SAN JUAN 18

Najña'acá Jesús yucuna marí:

(Mt 26.47-56; Mr 14.43-50; Lc 22.47-53)

1 Caja marí que Jesús pura'acó Tupana hua'até i'imacá. Quéchami ri'ijnacá ra'apiyatéjena hua'até ají que ina'atana pa'anajo pitá. Ina'atana ií Cedrón. A'ahuaná ejátaquejami i'imari re. Rejo Jesús i'ijnari richape ra'apiyatéjena hua'até. 2 Rejo nahuacácono ra'apiyatéjena hua'até. Júdasja calé uncá i'imalá re najhua'até. Ajopana hua'até ri'imá, ra'acáloje Jesús ripinánajlo penaje. Rihue'epí ne'ejnacá rejo, aú rihuá'a ripinana rejo. 3 E caja cajrú ajopana ina'uqué iphaño nanacu Judas hua'até. Cajrú surárana, policíana, quele hua'até riphá i'imacá. Sacerdótena huacára'ajeño, fariséona, quele puráca'alo aú ne'ejná rejo rijhua'até i'imacá. Nalecare hua'até nephá rejo. Cajrú nacamaré, jepé caje i'imacá nacapi. 4 Caja Jesús hue'epíchami na penájeca ne'ejnacá. Ñaquele nephaca nanacu aú ri'ijná najimajo. Rimá najló:

—¿Na iculá?

5 Nemá rijló:

—Jesús, Nazaret eyaje, ricá huaculá.

Jesús quemari najló:

—Nucá po Jesús.

Ripinánajlo a'ajeri, Judas, i'imari caja najhua'até. 6 Rimá najló: “Nucá po Jesús” que, raú na'ató te'erí e'iyajé rijimaya. 7 Jesús quemari piño najló:

—¿Na iculá?

Nemá piño:

—Jesús, Nazaret eyaje, ricá huaculá.

8 Raú Jesús quemari najló:

—Caja numicha ijló, nucá po quele imá nacú. Nucá iculájica ee, iyurí no'opiyatéjena, ne'ejnachi nahuátaca ejo —que rimacá najló.

—Je —que.

9 Rimacá que nanacu Tupánajlo maapami que caja ri'imacá najló. Marí que rimacá rijló nanacu i'imacá: “Uncá na calé nanaquiyana pa'acárena nojló capichájero ne'iyayá.” Ñaquele rimá najló, nayurícaloje ra'apiyatéjena, ne'ejnacáloje nahuátaca ejo penaje. 10 Pedro i'imari caja re. Sajalu caje cúhua'aro rinacu. Ramaca aú marí que nala'acá Jesús rero'ó risajálune ra'aruná chiyá. Ricá aú rica'á pajluhuaja i'ijhuí. Ca'añá chojó pitari ri'ijhuí rimata'á matá. Rimata'acare i'ijhuí ií i'imari Malco. Sacerdótena huacára'ajeri hua'ateje ri'imacá.

11 Caja rimata'á ri'ijhuí. Raú Jesús quemari Pédrojlo:

—Pipa'atá ra'arú chojé pisajálune. Re Nora'apá pechu nacú ricá, nujña'acáloje chapú caje panacu penaje. Ñaquele nujña'ajeja panacu ricá —que rimacá rijló.

Jesús tára'aco sacerdótena huacára'ajeri jimaje yucuna marí:

(Mt 26.57-58; Mr 14.53-54; Lc 22.54)

12 Surárana i'imaño re nahuacára'ajeri hua'até. Judíona le'ejena policíana i'imaño caja re. Caja napatá Jesús, nahuajácaloje ricá penaje. Nepo'otá ricá. 13 E caja nahuá'a ricá ají que Anás ñacaré ejo. Caifás yana'ajú ri'imacá. Caifás i'imari sacerdótena huacára'ajeri rihuacajé. 14 Ricá, Caifás, quemari marí que judíona naquiyánajlo i'imacá: “Pajluhuaja ina'uqué taca'ajeri huachaya, huacapichaco piyá piyuque huani. Marí palani huajló,” que rimacá i'imacá. Ricá ñacaré ejo nahuá'a Jesús i'imacá.

