1 E caja re i'imacaño naquiyana i'imaño yucu Jesusjlo. Méqueca Pilato noca ajopana ina'uqué yucuna ne'emá rijló. Nemá rijló:

—Cajrú huani Pilato nótaca ina'uqué. Galilea eyájena ne'emacá. Pu'uhuaré nala'acare chaya nenó Tupánajlo napirana naquiyana i'imacá. Marí que nala'acá aú Pilato huacára'ari nenótacana. Quéchami riquechípa'a nérami napiránami chuna írami hua'até —que nemacá Jesusjlo.

2 Jesús quemari najló:

—Apala ipechu i'imá necá Pilato nótacarena nacu: “Ajopana chaje pu'uhuaré la'ajeño ne'emacá. Pachá marí que nala'acó”. 3 Uncá richona calé nacapichó. Uncájica ee ipajno'otá ipéchuhua pu'uhuaré ila'acare liyá Tupana ejo, ñaqué caja icapichájico. 4 Siloé e pají i'imari. Yenoje ri'imacá. Mana'í chiyoja ricojno'ocó i'imacá. Hueji que cuhuá'ata quele iphata ji'imaji nacojé quele ina'uqué cha ricojno'ó i'imacá. Aú nacapichó piyuqueja. Ipechu nacú ri'imá ca'ajná: “Ajopana Jerusalén eruna chaje ne'emacá pu'uhuaré la'ajeño. Pachá nacapichó ilé que”. 5 Numá ijló, uncá richona calé nacapichó. Uncájica ee ipajno'otá ipéchuhua pu'uhuaré ila'acare liyá, ñaqué caja icapichájico —que Jesús quemacá najló.

6 Marí que Jesús i'imacá najló yucu:

—Apú i'imichari. Rimena e'iyá pajluhuánaja paijí tári'icharo. Higuera rií i'imichaca. Rihue'epíchaca aú rená, ri'ijichá richa ña'ajé. Iphíchari rejo. E riculicha ripaná e'iyohuá richa, amíchari uncá richa i'imalacha. 7 Aú rimicha rimena e'iyá sápajerijlo: “Pa. Caja hueji quele jarechí quetana i'imajemi nu'ujnacá majó richa culaje. E'iyonaja uncá richa ta i'imalá. Eco pi'icá ricá. Uncá na penaje calé mecharú ta tára'aro numena e'iyá majopeja”, que paminá quemíchaca rijló. 8 E'iyonaja rijhua'até sápajeri quemíchari rijló: “Reja ri'imareja pajluhuaja jarechí quetana ejo'ocaja. Eco nuchá ri'ilaya, nuca'achí a'ahuaná, jimichi tami caje patáca'alomi ri'ilaje. 9 Raú ca'ajná rarúca'aje. Uncaja que rarúca'a, eco pihuacára'a nuca'acá ricá”, que rimíchaca ricarihuátejlo. Caja quetana riyucuna.

10 E caja huatána'acaje huacajé Jesús jehuíña'atari ina'uqué nahuacáca'alo ñacarelana chu. 11 Re ajopana ina'uqué hua'até pajluhuájaru inanaru i'imayo. Dieciocho jarechí quetánicha ru'umacá rutami caje hua'até. Pajluhuaja jiñá pechu i'imari rujhua'até. Ricá la'arí rutami rucá. Cúhua'acano ro'opájica. Rinacojé uncá meño'ojó rutára'alo pu'ucú. 12 Jesús amaca aú rucá, rihuá'a rojló. Aú ru'ujná rahua'ajé. E rimá rojló:

—Caja ta pitami caje ja'apáchiyari piliyá.

13 E rito'otá riyáte'ela runacojé ají que. Raú ja rutára'o pu'ucú. Ejéchami rupura'acó palá Tupana nacú. 14 E'iyonaja nahuacáca'alo ñacarelana chiyá huacára'ajeri yúcha'aro Jesús cha, ritejmo'ótacale ina'uqué huatána'acaje huacajé. Raú rimá ajopana ina'uquejlo:

—Re pajluhua cuhuá'ata que cala iná la'acáloje iná sápaca'ala re'iyá penaje. Re'iyá icá, itámina, i'ijnajeño richaje, ritejmo'ótacaloje icá penaje. Eyá huatána'acaje huacajé uncá inahuaja jiñá pechu i'imari'uqué tejmo'ótacana i'imalaje.

15 Raú Jesús quemari rijló:

—¡Pajlácachina ta icá! Icá la'añó icó palá la'ajeño que huani ina'uquejlo. E'iyonaja uncá ñaqué calé icá. Ipirá, jema piracana ca'ajná, cahuarú ca'ajná i'imaquela nañacarelana chu huatána'acaje huacajé, ihuá'ajla caja necá richiyá une'é chuhuá juni i'irajé. 16 Eyá marirú, Abrahami chu laquélomi rucá. Dieciocho jarechí quetánicha ro'opaca cúhua'acano. Jiñá Chi'ináricana huacára'ari rutami caje rojló, ru'umacáloje rutami rinacu penaje. Ñaquele palani ra'apátacana ruliyá huatána'acaje huacajé —que rimacá najló.

17 Marí que rimacá aú rapáña'ata chapú péchuruna rinacu nacú. Ajopana ina'uqué pechu i'imá pu'ují rijhua'até namaca aú palá huani ritejmo'ótaca rucá.

