê ngêpê, nté mgîpî u l꞉êê dîy꞉o pi knî nmye mupêdê kê ngê. 3 Yepê, Dpî lee dmyeno. Yepê, Y꞉ee tîmêlyu yi vy꞉o kêmkêm tp꞉oo w꞉uu ntee tpile ngê anmyi pyaa dmi. 4 Yepê, Ndapî nangmê ńuw꞉o, ndapî yiyé têdê u tpile nangmê ńuw꞉o, nmyi yi dópo kn꞉aani nangmê ńuw꞉o. Yepê, Gha pi yoo nmye adnyin꞉aa a vyuwo. Yepê, Maa p꞉uu danêmbum ngê kêê nangê t꞉oo. Yepê, Lîmîlîmî ngê dmyinên꞉aa dpodo, mgî kîdmyengê pwaa ngmê.

5 Yepê, P꞉aani p꞉aani a kada miyó miyó choo kwo. Yepê, Pini n꞉ii dê ngomoni k꞉oo dpîmo koko knomomê, yi ngomo chóó ka ala kópu dny꞉oo tpapê, Mw꞉ââkó, Chóó Lémi ngê ṉyoo knî yi k꞉ii a ngee nmyine. 6 Yepê, Yi ngomo chóó ngê yi pini dê yi wépi dê adî pwapî dê, ye kópuni mwiyé u kwo adpî tpapê, yi kópu ye amêda a diyédiyé. Yepê, Yi ngomo chóó ngê u yi adî kwo, Chóó Lémi ngê a ngee nmîne, ye wa ngee té. 7 Yepê, Pini n꞉ii dê ngomoni k꞉oo adpî koko, y꞉i dny꞉oo kwo, kn꞉aa mêkîngê lee knî. Yepê, Yi tpódu yi ngomo k꞉oo dny꞉oo kwo, y꞉i dny꞉oo kmaapî, mu kópu u dîy꞉o pi módó daa dpodo yédi, u dpodo u pywuu dpo ngee. *1 Kódin 9:6-14; 1 Tim 5:18 8 Pini n꞉ii dê p꞉aani n꞉ii dpîmo taataa knomomê, yi p꞉aani tpémi y꞉oo yi tpódu yi dnye dê dpîmo nyêmî knomomê, ntini n꞉ii yi l꞉êê dîy꞉o adnyi l꞉âmol꞉âmo, dny꞉oo pîpî, 9 yi p꞉aani u pwopwokopwe dpî pyi téne, ala kópu ye dny꞉oo tpapê, Dini ghi n꞉ii nmo t꞉âât꞉ââ, Chóó Lémi ngê u yoo chóó u ngwo ada a y꞉enê, yi dini ghi daa kêmakêma a dyimêdyimê.

10 Yepê, Pini n꞉ii dê p꞉aani n꞉ii adpîn꞉aa taataa, pi knî y꞉oo yi wépi dê adnya a pwapî dê, ye yi ngópu kââ puu ghê dny꞉oo a wowo, ala kópu tââ ye dny꞉oo tpapê, 11 Nmyi p꞉aa u têpê nyi yi yodo p꞉uu nye vyavya, ala kópu u ngwo dpo w꞉ee yó, Ala dp꞉oo Chóó Lémi u yoo. Yepê, Ala kópu ye myedny꞉oo tpapê, Dini ghi n꞉ii ngê Chóó Lémi ngê u yoo chóó ada a y꞉enê, yi dini ghi daa kêmakêma a dyimêdyimê, ngmênê Chóó Lémi ngê daada a y꞉enê nmyo, wa mb꞉ii nmyo, mu kópu u dîy꞉o dmyi mb꞉ii nyo. *Dpodo 13:50-51; 18:6 12 Yesu ngê p꞉uu ndiye pyu knî ye yepê, Ndê kópu nmye ngmên꞉aa tpapê, Wéni n꞉ii ngê Chóó Lémi ngê Sodom a pw꞉oo ngê, dnyinté a kpada too. Yepê, P꞉aani n꞉ii tpémi y꞉oo adnya a mb꞉iimb꞉ii nmyo, kuwókuwó wéni ngê Chóó Lémi ngê dnyinté daawa kpada té. 13 Yepê, Kódasin tpémi dny꞉oo nkîngê, Mbetîsaida tpémi myedny꞉oo nkîngê. Yepê, K꞉omo tpile mbwudu yi ngópu yilî nî chópu, ngmênê yi dono doongê kéé tumo. Yepê, Taiya p꞉aani dê Saidon tpémi yi ngópu yinté kópu ndîî w꞉aangmê d꞉uu ngê, ye k꞉omo tpile daa Nju tpémi, ngmênê yi dono yilî lîmîlîmî ngê pî kéé tumo, yi mbodo dmi pêdê ny꞉ii ngópu, tpéé kópu myepî vyi ngópu. 14 Yepê, Kuwókuwó wéni ngê Chóó Lémi ngê dnyinté wa kpada té, ngmênê Kódasin p꞉aani dê Mbetîsaida tpémi dnyinté daawa kpada té. 15 Yepê, Kîpêêniyêm tpémi myedny꞉oo nkîngê. Yepê, Yi chóó yi pi dmi mbóó p꞉uu a kmîmî t꞉oo, ngmênê yi kpadakpada têdê wa lee dmi.

