Hibrani 8

Si Isa Imam Nakuraˈten

1 Iye hāti meˈ pinaˈinku si kaˈam miyaˈan inin weˈ kuweˈitu niyaˈ ne Imam Nakuraˈte bi tudju Tuhan. Īˈ iye laˈi si surgaˈ ningkoloˈ si kanawanan Tuhan Mabalakatanin. 2 Laˈi iye magimam si Lugal Tamanan Masutsihin, hātinen laˈi si langgal mabennalin, dumaˈin manusiyaˈ mamatengge iyehin saguwaˈ Tuhanin.

3 Kēmon imam nakuraˈin pinasukuˈan siye hinang magpasampay pī si Tuhan meˈ pangurung meˈ aˈahin duk meˈ kulubanden. Na, Imam Nakuraˈten damikkiyan isab subey niyaˈ pagkulubanne. 4 Bang tuˈu pe iye miyaˈan si dunya, bugtuˈ gaˈi iye magimam, peggeˈ kemuwe matuˈuhin niyaˈ ne meˈ imam duk sa pangandaˈakan saraˈ Yahudihin pasampayde meˈ pangurung meˈ aˈahin si Tuhan. 5 Meˈ hinang meˈ imamin dem langgal tuˈu si dunya kuweˈ lingew hadja peggeˈ ilekkat hadja hinang malaˈi si surgaˈin. Kataˈuhante inin peggeˈ sakaliˈ si Musa sōng maghinang lumaˈ duk kuwit hayep, iye langgalde masaley, sinessaˈan iye weˈ Tuhanin, paˈinne, “Amey-amey lekkatun teˈed bantuk pattaˈ bakas pinakitehanku si kaˈu laˈi diyataˈ punuhin.” 6 Saguwaˈ kuweˈitu hinang si Isa magimamin pasōng hāp amban hinang meˈ imam tuˈu si dunyahin. Damikkiyan isab janjiˈ baˈahu pinapitune pamaghāpne manusiyaˈ duk Tuhanin pasōng hāp amban janjiˈ dehelluhin peggeˈ pasōng hāp meˈ pananggup Tuhanin dem janjiˈ baˈahuhin.

7 Bang gaˈ siˈ miyaˈan niyaˈ sallaˈ-sallaˈ pagjanjiˈan tagnaˈin, na, gaˈ ne siˈ gantiˈan Tuhanin pagjanjiˈan miyaˈan. 8 Saguwaˈ gaˈ kasulutan Tuhanin si meˈ hinangan meˈ aˈa manuhut janjiˈ tagnaˈin. Hangkan paˈinne,

“Niyaˈ waktu si pasōngan ngahinang du ku pagjanjiˈan baˈahu duk kēmon meˈ bangsa Israˈilin. 9 Dumaˈin inin kuweˈ pagjanjiˈanku duk meˈ kapapuˈanden masa pamoˈoku siye paluwas amban lahat Misilin. Gaˈ du tumanande pagjanjiˈanku duk siyehin, hangkan gaˈ ne siye asipku. 10 Na, iye inin pagjanjiˈanku duk meˈ aˈa Israˈilin si pasōngan: Papīku meˈ saraˈkun dem pikilande. Kuweˈ dalil sulatku meˈ saraˈkun diyalem ateyde. Manjari aku ne Tuhan inisbatden duk siye ne meˈ aˈakun. 11 Duk gaˈi ne subey usihatande pagkasiden atawa saweˈden pasal aku, peggeˈ si meˈ ellew miyaˈan kēmon aˈahin amban madiyawaˈ pagaˈanen pī si meˈ mabangsahanin, kēmon siye ngataˈuhan aku du. 12 Ampunku du meˈ duseden duk gaˈi ne essebku meˈ hinangande malaˈatin,” paˈin Tuhanin.

13 Peggeˈ tabissā Tuhanin pasal pagjanjiˈan baˈahuhin, hātinen weˈ andang ne pagjanjiˈan tagnaˈin. Ubus bisan ine-ine, bang andang ne, gaˈ ne niyaˈ kasōnganne.

<- Hibrani 7 Hibrani 9 ->