—Pácho'o re'iyayá.

Cajrú rahuíyo'oca raú, rimá rijló:

—Jesús, Tupana I'irí picá. Tupana je'echú churí i'irí picá. ¿Naje picahuíla'a nunacu? Pijló numá: Pila'aniya chapú nucá, uncá paala Tupánajlo ricá —que rimacá Jesusjlo.

9 Jesús quemari rijló:

—¿Na pií?

—Nuí íqui'iruna, íqui'iruna hue'emacale.

10 Mahuó rimacá Jesusjlo, rihuacára'aca piyá necá reyá.

11 A'ajnare que cajrú je'eruna piracana chira'acó yenuri nacuhuá na'ajnehuá culácana nacú. 12 Raú jiñana pechu quemaño rijló:

—A'ajnáruna e'iyajé pihuacára'a huecá.

13 —Je —que Jesús quemacá najló.

Raú jiñana pechu jácho'oño ilé ina'uqué e'iyayá, ja'añó je'eruna piracana e'iyajé. Dos mil je'eruna ne'emacá. Jiñana pechu ja'acó aú ne'iyajé necho'ó ají que a'ajná ño'ojó. Yenuri ji'ihuátaya na'ó caesa acojé. Rejeja nacapichó piyuqueja junápeje.

14 Marí caje aú nalamára'ajeño penájemina ñaañó reyá. Ne'emá riyucuna pajimila erúnajlo, ajopana rehuá i'imacáñojlo hua'até. Raú cajrú ina'uqué i'ijnacá rejo ramaje. 15 E nephá Jesús nacú. Amaño ilé ina'uqué Jesús jácho'otacare e'iyayá jiñana pechu. Re riyá'o Jesús hua'até. Ca'arumacani ri'imacá; palá ripechu i'imacá. Marí que namaca aú ricá naquero'ó ripiyá. 16 Re i'imacaño amaño maapami que Jesús jácho'otaca jiñana pechu re'iyayá. Namá caja je'eruna capichaco junápeje. Necá penájena i'imaño riyucuna huajé iphácañojlo. 17 E caja nemá Jesusjlo:

—Pácho'o huate'eré naquiyá.

—Je —que rimacá.

18 E rihuitúca'a jita chojé. Ejéchami jiñana pechu i'imacare e'iyá penájemi quemacá rijló mahuó:

—Nu'ujná pijhua'até.

19 —Uncá pi'ijnalaje nujhua'até —que Jesús quemacá rijló—. Pipa'ó piñacaré ejo, pi'imacáloje pejena hua'até penaje. Palá huani Tupana li'ichaca picá. Cajrú rihue'epíchaca pimu'ují. Eco pi'imá riyucuna najló —que rimacá rijló.

20 —Je —que rimacá.

E ripa'ó. Riqueño'ó riyucuna i'imacana rite'eré ehuájenajlo. Re'iyohuá iyamá té'ela quele pajimila i'imacá. Re ri'imá palá Jesús la'acare ricá yucuna najló. Riyucuna jema'ajeño pechu i'imá Jesús nacú: “¡Meque piyuque huani rila'acá!”

—Aquíchajeru huani nutu, yehuíchaja rupechu capichaco. Pi'ijná nujhua'até nuñacaré ejo, pito'ochíyachi piyáte'ela runacojé, ru'umacóloje raú penaje —que rimacá rijló.

24 —Je —que Jesús quemacá rijló.