16 Yesu ngê p꞉uu ndiye pyu knî ye yepê, Pini n꞉ii ngê nmyi dnye dmi a nyêmî ngê, daa nmyi mo nmyi dnye dmi ye nyêmî ngê, a dnye myeye nyêmî ngê. Yepê, N꞉ii ngê dpî mb꞉ii nmyo, daa nmyi mo dpî mb꞉ii nmyo, myoo mb꞉ii nê, daa a mo dpî mb꞉ii nê, n꞉ii ngê a dy꞉ââ noo, myoo mb꞉ii.

17 Dini ghi n꞉ii ngê Yesu ka u dpodo pyu pyud꞉oy꞉a mê miyó mêdê diyé dniye, kwo, Nmî Lémi. Kwo, Dpodo têdê w꞉aa nm꞉uu pyw꞉ângo. Kwo, M̱i mbêmê daa mbii pyu yoo yi mo nmeen꞉aa pyipyi dé, n꞉ii knî y꞉e yi kmêna dnye kwo, my꞉oo pyi too, yi kmêna y꞉e nmî ngm꞉ii kalê too. 18 Yesu ngê yepê, Nyââ, Lîmî u wuu ndîî ngê ntee a tóó, ngmênê mêdaa ya yédi, yinté tpile ngmênî módu. Yepê, K꞉omo tpile dyámê mbêmê tpémi yi pwo Setan u pi ndîî ngê doo ya, ngmênê ala ngwo da ghay, mbwódo d꞉uu d꞉ii. *Njon 12:31; Tpyuu 12:8-9 19 Yepê, U ntââ ngê dî pyódu nmyo, k꞉omo tpile mg꞉ee tpile pê yi vy꞉o anmyin꞉aa m꞉ii, ngmênê kópu nmye daangmêwa pyódu. Yepê, Setan ngê ló kópu nmye ngmadî d꞉uud꞉uu, wa dîpî. *Mak 16:18 20 Yepê, Ala kópu nangê vyi, W꞉aa dpo pyw꞉oo, pi knî y꞉e yi kmêna nmî ngm꞉ii kalê too, ngmênê ala kópu dpî vyi yó, W꞉aa dpo pyw꞉oo, mu kópu u dîy꞉o Chóó Lémi ngê u yoo kamî vy꞉o dê kaa nmo. *Pilipay 4:3; Tpyuu 3:5; 20:12

25 Yélini y꞉oo Yesu dnye ng꞉aang꞉aa, yi vy꞉o dêêpî pyu ngmêdoo kwo. U yi u ngwo doo kwo, Yesu nî dóó, wod꞉oo ghêêdî wo, Yesu ka kwo, Mââwe. Kwo, Ló kópu ngmanî d꞉uu, ghê kamî u ngwo anê pyw꞉oo, ghéni n꞉ii chedê ngê daawa pyódu? 26 Yesu ngê kwo, Nangê lónté? Kwo, Puku yedê angênté a tóó? 27 Yi pini ngê Yesu ka kwo, Ala dêêpî kópu kada a tóó, Chóó Lémi u nuu ghi nmyi nódo mb꞉aamb꞉aa ngê choo ya. Kwo, Chóó Lémi nmyi gha vy꞉o choo ya, dye ghi yintómu p꞉uu dmyinê nuw꞉o, u nuu u kópu yidmyinê d꞉uud꞉uu dé. Kwo, Yi dêêpî kópu u kuwó alani a tóó, kwo, Ṉ́yóó ṉuu ghi ṉódo ntee a tóó, yoo yi nuu ghi dmi ṉódo yinté myechoo ya. *Deut 6:5; Lev 19:18 28 Yesu ngê kwo, Ndê kópu yichi vyi. Kwo, Yi kópu dê anyi d꞉uud꞉uu dê, ye ghê kamî u ngwo anyinê pyw꞉oo. *Lóma 10:5; Nkal 3:12

