1 Sa-onenako, lemokahoya Omaimidana nasahilila soto peko napa etiye loko maya lahelamibo nesamidana yowanula le-loko wetudawo nehe. 2 O'e, keke sametune. Lahelamibo nesa oha aku lolo ametune. Alo heludawo nesa lolo ibo nenako, nenaha ideko lahelamibo nesaya esewau leko lolo owa owa oko minatune. 3 Edimoya monoka noku udoko Jisesi Kalaesti maya heliboku kolo mekudawo maya ne liki elamahe. 4 Yamuya ahoteda lamedalalimoya Kalaesti maya helenebokuti momoga oko ilime sinaibo maya ne. Sa-onenako, lemokiya asako ohatama lepa mutiwaki minatune loko lemo noku udoko Kalaestileki magoina heleko aleuya ududawo ilekaiye.

5 Sa-udawomidana monawaya sakoya ne: Jisesi helibo nesa lekoko emoki magoina ouna judawoe loko sinokoko ohatama epa mutiwa leko nebokuya lemokiya magoina minakolune. 6-7 Lemoya sa-loko elekaka noune: We makolimoya helekoko aku lahelamibo nesa lolo amoko lahelamibo nesamidana adeuti maya ilime oli oetokadeko minakolaiye. Asakogo lukauka ito lupalokatiya lahelamibo nesamidana abuha-wowola maya suwetiye loko, ito aya nesamidana elekele oluhola minametune loko asehawa lukate maya Jisesida kohaki yoho yaha yalo teboto maya magoina tebo ilekaiye. 8-9 Ito Jisesi maya helenebokuti sinaibo monawala maya ele-minudawo maya ne. Sa-onebo we maya nenako, aku helamekolaiye. Helekaka nesalimoya Jisesida maya uliki we lolo oetamekolaiye. Sa-onenako, Kalaestiki magoina heludawomuye loko Jisesiki magoina minakolune loko ele-minune. 10 Jisesi helibo maya lahelamibo nesamuye loko onawa makoko yupeka heliyoko aloya suwokaiye. Sakoko olotiya aku sinokoko omuda lenedanaki, Omaimidana maya elekele oetoko ne. 11 Sa-oneyoko, edimotipodamuya sa-liki elilo. Lahelamibo nesa lolo okaka nesalimoya heludawo nesa lolo okaka noinako, Jisesi Kalaesti maya helibokuti sinokaiyoko le ouna jekudanaki, Omaimidana elekele oetoko minatune likigo elilo.

12 Sa-oneyoko, helekaka nesalimoya niseko elekele wene lolo onetatane loko nolideko maya, oo liki emesalo molamilo. Ito olisa nesalimoya niseko mulutipou nohideko maya eli mamilo. 13 Ito di dadelimoya lahelamibo nesamidana elekele oetoko netiye liki lihima lekaka anuloya oli hamilo. Edimoya alo heli-minabokuti maya sini-minabo maya neyo, di dade maya muki Omaimidanago milo. Sakikiya di dadeya wehe lokogo netibo nesamidana elekele itiki minatayo. 14 Edimoya Mosesekaho lo hukaibo gamidana elekelela minamae. Omaimidana nasahililau miniki eimola elekelelago minae. Sa-iminanako, lahelamibo nesalimoya uliki we lolo olibetamideyo.

15 Sa-onenako, lemoya Mosesekaho lo hukaibo gamidana adeu minamoko Omaimidana nasahililamidana adelau minudanako, lahelamibo nesa maya lolo owa owa oko minatupe, keke sakoya minamiye. 16 Edimoya ma sa-liki elamahe: Uliki we makomidana elekele wela minatune likiki duka moli mikiki aya wemidana eli mitaboya, aya wemidana meusa oluhola lolo itakilae. Malokaya lahelamibo nesalimoya uliki we lolo olibetokadeko aya nesamidana elekele wela lolo iki miniki heliki leso ikilae. Ito malokaya Omaimidana eli miki minatabo wewenaya lihimanipo suwokadeko minakilae. 17 Edimoya hapa lahelamibo nesamidana elekele itiki minabo onawatipo maya alo suwokaiye. Oloti maya onawaloya ga mako api-napi ilibiti-minabo maya ne. Saboku maya dukadunu eli likaka niae. Sa-iminayo, Omaimidana epoka lilo. 18 Edimoya lihima likaka nesamidana nalalauti maya dilipe oli okaiyoko wehe liki minikaka anugu nisiki wehe loko minokaka nesamidanama elekele itiki minikae. 19 Asehawa duka maya elewole amiyoko wewenalika oko moloko udawokuya le moloko ga maya lo noliboe. Edimoya hapa yeikalaya duka depa ito di dadeya hulikayoko, olisa nesamidana elekele omikaiyoko, opa-napa i-minabo maya ne. Sa-onebo maya nenako, oloti onawaloya asaiki aseha duka depa maya hulikadeko, wehe loko minokaka nesamidana elekelela lolo omikadeko, dukauya he lameda lideko minatae.

20 Edimoya lahelamibo nesamidana elekelela lolo itiki minabo onawalo maya lalo nesamidana elekele itiki minamabo ne. 21 Sakiya lahelamibo nesa lolo iki moliki abototi maya ula nesa li soto molabo nehe. O'e, lahelamibo nesamidana mupilaloya helekaka nesa soto pekaka noiye. Sa-ikikiya oloti maya onawaloya aya nesamuya owatipo luwekaka noiye. 22 Sa-oneboya, oloti maya lahelamibo nesamidana nala maya wina okaiyoko edimoya Omaimidana elekelela itikaka niae. Sabomidana ihilawaya oloti maya eto iki minae, ito alikaya elewole eba maya likilae. 23 Yamidana monawaya lahelamibo nesa lolo okakamidana meinawaya helikaka nesa likilae loko eletune. Ito Omailimo nasahilila maya aha nesakidana le oheletokaka noibomidana ihilawa maya We napate Jisesi Kalaestitoka woko omeko minoko elewole lepa mutiwa lekolune.

<- LOMU 5LOMU 7 ->