Nlir aEzikyel 18

Unəm va̱ nəm nnap mɓá̱ngɓa̱ng te uwà i kú

1 UYawe là nnap ká̱ mi kà̱ɗi pa̱, 2 <<Iza̱ mmawó ka̱ nrərəng ka̱ apal ntar achu va̱ ta̱ ka̱ apambin aIsa̱rila, nna va̱ pa̱,

<< <Opon ri awar ìba̱ngba̱ng isamsam,

kang inyin kú ká̱ ovan> yà?

3 <<Nva̱ nna n yà mmami uYawe, n là pa̱, mí yà ká̱ ntar achu va̱ ta̱ ka̱ ashe aIsa̱rila lap ka̱t. 4 Dər, nkpaktak irirì ijem, irirì apon ká̱ ija ayen pa̱ kpaktak ijem. Unəm va̱ nəm nnap mɓá̱ngɓa̱ng te uwà i kú.

5 <<Uro te unəm unəna̱n,

ka̱ nnəm iya̱m va dakdak, məma.

6 Uza̱ i ri iya̱m-nrì ka̱ nzhi ichə̀r ka̱ apal aɓam ka̱t,

uza̱ i wop ichə̀r onəm oga aIsa̱rila ka̱t,

uza̱ i ra ká̱ uchar anəm uga ngba̱k nzhi wò ka̱t,

uza̱ i ra ká̱ uchar ka̱ walang va̱ uza̱ ka̱ akpar ka̱t.

7 Unəm va i ka̱r unəmro ka̱t,

uva i lile ká̱ iya̱m va̱ uro na á na pa̱ uza̱ a kpán a wò kang, ka̱kul akat,

uva i vyat onəm ka̱t,

unəm va i na iya̱m-nrì na ônəm va̱ ka̱ ashe nlang,

uva i na ìlukwan na ûnəm uga nkun.

8 Unəm va i na akat ka̱ ndədəng,

ka̱t te ka̱ nram mmak nro ka̱ apəpal ka̱t,

uva i kwap awo wò ka̱ atak nnəm iya̱m iɓá̱ngɓa̱ng,

uza̱ i va̱n nnandər ka̱ ishimshe onəm oga ndap izər,

9 unəm va ka̱ nkpak nnap mpakpak mi

kang ka̱ nkpak oga nnap nkpakkpak mi ka̱ nnandər,

te uza̱ unəm unəna̱n.

Nkpak uza̱ i lár,

mmami uNəm uga nzhi uYawe, n là.

10 <<Te a yà pa̱ uza̱ mar uyen va ɓa ta̱l unəm uga nvyat onəm, uga ntar nchə̀r, ka̱t te uva ka̱ nnəm izəngtəng ka̱ ashe oga iya̱m va̱ ta̱, 11 iva upupon nəm apipir ka̱t.

<<Uza̱ ka̱ nri iya̱m-nrì ka̱ nzhi ichə̀r ka̱ apal aɓam,

uza̱ ka̱ nra ká̱ uchar anəm uga ngba̱k nzhi wò.

12 Uza̱ ka̱ nka̱r onəm oga nkun ká̱ oga nlang.

Uza̱ i vyat onəm.

Uza̱ i le ká̱ iya̱m va̱ uro na á na pa̱ uza̱ á kpán a wò kang, ka̱kul akat ka̱t.

Uza̱ i wop ichə̀r.

Uza̱ i nəm iya̱m iga nnəm ajan.

13 Uza̱ i na akat ka̱ ndədəng, ka̱ nram mmak ka̱ apəpal. Te uza̱ i ləlár ɗò? Uza̱ i lár ka̱t. Ka̱kul uza̱ nəm nkpaktak oga iya̱m iga nnəm ajan va̱ ta̱ nəm. Uza̱ i kú ikúku, nchìchər i le ûwà ka̱ ishi.

14 <<Kang a yà pa̱ unəm va̱ ta mar uyen uva̱ ya nkpaktak oga mpat va̱ ya upon wò nəm, káp ka̱ nva̱ uza̱ ya iya̱m va̱ ya upon wò nəm, te uza̱ nəm pa jiwò ka̱t.

15 <<Uza̱ i ri iya̱m-nrì ka̱ nzhi ichə̀r ka̱ apal aɓam ka̱t,

uza̱ i wop ichə̀r onəm oga aIsa̱rila ka̱t.

Uza̱ i ra ká̱ uchar anəm uga ngba̱k nzhi wò ka̱t.

16 Uza̱ i ka̱r unəm uro ka̱t,

uza̱ i ka̱m iya̱m iga nkpán ndàtdàt ka̱kul akat ka̱t.

Uza̱ i vyat onəm ka̱t,

uza̱ ka̱ nna iya̱m-nrì na ônəm va̱ ka̱ ashe nlang,

kang uza̱ ka̱ ndang imaləng ônəm omaləng.

17 Uza̱ i kwap awo wò ka̱ atak nna idumdum ônəm oga nkun,

uza̱ i na akat ká̱ nram ndədəng mmákmak kà̱ ka̱t.

