Nlir aEzikyel 24

Nnyám ìpir nnàp ká̱ ngbə̀t nfə́lfə́l

1 Kà̱ nra ngga ngba̱pchi ka̱ ape aga agba̱pchi, kà̱ ìzun iga ìfangzəngtəng, te uYawe là nnap ká̱ mi kà̱ɗi pa̱, 2 <<Á ya anəm, lir aɗin ìlum va̱ ta̱. Ìlum va ta̱ ì yà uponzhi oga aBabel gáng aUrushelima ká̱ ìkum. 3 Là nnap ká̱ nzhi ngga nfa iya̱mkak ka̱ ashe ngba nnàp pa̱, <UNəm uga nzhi uYawe là pa̱,

<< <Cher ngbət, cher ka̱ apal apər,

yə́l ká̱ ndəng.

4 Mwàk ìzhe ìnyatnyat ka̱ ashishe,

nkpaktak ìnyatnyat inəna̱n,

ìsong ká̱ agàr, yə́l na ká̱ oga akup ayákyàk.

5 Yak iya̱m nkang inəna̱n va ji pa̱ kpaktak,

mwàk oga agətər akun ka̱ avəvəng,

pə́k na nzəng ká̱ oga akup va̱ ta

á yal pa̱ dakdak.

6 << <Dər, iya̱m va ta̱ uNəm uga nzhi uYawe là,

<< <Á lak ká̱ ɓu chit á ìtong iga ntar nchə̀r,

wa ngbət acham va adədak arəzang nna fa chit ka̱t.

Wur ìzhe ìnyatnyat va̱ ka̱ ashishe á fa pa̱ ìzəngzəng,

kang wa yak ka̱t.

7 Ka̱kul nchə̀r va̱ uza̱ tar te nna kà̱ ishimsheshimshe,

uza̱ zuk na ka̱ apal ipáng,

uza̱ zuk kà̱ mbin pa̱ na ô dəp ka̱t.

8 N nak nchə̀r va̱ nna tar ka̱ apal ìpáng,

le kang mmá dəp ka̱t,

ka̱kul na á bəshi ìgwak á mi,

na m pyát akə́kat.

9 << <Dər, iya̱m va ta̱ uNəm uga nzhi uYawe là,

<< <Á lak ka̱ ɓu chit á ìtong iga ntar nchə̀r,

mmami ká̱ ishi mi,

mi ɓut agətər ka̱ avəvəng pa̱ makmak.

10 Ɓut oga agətər akak, ma̱l apər, pə́k ìzhe va̱ ta pa̱ dakdak,

gwang oga iya̱m iwuwu ka̱ ashishe, kang ɓù re oga akukup ì shì.

11 Cher ngbət nlakchi ka̱ apal amor, na á sur,

na achəcham arəzang á pwák, na adədak á sərak ka̱ ashishe, kang adak aga ìjilijili ì shì ì le.

12 Uza̱ na mɓək anung îshi wò, kang mmak adədak fa ka̱t.

Te nak adədak ka̱ ashe apər.

13 << <Ka̱ ashe mmai ɓu te adak nna yà, n nàl ɓu chit, kang adak ɓu fa ka̱t. Te ya ɓu fa lap ka̱t, i ga i chu ìlum va̱ nnyám nfə́l ìgwak mi ka̱ apal ɓu i kùr kang.

14 << <Mmami uYawe, n là, i təm wa nnà ta, ka̱kul mi nənəm pa, mi re i lyam ka̱t, mi re ka̱t, mi pà akwali a ɓu ka̱kul oga asa̱l ɓu ka̱ oga nnap nnəm ɓu, uNəm uga nzhi uYawe à là.> >>

Ikú áchar àEzikyel

15 Te uYawe là nnap ká̱ mi pa̱, 16 <<Á ya anəm, dər, n dát chit ka̱ ǹyar kà̱ ɓu pa̱ ɓyat iya̱m va ìwú ɓu ma̱n ji. Te kang wa nəm aɗor, ka̱t te wa yə́ng ka̱t, kang wa tokchì mbəl ka̱t. 17 Kpán ìgwak pa̱ dakdak, kang wa yə́ng ka̱kul anəm ukuku ka̱t. Chəp iya̱m ishi ɓu, kang ɓù mwàk akwap ɓu ka̱ ashar, kang wa gún anung ɓu ka̱t, kang wa ri iya̱m-nrì onəm oga ǹyə́ng ikú ka̱t.>>

18 Te n là nnap ka̱ onəm ká̱ ìɓotak, ka̱ arurong te uchar mi kú. Ìpin fa kpa̱k ká̱ ìɓotak te, n nəm wa nva mmá nak mi.

19 Te onəm ɓəp mi pa̱, << Iza̱ ìpir nkpaktak iya̱m va̱ ta̱ mmaɓu kà̱ nnənəm yà?>>

20 Te n na ama̱n ôza̱ pa̱, <<UYawe à là nnap ká̱ mi, 21 pa̱ ń là nnap ka̱ nzhi àIsa̱rila pa̱, uNəm uga nzhi uYawe là pa̱, mi vyap nzhi awop mi, atak va o kám kà̱, atak va iwú wó fe nchang ndədər, ká̱ atak aga nna nra ìgwak á wó. Kang ovan wó onunggwan ka̱ ochar va̱ o re ka̱ nva̱ng te mí gbá̱ng ka̱ ndokchi. 22 Te ô nəm wa nva n nəm, kang ô gún anung ka̱t, kang ô ri iya̱m-nrì onəm oga ǹyə́ng ikú ka̱t. 23 O chəp oga iya̱m ishi wó, kang ô mwàk oga akwap wó ka̱ ashar wó, ô yə́ng ikú ka̱t, ô vyap ka̱ ashe nnap mɓá̱ngɓa̱ng wó, kang ô shìn ôwan wó. 24 Te uEzikyel i sat ǹnyám ìpir nnàp ka̱ atak wó, nkpaktak iya̱m va̱ uza̱ nəm te ô nəm. Awalang va̱ iya̱m va̱ ta̱ i fa te o nyi pa̱ mmami na uNəm uga nzhi uYawe.>>

25 <<Mmaɓu, á ya anəm, mi tur nkàm oza̱, ká̱ nchang ìgwak oza̱, ká̱ ìzhàn oza̱, ká̱ iya̱m va̱ iwú oza̱ fe nchang ndədər ká̱ iva̱ ìgwak oza̱ ɗòm, kang ká̱ ovan oza̱ onunggwan ka̱ ochar kpa. 26 Ka̱ nda va̱ ta unəm va̱ pətər te i ɓa ka̱ nrè va̱ ta a ɓu na ú fe ká̱ achwang ɓu. 27 Kà̱ ìlum va̱ ta te, anung ɓu i bol ka̱ atak anəm va̱ pətər, kang ɓu là nnap ká̱ unəm va̱ uwà chə́r, ɓu yà akpa̱ng lap ka̱t. Te ɓu sat ǹnyám ìpir nnàp ka̱ atak oza̱, kang oza̱ i nyi pa̱ mmami na uYawe.>>

<- Nlir aEzikyel 23 Nlir aEzikyel 25 ->