Luke

11 Papuna kanjarna kuyharraw manykawuyhaw. 12 Nyirtingku manyka wangkana ngunatharntu papu, “Papu, nyinta nyurntiwarnayi, nyinta yungkway ngaliyaw ngurrinngaliyu. Nygayi prupi ngurrinngali nyinkarntu yalampa.” Papuna julu yungkuna ngurrinngali ngunatharntu manykawuyhaw.

13 Mirnawa, nyirtingu manyka wantharna ngurray, kraparna muni pangkarringumarnu ngurrarta warruwarta. Nyirtingu manyka yurlumarna juluwarlu muni. 14 Yala ngunana parni jajawa, muni warrimartawa. Maynu ngunana. Nganimakay ngumana? Ngunhangaatu ngurra thaka warrimarta. Ngunana kamungu puwarri. Ngunana mirtaawarlu mankuna thakay. 15 Nyirtinguna jaapu mankuna. Ngunana kraparna thakay yungkway ngurralaw yartmayalaw. 16-17 Yala nyirtinguna kamunguwa. Ngunana ngarrkuna ngurralayarntu thakay.

Ngunana krukanjarna, Ngananyu mirtawarlu ngayu yungkuna thakay. Papula parni maru ngartangali muntiwa ngarrkungu thakay. Maynu ngayi. Ngayi parni kamungu. 18 Ngunana krukanjarna, ngayi kalinjarri papunguwarta. Ngunana krukanjarna, ngani ngayi wangkay papungu. Ngayi wangkay ngunaku, “Wajimunti ngayi parnina. Wajimana nyinkarntu wirrartku. Wajimana Papungarntu Minkalarntu wirrartku.” 19 Ngayi wangay papungu, “Ngayi wajimunti nyinkarntu mirtawa manyka nyirtinguna. Ngayi nyinkarntu mirtawa manyka parni yala. Ngayi warkinman nyinkarntu parni.”

20 Nyirtinguna manyka kalinjarrina ngurrarta. Papuna nawuna manykay warruwaymu kanangkarriyangu. Papuna mirta payawirrina, ngunana ngurruwarnina. Karramana ngunatharntu manykay.

21 Nyirtingunampa wangkana papungu, “Wajimunti ngayi parnina. Wajimana nyinkarntu wirrartku. Wajimana Papungarntu Minkalarntu wirrartku. Ngayi wajimunti nyinkarntu manyka nyirtinguna. Ngayi nyinkarntu mirtawa manyka parni yala.”

22 Papuna yunina ngunatharntu warkinmanngali. Wangkana, “Kanangkarrima murtimarnu. Krapanma klinpala warangali wanthakay ngularta. Jujiku wanthanma jinangka. Murtimanma. 23-24 Ngayintharri kumalamarri ngarrkway. Ngayintharriyarntu yangupala puliman nyurntimanma. Ngayintharri ngarrkway.”

25 Marartana manka kanangkarrina warkamulangu. Ngunana nawuna juluu ngarrkungu.

26-30 Ngunana payawirrina. Papuna wangkana, “Kanangkarrima ngayintharriyarta ngarrkway. Nyinkarntu maraa wantharna ngurray. Yala kalinjarrina ngunana.” Mararta wangkana, “Nyinta ngayu mirta nyurntimana pulimanku. Ngayi parinina mirtawaji.”

31 Papuna wangkana marartangu manykay, “Nyinta parnina ngayhala. Ngani ngarntu nhungkiirri yala, julu nyinkarntu. 32 Ngayuwarta parni ngurru. Nyinkarntu marraa ngurray wantharna. Yala ngunana kalinjarrina. Kuway, kanangkarrima ngayintharriyarta ngarrkway.”

<- Luke 14