Uza̱ ka̱ nkpak oga nnap mpakpak mi,

kang kà̱ nchen ka̱ ashe oga nnap nkpakkpak mi.

Uza̱ i kú ka̱kul mpat apon wò ka̱t, uza̱ i lár. 18 Upupon ka̱r onəm, á vyat ugənang wò, á nəm iya̱m iva ɓyen ka̱t ka̱ ashe onəm wò, uza̱ i kú ka̱ ashe mpat wò.

19 <<O ɓəp pa̱, <Iza̱ nak kang uyen i yar nsur mpat apon wò ka̱t yà?> Nva̱ uyen va̱ ta kpak nnap-akwali, á nəm iya̱m va məma, uza̱ kpak nkpaktak nɗyáng mi pa̱ dakdak, uza̱ i lár. 20 Unəm va̱ nəm nnap mɓá̱ngɓa̱ng te uwà i kú. Uyen i yar nsur mpat apon wò ka̱t, upon i yar nsur mpat ayen wò ka̱t. Inəna̱n ánəm unəna̱n i təm ka̱ apal ishishi, inga ánəm unga i təm ka̱ apal ishishi.

21 <<Kang a yà pa̱ unəm unga i re nkpaktak oga iya̱m iɓá̱ngɓa̱ng wò va̱ uza̱ nəm, uza̱ kpak nkpaktak oga nɗyáng mi, kang uza̱ i nəm inəna̱n ká̱ nnandər te, uza̱ i lár, uza̱ i kú ka̱t. 22 Mí yà ka̱ nrəng ká̱ nkpaktak mpəpat va̱ uza̱ nəm ka̱t. Ka̱ atak inəna̱nnəna̱n va uza̱ nəm te, uza̱ i lár. 23 N fe nchang ikú ánəm unga fe ɗò? UNəm uga nzhi uYawe à là. N ɗòm pa̱ uza̱ á ga̱ɓa̱n á re nnap nnəm wò na uza̱ á lár ka̱t ɗò?

24 <<Nva̱ngva̱ unəm unəna̱n i re nnəm iya̱m inəna̱n wò kang i nəm iɓá̱ngɓa̱ng, te uza̱ nəm nkpaktak iya̱m iga nnəm ajan va̱ unəm unga ka̱ nnənəm te, uza̱ i ləlár ɗò? Nkpaktak oga nnap nnənəm nnəna̱n va̱ uza̱ nəm te mí rəng ká̱ oza̱ lap ka̱t. Uza̱ nəm nnandər ka̱t, te uza̱ i kú ka̱ ashe oga nnap mɓá̱ngɓa̱ng va uza̱ nəm.

25 <<Ká̱ nnà te o la pa̱, <Asa̱l áPonzhi Inan dakdak ka̱t.> Kusuk, o fe á nzhi aIsa̱rila, asa̱l mi dakdak ka̱t ɗó? Asa̱l wó na dakdak ka̱t, kat ɗò? 26 A yà pa̱ unəm unəna̱n re nnəm iya̱m inəna̱n wò, kang à nəm iya̱m iɓá̱ngɓa̱ng, te uza̱ i kú ka̱ ashe oza̱. Uza̱ i kú ka̱ ashe iya̱m iɓá̱ngɓa̱ng va uza̱ nəm. 27 Kang a yà pa̱ unəm unga re iya̱m inga wò va̱ uza̱ ka̱ nəm, kang à nəm inəna̱n ká̱ nnandər, te uza̱ i gár irirì wò. 28 Ka̱kul uza̱ rəng nnap kang uza̱ ga̱ɓa̱n ka̱ atak nkpaktak oga mpat va̱ uza̱ nəm, te uza̱ i lár, uza̱ i kú ka̱t. 29 Ká̱ nnà te nzhi aIsa̱rila là pa̱, <Asa̱l áPonzhi Inan dakdak ka̱t.> Á nzhi àIsa̱rila, asa̱l mi dakdak ka̱t ɗó? Asa̱l wó na dakdak ka̱t, ka̱t ɗò?

30 <<Ka̱kul nva̱ ta te, á nzhi àIsa̱rila, mi ga nnap-akwali n̂za̱ unəm nggo ka̱ atak nnap nnənəm, uNəm uga nzhi uYawe à là. Ó ga̱ɓa̱n ó re nkpaktak oga nnap mɓá̱ngɓa̱ng wó, le kang oza̱ a nak wó kà̱ nru ka̱t. 31 Ó kap ká̱ nkpaktak oga mpat va̱ ó pat, ó ram ìgwak ìpipye ka̱ aruhu apipye. Ka̱kul iza̱ kang ó kú yà, á nzhi àIsa̱rila? 32 N fe nchang ikú ánəm ro ka̱t, uNəm uga nzhi uYawe à là. Ó ga̱ɓa̱n na ó lár.

<- Nlir aEzikyel 17 Nlir aEzikyel 19 ->