E ri'ijná rijhua'até. Cajrú ina'uqué i'ijnaño rápumi chu. Cajrú namajra'acá ricá. 25 Najhua'até caja apa'ahuelo ja'apayo, rutami ru'umacá. Iyamá iphata ji'imaji nacojé quele jarechí quetana ru'umacá rutami. Jirá ja'apáqueri runaquiyá. 26 Caja cajrú pusána'ajeño atá'añojla rupusána'acana. Cajrú huani rujña'ajica quehuini yajhué panacu raú. Ruca'á ruliñérute piyuqueja, napusána'acaloje rucá penaje. E'iyonaja ñaqueja hua'até ru'umaqué. Richaje, richájeno que romájica quehuini yajhué. 27 Ehuá ne'emacá rojló Jesús yucuna. Aú ru'ujná ramaje. Ajopana hua'até ro'opá rápumi chu. Eyá rusapa ina'uqué ihuami chiyá ra'arumacá ji'imá nacú. 28 Rupechu i'imá: “Nusápajica ee ra'arumacá nacú, nutejmo'otajo raú.” 29 E rusapa rinacu. Hua'ató que jirá ja'apácare runaquiyá mata'acó runacojé. Caja peyajhueru ru'umacá rejeja. Raú ruhue'epí runapona tejmo'otaco rojló. 30 Jesús hue'epiri ritejmo'ótaca rucá ripechu aú ja. Raú ripajno'ó riyámojo nachaje yacá'ajo. Rimá najló:

—¿Na sápichari no'orumacá nacú?

31 E ra'apiyatéjena quemaño rijló:

—¿Uncá chi pihue'epílacha cajrú ina'uqué majri'ichaca picá? ¿Eta naje chi pimá nanacu?: “¿Na sápichari no'orumacá nacú?”

32 Jesús yacá'aro ne'iyohuá piyuqueja, ramácaloje naca sápari ra'arumacá nacú. 33 Ilerú inanaru hue'epiyo caja rutejmo'otaco. Aú ru'ujná riloco'opani quero'ocajo nacú. Cajrú rucurúcaca. E rutára'o ru'urúpachi aú rijimaje. E ru'umá rijló riyucuna piyuqueja. Aú Jesús quemari rojló:

34 —Caja pitejmo'ochiyo chuhua, pipechu i'imacale caphí nochojé. Pipechu i'imichá nunacu: “Ricá ja'apátajeri nutami caje nuliyá” que. Aú calé pitejmo'ochiyo. Chuhua pi'ijná palá ca'ajnó. Caja pitejmo'ochiyo piyaripune liyá —que rimacá rojló.

35 Marí que rimacá rojló ee ajopana iphaño Jairo nacú. Riñacaré eyá nahuacára'a ne'emacá. Nephá rinacu. E nemá rijló:

—Caja pitu taqui'ichayo; caja rupechu capiícharo. Uncá na penaje calé picahuíla'a Jesús Huehuíña'atajeri nacú ruchaya —que nemacá rijló.

36 Uncá Jesús a'alá rinacojó napura'acó. Rimá nahuacáca'alo ñacarelana chiyá huacára'ajerijlo:

37 —Pila'aniya picó camu'ují. Pila'á pipéchuhua caphí nochojé.

E rimá ajopánajlo:

—I'ijnaniya nujhua'até, maáreja iyuró.

Pedro, Santiago, re'ehué Juan, queleja rihuá'a rijhua'ató. 38 E caja nephá riñacaré ejo, amaño cajrú ina'uqué i'imacá re. Cajrú namejé i'imacá. Nahuinano la'acana nacú cajrú neyaca rucá. 39 E rimujlúca'a rejo, rimá najló:

—¿Naje ila'á ihuinano cajrú huani maare? ¿Naje chi iyá rucá? Uncá rutaca'alacha, rucamáchiyacoja calé —que rimacá najló.

40 Raú ne'echá rinacu. E Jesús quemari najló piyuque, namujlúca'acaloje a'ajná ño'ojó penaje. Rihuá'a rijhua'ató rora'apami, rolomi, rijhuáque'ena, queleja rihuá'a rijhua'ató. E namujlúca'a ucapú támijimi i'imacare chojé. 41 E ripatá rucá ruyáte'ela naquiyá. Rimá támijimijlo:

—Talita cumi —que.

Napura'acó chu rimá rojló: “Yuhualó, pijló numá, pácho'o.” 42 Raú ja rócho'o; ruchira'ó. Iyamá iphata ji'imaji nacojé quele jarechí ru'umacá. Rijhua'até i'imacaño pechu i'imá rinacu: “¡Meque piyuque huani rila'acá!” 43 Raca'acó rimacá najló nemacá piyá rimacápo'oca rucá yucuna ajopánajlo. E rimá najló:

—A'á rojló a'ajnejí.

<- SAN MARCOS 4SAN MARCOS 6 ->