Hibrani 5

1 Bang niyaˈ aˈa pineneˈ hinang imam nakuraˈ, pineneˈ iye amban pagkasine manusiyaˈ duk kawakilan iye maghinang si Tuhan para si kahāpan meˈ aˈahin. Sōnganne meˈ pangurung meˈ aˈahin si Tuhan duk magkuluban iye supaya ampun Tuhanin duse meˈ aˈahin. 2 Duk imam nakuraˈin, peggeˈ manusiyaˈ du isab iye, niyaˈ du isab kalammahanne hangkan taˈu iye maˈaseˈ si meˈ aˈa masumapeˈ amban Tuhanin sabab awam siye. 3 Duk sabab kalammahannen, hangkan subey dahuˈ iye magkuluban si Tuhan para si meˈ dusenen, ubus bu magkuluban isab iye para si meˈ aˈahin. 4 Gaˈ niyaˈ aˈa makapagbayaˈ mahadje dine duk ngahinang dine imam nakuraˈ saguwaˈ Tuhanin mameneˈ aˈa hinangne imam nakuraˈin, kuweˈ si Harun awwalley hininang iye weˈ Tuhanin imam nakuraˈ.

5 Damikkiyan si Isa gaˈ pahadjene dinen duk iye tahinang imam nakuraˈ. Saguwaˈ pinahadje iye weˈ Tuhanin peggeˈ missā Tuhanin si iye, paˈinne,

“Anakte kew; kuweˈitu aku ne Samanun.”

6 Dem ayat seddili paˈin Tuhanin isab,

“Kaˈu ne mapagantiˈin pu si Malkisadik imam masaley duk pagimamnun gaˈ tamananne.”

7 Katuˈu si Isa si dunyahin magtangis iye duk māku-māku iye papales duk muyuˈ-muyuˈ si Tuhan, peggeˈ Tuhanin hadja makatimbul iye amban kamateyin. Pinakale iye weˈ Tuhanin peggeˈ diyawaˈ pagateynen duk tuhutne teˈed meˈ pangandaˈakan Tuhanin. 8 Bisan iye Anak Tuhanin, makalabey isab iye kabinasahan supaya iye makaˈaya nuhut meˈ pangandaˈakan Tuhanin. 9 Duk pagsakaliˈ jukup ne weˈ ne kēmon pangandaˈakan Tuhan si iyehin, manjari ne iye manimbul meˈ aˈa makahagad si iyehin. Duk urunganne siye umul salama-lama. 10 Duk hininang iye weˈ Tuhanin imam nakuraˈ kuweˈ Malkisadikin awwalley.

Daˈa ilebbahan sandelin

11 Na, pasal ininen, ekka pe batang bissāku saguwaˈ hunit kaˈam pinahātihan peggeˈ iyuˈ ne kaˈam babbal, gaˈi makahāti. 12 Kaˈam iyan subey ne siˈ kuweˈitu makapagusihat peggeˈ tiggel ne panuhutbi Isa Almasihin. Saguwaˈ sampay maˈin subey pe kaˈam inusihatan balik sabab meˈ lapal Tuhan tagnaˈ taˈayabin. Kuweˈ kaˈam dalil meˈ nakanak dikiˈ subey pe kaˈam nusu; gaˈi pe kaˈam mangan kinakan tuwas. 13 Bang aˈahin luwal ne hadja nginum gatas, hātinen, nakanak dikiˈ pe iye, gaˈi pe tagam nuhut mahāpin duk nayikutan malaˈatin. 14 Saguwaˈ bang bahiˈ ne aˈahin, makajari ne iye mangan kinakan tuwas, hātinen tagam ne iye mikil duk kataˈuhanne ne bang ine mahāpin duk ine malaˈatin.

<- Hibrani 4 Hibrani 6 ->