REVELATION 15

Fapi engel ni bay e tin tomur e gafgow rorad

1 Ma aram mu gguy yugu reb e pow u tharmiy ni ba ga’ ni gu gin ngay, ni medlip i engel ni bay medlip i gafgow rorad. Ireray e tin tomur e gafgow, ya yad e tomur ni ngar daged e damumuw rok Got.

2 Ma aram mu gguy ban’en ni gowa bangi day nni ngongliy ko thirek ni kan athkuy ko nifiy; ma aram mu ku gguy e pi’in ni kar gelgad ko fare gamanman nge fare liyos ni ya’an nni ngongliy, nge ngak fa’anem nni pi’ fithingan nib namba; ni kar sak’iygad u to’oben fare gi day ni thirek, ni bay talin e musik u pa’rad ni harp nike pi’ Got ngorad, 3 ni yad be yin’ fare tang rok Moses, ni ir fare tapigpig rok Got, nge fare tang rok fare Fak e Saf, ni ga’ar:

“Somol ni Got, ni Gubin ma Rayag Rok,

rib sorom ngarogon feni fel’ e ngongol rom!

Me gur e Pilung rok gubin e nam,

rib mat’aw ma ba riyul’ e tirom e kanawo’!

4 Somol, i mini’ e dabi yib madgum ngak?

Mini’ e en nra siyeg ni nge dabi weliy murung’agem nib sorom?

Ya kemus ni go’ gur e gab thothup.

Ya urngin e nam ni bay rabad

ngar ted fam miyad siro’ ngom u p’eowchem,

ya ngongol rom nib mat’aw e urngin e girdi’ ni kar guyed.”

5 Ma nap’an ni mu’ e biney mu gguy fare Tempel nu tharmiy nike mab, ni bay fare tent u lan nma par Got riy. 6 Ma fa medlip i engel ni bay fa medlip i gafgow rorad e rabad u lan fare Tempel nga wuru’; ni ka ron’ed e mad nib klin ma ba wechwech, ma bay e le’ed nib gol ni kan m’ag nga daken ngorongorrad. 7 Me pi’ bagayad fa aningeg i n’em ni yad ba fos, ngak fa medlip i engel, medlip raba’ i ban’en nib gol nike sug ko damumuw rok Got, ni fa’anem ni ir e be par nib fos ndariy n’umngin nap’an. 8 Ma fare Tempel e ke sug ko ath ni yib u ram’en nge gelngin Got, ma dariy be’ nrayag ni nge yan ngalan fare Tempel nge yan i mada’ ko ngiyal’ ni ba’aram nra yan i m’ay fa medlip i gafgow nike fek fa medlip i engel i yib nga fayleng.

<- REVELATION 14 REVELATION 16 ->