Nlir aEzikyel 28

Nlà anung ka̱ apal aponzhi uga aTaya

1 UYawe là nnap ká̱ mi pa̱, 2 <<Á ya anəm, là nnap ûponzhi uga aTaya pa̱, uNəm uga nzhi uYawe là pa̱,

<< <Ka̱kul u yar ishi ɓu chit pa̱ mmaɓu iya̱m iro,

kang ɓu là pa̱, <<Mmami ìnan.

Mmami kà̱ ntəm ka̱ atak ntəm oga ìnan

kà̱ ìshimshe ìwá.>>

Ká̱ nnà te mmaɓu unəm wa pa̱ mwang, ìnan ka̱t,

káp ká̱ nva̱ ɓu nə́m ìkwoksok pa̱ mmaɓu ìnan á.

3 Dər, u ji uDaniyel ji ka̱ aghan,

iya̱m ibwambwambwambwam iro yà ibwambwam ka̱ atak ɓu ka̱t.

4 Ka̱ atak aghan ɓu ká̱ ntàn ɓu, u ya ìdur îshi ɓu,

kang u ɓut azənariya ká̱ aazurfa ka̱ ashe amé mbwai ɓu.

5 Ka̱ atak aghan ɓu aga ǹnyi nnəm ìyap te u nak ìdur ɓu myak,

kang u rup ká̱ ishi ɓu ka̱kul ìdur ɓu.

6 << <Ka̱kul nva̱ ta te uNəm uga nzhi uYawe là pa̱,

<< <U nak ìgwak ɓu chit

wa ìgwak ìnan,

7 ka̱kul nva̱ ta te, mi ɓa ka̱ onəmchən ka̱ apal ɓu,

oga mbín va ɓa̱ng ji pa̱ kpaktak,

oza̱ i zəp oga ndokchi oza̱ ka̱ apal iya̱m ìɓyenɓyen iga aghan ɓu,

kang oza̱ i vyap ìzhàn ɓu.

8 Oza̱ i mandar ɓu ka̱ ashe ache,

kang ɓu kú ikú ìkum kà̱ ìshimshe ìwá.

9 Ǹyangmata̱ te ɓu ləlà pa̱, <<Mmami ìnan>> kà̱ mpyal onəm va̱ gba̱l ɓu ɗò?

Mmaɓu unəm uwà pa mwang, ìnan ka̱t.

10 Ɓu kú wa ikú onəm oga achè amulur ka̱ ashe awó onəmchən,

ka̱kul mmami, uNəm uga nzhi uYawe, n là.> >>

11 Kà̱ɗi te, uYawe là nnap ká̱ mi pa̱, 12 <<Á ya anəm, yə́ng ikú ka̱ apal aponzhi uga aTaya, te là á na pa̱, <Iya̱m va ta̱ uNəm uga nzhi uYawe là,

<< <Mmaɓu va u kúkúr pa̱ mmá ɗyáng nnap ká̱,

ka̱ atak aghan amakmak, ká̱ mɓyen ndər.

13 Mmaɓu ka̱ ashe aEden,

ìram Inan,

uva nza̱ apir ipáng iga mbwai nggo gang izər ɓu,

ipáng irəzang, ká̱ ipáng iga ndəng ìlur iva i ya atak pa̱ halakhalak,

ká̱ ipáng ifə́rfər wa ape, ká̱ ipáng iga ndəng ilyanggu, ká̱ ipáng iza̱mza̱m, ká̱ ipáng iga ndəng ìpəpa,

ka̱ ipáng ikamkam, ka̱ ipáng irəzang, kang ká̱ ipáng iga ndəng agwal ikún.

Mmá mwàk oza̱ ka̱ ashe iya̱m iga nkpə́kpan iga azənariya.

Kà̱ nra va̱ mmá nəm ɓu ká̱ te, mmá gbar oza̱ ka̱kul ɓu.

14 N gar ɓu pa̱ u ta̱l akerup aga mpángchí atak,

n nak ɓu ka̱ apal aɓam ayə́ryər Inan,

u chen kà̱ ìshimshe ipáng apər.