—Ina'uqué naquiyana huacára'ajeri Tupana. Re rijhua'atéjena huejápaja. Ehuá richaje, richaje que nañaté a'ajico. Chuhua nu'umajica yucu ijló, ihue'epícaloje méqueca ricá penaje. 19 Mostaza icha ijí que ricá, ina'uqué ejátacare ne'ecacapere e'iyohuá. Capajé nojé huani richa ijí. E'iyonaja jíma'alami yenuna quetana ritahuá'aco. Ripana e'iyá cupira'aphana, camejérina cayuphéruna, quele la'añó nañacaró.

—Ina'uqué naquiyana huacára'ajeri Tupana. Re rijhua'atéjena huajápaja. Ehuá richaje, richaje que nañaté a'ajico. Chuhua nu'umajica ijló apa'amá yucu, ihue'epícaloje rinacojé raú penaje. 21 Inaana quechípa'año harina pan amúra'atajona hua'até. Raú harina anóro'otacanami amúra'ataro piyuqueja. Ñaqué caja Tupana puráca'alo jema'acó cajrú ina'uqué e'iyohuá, nema'acáloje ra'apiyá penaje, ne'emacáloje rijhua'atéjena raú penaje —que Jesús quemacá najló.

—Hue'emacana ¿huejápaja chi ina'uqué Tupana i'imatájeri capichácajo liyá?

Raú Jesús quemari rijló, ajopánajlo hua'até:

24 —Ila'á caphí ipéchuhua, imujlúca'achi ujú caje ñani rinumaná chiyá je'echú chojé. Numá ijló, cajrú ina'uqué atá'ajica richiyá mujlúca'acana. E'iyonaja uncá meño'ojó namujlúca'alaje richiyá. 25 Pají miná que caja Tupana. Ricá jácho'ojero rinumaná itaje. Rejomi icá queño'ojeño jahuacácano huaca'apeje rinumaná ahua'ajé. E ihuá'aje rijló, rijme'etácaloje ijló rinumaná penaje. Imaje rijló: “Huahuacára'ajeri, pijme'etá huajló rinumaná”. Raú rimaje ijló: “Uncá nuhue'epila mere eyájenaca icá”. 26 Ejéchami imájica piño rijló: “Huajñaque hua'ajnehuá pijhua'até. Hue'eraque caja nacaje jalá pijhua'até i'imajica. Picá caja jehuíña'ataqueri huecá pajimila e”, que imájica rijló. 27 E'iyonaja rimaje piño ijló: “Caja numicha ijló: ‘Uncá nuhue'epila mere eyájenaca icá.’ I'ijná nuliyá a'ajná ño'ojó, pu'uhuaré la'ajeño icá” que rimájica. 28 Tupana hua'atéjena i'imajeño rijhua'até je'echú chu. Abrahami chu, Isaacmi chu, Jacobmi chu, piyuque Tupana puráca'alo ja'apátajeñomi chuna, quele i'imajeño caja re. Amájica ee necá re, cajrú iyájica. Cajrú caja ajma'atájica aí hua. Necá i'imajeño richu, je'echú chu. Eyá icá i'imajeño cupáquejanami que huaca'apé naliyá. 29 Ina'uqué, ajopana, ajopana que piyuqueja marí eja'ahuá chu i'imacaño, i'imajeño je'echú chu Tupana hua'até. 30 Ajopana ina'uqué ja'apejé i'imacaño me'etení i'imajeño ajopana chaje rejo —que Jesús quemacá najló.

—Pi'ijná maare eyá, Herodes huátacale pinócana.

32-33 Jesús quemari najló:

—Chuhuajá, muní hua'até nu'umajé jiñana pechu ca'acana ina'uqué e'iyayá nacú. Hua'ató nutejmo'ótajica natámina. Apacala nuñapátajica ricá. Marí caje la'acana nacú nu'ujnajé Jerusalén ejo. Jerusalén e nenono Tupana puráca'alo ja'apátajeño. Uncá nenola necá apú pajimila nacú. Ñaqué caja nenójica nucá rejo. Chuhua ipa'ó, imíchachi riyucuna Heródesjlo —que Jesús quemacá najló.

34 Marí que Jesús quemacá Jerusalén e i'imacáñomi chuna nacú:

—Tupana huacára'aqueri ripuráca'alo ja'apátajeñomi chuna Jerusalén erúnami chúnajlo i'imajica. Nanaquiyana nenoque i'imajica. Nanaquiyana cha naca'aqué jipa. Pulapé nuhuátacajla nahuacátacana, ne'emacáloje no'opiyá jema'ajeño penaje. Capere jahuacátaca ruyani ruyuphé ja'apejé que caja nuhuátaca nahuacátacana, ne'emacáloje no'opiyá jema'ajeño penaje. E'iyonaja uncá nahuátala. 35 Chuhua uncá na calé i'imajeri najhua'até namájeri penaje. Meñaru namájica nucá. Caja numá nanacu: “Uncá namálaje nucá”. Nemájica ee nunacu marí que: “Palani ricá Tupana huacára'acare majó i'imacá”, ejéchami namájica nucá piño —que rimacá Jerusalén e i'imacaño nacú i'imacá.

<- SAN LUCAS 12SAN LUCAS 14 ->