Pedro micho'otaca Jesús chaya yucuna marí:

(Mt 26.69-70; Mr 14.66-68; Lc 22.55-57)

15 Simón Pedro, apú Jesús ja'apiyateje hua'até, ja'apaño juca quemachi Jesús ápumi chu. Ne'ejná ají que Anás ñacaré ejo. E apú i'ijnari ají que riñacaré cópeje, Jesús ahua'ajé. Pu'ucuja rimujlúca'aca rejé, sacerdótena huacára'ajeri amána'apa ri'imacale. 16 Pedro ta uncá mujlúca'ala rijhua'até. Corral yámojoja ritajnó. Aú apú Jesús ja'apiyateje i'ijnari rinumaná hua'apheru hua'até pura'ajó rinacu. Rimá rojló:

—Pijme'etá rijló rapu, rimujlúca'achi.

—Je —que rumacá.

Rujme'etá rapu. Aú Pedro mujlúca'ari richojé.

17 Quéchami rinumaná hua'apheru quemacá Pédrojlo:

—¿Ilé ina'uqué napatacare ja'apiyateje chi picá?

Pedro quemari rojló:

—Uncá ra'apiyateje calé nucá.

18 Ehuá ipe'ení noca necá. Aú nahuacára'ajeri hua'até sápajeño, policíana cajena, apho'otaño siyá. Rilucúna'o palá. Quéchami na'anapacá rahua'á Pedro hua'até.

Sacerdótena huacára'ajeri culácataco Jesús nacú yucuna marí:

(Mt 26.59-66; Mr 14.55-64; Lc 22.66-71)

19 Sacerdótena huacára'ajeri queño'orí nacaje yucuna quejá'acana Jesús liyá. Rimá rijló:

—¿Mecajena chi pa'apiyatéjena? ¿Na nacú chi pehuíña'ata ina'uqué? —que rimacá rijló.

20 Jesús quemari rijló:

—Iqui'iruna ina'uqué e'iyá nupura'ó nacaje nacú. Capinaca nohuíña'atajica ina'uqué nahuacáca'alo ñacarelana chu, Tupana ñacaré chu hua'ató. Meño'ojoca judíona jahuacácono ejé nohuíña'ataque necá. Uncá numicho'ojneja calé numájica najló nacaje nacú. 21 ¿Naje piquejá'a nacaje nohuíña'atacare necá nacú yucuna nuliyá? Piquejá'a riyucuna nupuráca'alo jema'ajeño liyá. Necá quemájeño pijló na nacuca nohuíña'ataque necá. Necá hue'epiño méqueca numacá —que Jesús quemacá rijló.

22 Pajluhuaja policía tára'aro Jesús ahua'á. Tupana ñacaré hua'aphé ri'imacá. Marí que Jesús quemacá aú rijló riña'á Jesús pajimaya riyáte'ela aú. Rimá rijló:

—¿Ile que chi iná a'ajipacá sacerdótena huacára'ajerijlo?

23 Jesús quemari rijló:

—Pimá nojló mecajeca puráca'aloji numíchaje nacú uncá paala i'imichaca pijló. Palá numíchaca. Uncá naje calé piji'ichá nucá pajimaya —que rimacá rijló i'imacá.

24 E caja Anás huacára'ari nahuá'aca Jesús jepo'oqueja Caifás ejo. Caifás i'imari sacerdótena huacára'ajeri rihuacajé.

Pedro micho'otaca piño Jesús chaya yucuna marí:

(Mt 26.71-75; Mr 14.69-72; Lc 22.58-62)

25 Naculácataco Jesús nacú, a'apona que Pedro a'anapacá ajopana hua'até. E nemá rijló:

—¿Uncá chi ilé ina'uqué ja'apiyateje calé picá?

—Uncá nucá calé ra'apiyateje —que rimacá najló.

Rimicho'otá Jesucristo chaya.

26 Re caja apú i'imari. Sacerdótena huacára'ajeri hua'até sápajeri ri'imacá. Pedro mata'acare i'ijhuí ejena naquiyana ri'imacá. E rimá Pédrojlo:

—¿Uncá chi nomálacha picá ya'ajná a'ahuaná ejátaquelana ejo?