15 Á ɓàn ká̱ nra va̱ mmá nəm ɓu ká̱ te, u yà ka̱ mpat ka̱ ashe nnap nnəm ɓu ka̱t,

á ga chu awalang va̱ mmá ya inga ka̱ ashe ɓu.

16 Ka̱ atak mmak iya̱m ìyap ɓu te,

u yə́l ká̱ nzhì atak pa̱ makmak, u nəm nnap mɓá̱ngɓa̱ng.

A nak te, m ɓàk ɓu wa iya̱m iga ajan ka̱ apal aɓam Inan,

kang n ɓàk ɓu kà̱ ìshimshe ipáng apər, ákerup aga mpángchí atak.

17 Ka̱kul ìɓyen ɓu te nak u rup ká̱ ishi ɓu,

ka̱ atak ìzhàn ɓu te u vyap aghan ɓu.

M mandar ɓu chit kà̱ mbin,

m bol imaləng ɓu kà̱ mpyal oponzhi na oza̱ á dər ɓu.

18 Ka̱ atak mmak iya̱m iɓá̱ngɓa̱ng ɓu ka̱ nlang nnandər ka̱ ashe nnəm ìyap ɓu,

te u vyap oga Atak Ayə́ryər ɓu.

Nna nak te n fa ká̱ apər ka̱ ashe ɓu,

á ri ɓu,

kang n nak ɓu u wal nchwang ka̱ apambin

kà̱ ìwú nkpaktak onəm va̱ ya ɓu á.

19 Nkpaktak onəm va̱ nyi ɓu ka̱ ashe oga mbín te,

oza̱ i tán ka̱kul nɗaktak va̱ ya ɓu,

u ta̱l iya̱m iga nnəm ayər,

ɓu yà lap ka̱t mbyet mbyet.> >>

Nlà anung ka̱ apal aSidon

20 UYawe là nnap ká̱ mi kà̱ɗi pa̱, 21 <<Á ya anəm, dər asa̱l aSidon na ú là anung ka̱ apəpal. 22 Là pa̱, <UNəm uga nzhi uYawe là pa̱,

<< <Dər, mmami kà̱ mmən ìkum ká̱ ɓu, áSidon,

kang mí rup ká̱ mi kà̱ ìshimshe ɓu.

Oza̱ i nyi pa̱ mmami na uYawe awalang va̱ mi pà akwali á ɓu,

kang mi nyám inəna̱n mi ka̱ ashe ɓu.

23 Mi nak oga arwa aɓá̱ngɓa̱ng á ɓu,

kang nchə̀r ka̱ apal oga asa̱l ɓu,

oro va̱ mí gbá̱ng te,

i tak kà̱ ìshimshe ɓu,

mí fa á ɓu kà̱ nza̱ asa̱l awú nggo ká̱ ndokchi.

Te onəm i nyi pa̱ mmami na uYawe.

24 << <Ka̱ apal nzhi àIsa̱rila te, mí ya iya̱m iga nkyép atak ka̱t te izú lap ka̱t, ka̱ atak nkpaktak onəm va̱ gáng oza̱ va̱ yáng oza̱ á. Te oza̱ i nyi pa̱ mmami na, uNəm uga nzhi uYawe.

25 << <UNəm uga nzhi uYawe là pa̱, awalang va̱ mi ɓut nzhi àIsa̱rila ka̱ ashe oga mbín, ka̱ atak va̱ oza̱ lyangshin kà̱, kang mi nyám inəna̱n mi ka̱ ashe oza̱ kà̱ ìwú oga mbín, nna chit te oza̱ i təm ka̱ ashe mbin oza̱ va n na ûkpari mi uYakup. 26 Kang oza̱ i təm ká̱ ikángkáng ka̱ ashishe, oza̱ i me oga nzhi, oza̱ i wap oga iram ìba̱ngba̱ng. Oza̱ i təm ká̱ ikángkáng kà̱ nva̱ng va̱ n pà akwali ka̱ apal nkpaktak onəm va̱ gáng oza̱, ova ka̱ na mɓək anung ôza̱ á. Nna chit te oza̱ i nyi ɗak pa̱ mmami uYawe, Inan oza̱.> >>

<- Nlir aEzikyel 27 Nlir aEzikyel 29 ->