29 Pi yilî yi nuu ghi dmi yi dêêpî pyu nódo dêpwo ya, wod꞉oo u yi u ngwo doo kwo, Yesu ngê ala kópu a ka vyi ngê, Daa pi yintómu yi nuu ghi dmi ṉódo yichoo ya. Yi kópu u l꞉êê dîy꞉o Yesu ka póó wo, kwo, Ló yéli yi nuu ghi dmi a nódo ngmadî ya? 30 Yesu ngê mgongo u kwo ngmê kwólu, kwo, Nju pi ngmê, Njedusalem a ndê wo, Njédikó doo lêpî. Maa p꞉uu kpáápi knî y꞉oo mgîmî ngópu, dnye vyee, u ndapî t꞉âmo ngópu, u kpîdî mye t꞉âmo tumo, ntóó kéé ngópu, maa p꞉uu a kuwo ngópu, ngmênê ghê tp꞉oo doo ya. 31 U kuwó dini ghi ngê kpêê yiyé pyu ngmê ngê yi máádi a kwólu. Dini ghi n꞉ii ngê yi pini módu, daa ngópu, u kwo mî loo. 32 Kwo, U kuwó dini ghi ngê Chóó Lémi u ngomo k꞉oo dpodo pyu ngmê ngê yi máádi myedê kwólu. Kwo, Dini ghi n꞉ii ngê yi pini ntóó módu, myedaa ngópu, u kwo myimî loo. 33 Kwo, U kuwó dini ghi ngê Samédiya pi ngmê ngê yi máádi até myeyedê kwólu. Kwo, K꞉omo tpile Samédiya tpémi nmyinê nmye yoo dono dé, ngmênê yi Nju pi Samédiya pi ka ch꞉anê wo. 34 Kwo, U kwo loo, yimo knî yi p꞉uu wain a pii ngê, olipi wulu myedê pii ngê, yimo kwéli dnye ya, kpîdî pee ngê kwédi kê too, apê, Mb꞉aamb꞉aa ngê mê paa pyaa we. Kwo, U kuwó dini ghi ngê yi pini ntóó chóó u ndonki pyipwo yó, p꞉aa ngmê ńuwo. Kwo, Yi p꞉aani ngomo ngmêdoo kwo, maa p꞉uu n꞉ii knî ye mgîdî dpîmo a ghayghay, y꞉i dnyimo dpî. Kwo, Yi ngomo k꞉oo kee knopwo, Samédiya pi Nju pi ka y꞉i doo vyuwo. 35 Kwo, Womumo mw꞉aandiye Samédiya pi ngê yi ngomo chóó ka ndapî miyó y꞉ângo, kwo, Ala pini ka chi vyuwo. Ndapî ntémwi p꞉uu anyi dyênê, amêma amênê wumo té. 36 Yesu yi dêêpî pyu ka póó wo, kwo, Kpaa pyu knî y꞉oo pini n꞉ii vya ngópu, u nuu ghi wu pini pyile knî yi vy꞉o n꞉uu nódo yó? 37 Dêêpî pyu ngê kwo, Pini n꞉ii ka ch꞉anê wo. Yesu ngê kwo, Yinté kópu vyîlo yichin꞉aa d꞉uud꞉uu.

38 Dini ghi n꞉ii ngê Yesu p꞉uu ndiye pyu knî yi k꞉ii p꞉aani p꞉aani dnye lêpî, p꞉aa ngmê taa dniye. Yi p꞉aani pyââ mbwémi miyó doo ya, yi pi dê Mata mbwémi Méli. Dini ghi n꞉ii ngê Yesu p꞉uu y꞉i taa dniye, Mata ngê mênê dóó kalê too, yepê, Dîyo a ngomo k꞉oo nté dp꞉uu ma yó. 39 Y꞉i taa dniye, mbwódo yi yaa dniye, Yesu ngê yoo doo ndiye kîgha dé. Méli a loo, yu km꞉ee mî yaa wo, Yesu doon꞉aa ng꞉aang꞉aa. *Njon 11:1-2; 12:2-3 40 Mata u nuw꞉o dono ngê pyodo, apê, Kî mââwe yi t꞉aa, lukwe dîy꞉o nté dyêêdî ngmidi dnye chono, wod꞉oo Yesu ka kwo, Mââwe. Kwo, Ṉga d꞉oo ch꞉anê wo, a mo anî nté ch꞉eech꞉ee? Kwo, Méli daanyinê dy꞉ââ, daamî ngee nê? 41 Yesu ngê kwo, Mata. Kwo, Kidimê nod꞉enod꞉e. Kwo, Kópu yilî kidimê nuw꞉onuw꞉o. 42 Kwo, Kópu mu ngmidi u ntââ. Kwo, Méli u nuw꞉o kópuni p꞉uu a kwo, yi kópu yi mb꞉aamb꞉aa. Kwo, Yi kópu u kwo daanî kwódu. *Mát 6:33; Njon 6:27

<- Luukî 9Luukî 11 ->