27 Pedro micho'otari piño richaya. Ejéchami capere yaca'acá.

Jesús tára'aco Pilato jimaje yucuna marí:

(Mt 27.1-2, 11-14; Mr 15.1-5; Lc 23.1-5)

28 E caja nahuá'a Jesús Caifás ñacaré eyá ají que nachaje huacára'ajeri ñacaré ejo. E naqueño'ó me'etácaje. Uncá judíona mujlúca'alaño nachaje huacára'ajeri ñacaré chojé, ajopana te'eré eyaje ri'imacale. Aú uncá paala najló richojé mujlúca'acana. Namujlúca'aquela richojé, uncá na calé i'imarijla najló palani que, najñácaloje pascua a'ajnená penaje. Aú calé uncá namujlúca'ala richojé. 29 Marí caja aú Pilato jácho'oro riñacaré chiyá najhua'até pura'ajó. E rimá najló:

—¿Pu'uhuaré la'ajeri chi ricá ihuá'ichaje majó?

30 Nemá rijló:

—Uncáquela ri'imalajla uncá ina'uquélari, uncá huajña'aláchajla ricá majó.

31 Rimá najló:

—Ihuá'a ricá ichajo, amáijla na pachá ihuátaca rihuajácana. Ile'ejé lana'aquéjami huacára'aca que ca'ajná ihuajaca ricá —que Pilato quemacá najló.

Judíona quemaño rijló:

—Palani rinócana, uncá ina'uquélari ri'imacale. E'iyonaja uncá nayurila huecá, judíona, huenócaloje ricá penaje —que nemacá rijló.

32 Jesús quemari ra'apiyatéjenajlo rinacuhuá maapami que méqueca nenójica ricá. Marí que nala'acá aú ri'imá Jesús quemacá que. 33 E caja Pilato pa'aró piño riñacaré chojé. Reyá i'imajemi rihuá'a Jesús maná. Nahuá'a ricá rejo. E Pilato quemari rijló:

—¿Judíona i'imacana chi picá?

34 E Jesús quemari rijló:

—¿Pipechu queja chi pimacá nojló ilé que, ajopana ca'ajná i'imaño nuyucuna pijló?

35 Pilato quemari rijló:

—Uncá judíona naquiyana calé nucá, ne'emacáloje piyucuna nojló penaje. Inaquiyana judíona, sacerdótena huacára'ajeño, quele huá'ichaño picá majó. ¿Pila'acale pu'uhuaré chi, nahuá'icha picá majó?

36 Jesús quemari rijló:

—Uncá nahuacára'ajeri penaje calé nucá marí eja'ahuá chu. Maare nuhuacára'aquela ina'uqué, nujhua'atéjena nóquichojla nuchaya, na'acá piyá judíonajlo nucá. E'iyonaja uncá nahuacára'ajeri penaje calé nucá marí eja'ahuá chu —que rimacá rijló.

37 Eyá Pilato quemari rijló:

—¿E chi quehuaca ne'emacana huani picá?

Jesús quemari rijló:

—Ilé pimacá nunacu queja nucá. Nucá huitúca'ari marí eja'ahuá chojé i'imacá. Maare nomoto'ó i'imacá, numacáloje ina'uquejlo quehuácaje puráca'aloji nacú penaje. Quehuácaje puráca'aloji ja'apiyá jema'ajeño huátaño nupuráca'alo jema'acana no'opiyá.

38 Raú Pilato quemari rijló:

—¿Na ta chi quele quehuácaje puráca'aloji pimá nacú? —que rimacá rijló.

Nahuacára'aca nenoca ricá yucuna marí:

(Mt 27.15-31; Mr 15.6-20; Lc 23.13-25)

Marí que Pilato pura'acó Jesús hua'até. Ejomi ri'ijná piño huaca'apojo judíona hua'até pura'ajó. E rimá najló:

—Uncá na calé rila'á pu'uhuaré, huahuajácaloje ricá penaje. 39 Pascua fiesta huacajé queja ihuátaca nócho'otaca pajluhuaja ina'uqué calajeruni chiyá ijló. ¿E ihuátaca nócho'otaca ijló judíona i'imacana penaje?

40 Marí que rimacá aú najló cajrú nahuíyo'oca rijló piyuqueja. Nemá rijló:

—¡Uncá ricá ta calé! Pácho'ota huajló Barrabás —que nahuíyo'oca rijló.

Piro'oqueji Barrabás i'imacá.

<- SAN JUAN 17 SAN JUAN 19 ->