1 Ma aram mu gguy ba gamanman nike yib u fithik’ e day ngalang, ni ragag e gagey rok ma medlip lolugen, nra reb e gagey rok ma bay ba kiy i te’eliyaw riy, ma ra reb e pi lolugen nem ma kan yoloy ba ngachal nib kireb ngay nib togopluw ngak Got. 2 Re gamanman nem ni gguy e bod ya’an ba gamanman ni leopard, ni bay ay ni bod ay e gamanman ni bear, nge l’ugun ni bod l’ugun e layon. Me pi’ fare dragon gelngin ngak fare gamanman, nge tagil’, nge mat’awun ni ba ga’ lungun u puluwon e girdi’. 3 Bay reb i lolugen fare gamanman ni gowa ka’an li’ kem’, machane maad’ad ni tay e ke fos. Ma girdi’ nu fayleng ni urngin e ra gin gad ngak miyad lek fare gamanman. 4 Urngin e girdi’ ni ur ted fan ma yad be meybil ngak fare dragon, ya ke pi’ gelngin ngak fare gamanman. Ma ku yad be tayfan ma yad be meybil ngak fare gamanman ni be lungurad, “Mini’ e ta’reb rogon ngak e re gamanman nem? Mini’ e rayag rok ni nge cham ngak?”

5 Re gamanman nem e kan pag ni ngi i yog e thin nrib th’abi kireb, ni ba uf ngay ma ba togopluw ngak Got, ma ku errogon ni kan pag ni nge par nge yog e thin ni aningeg i ragag nge l’agruw e pul. 6 Me tabab i darifannag Got, nge fithingan Got, nge gin ni be par Got riy, nib mu’un urngin e pi’in yad be par u tharmiy ngay. 7 Mi ni pag ni nge cham ngak e girdi’ rok Got me gel ngorad, mi ni pi’ mat’awun ni nge ga’ lungun u puluwon urngin e ganong nge gubin mit e girdi’, nge gubin e thin nge nam. 8 Ma urngin e girdi’ ni yad be par u daken e fayleng ni bay ra siro’gad ngak ma yad be meybil ngak, ni aram e gubin e girdi’ ndawor ni yoloy fithingrad ko ngiyal’ ndawori sum e fayleng riy ngalan fare babyoren e pi’in ni kar fosgad, ni fare babyor nib mil suwon ngak fare Fak e Saf ni fa’an nli’ ngem’.

9 “Ere mu telmed ni fa’anra bay telmed ni ngam rung’aged ban’en ngay! 10 En ni kan finey ni ngan kol e ri bay ni kol; ma en ni kan finey ni ngan li’ ko saydon ngem’ e bmuduwgil ni bay nli’ ko saydon ngem’. Ireray e ngiyal’ ni nge k’adan’ me pagan’ girdi’en Got ngak Got.”

11 Ma aram mu gguy reb e gamanman nike yib ngalang u fithik’ e but’, ni bay e gagey rok nl’agruw ni bod e gagey rok ba pifak e saf, ma be non ni bod ba dragon. 12 Me maruwel nga mat’awun fa bin som’on e gamanman ni ba ga’ lungun u puluwon e girdi’ u p’eowchen e bin som’on e gamanman. Me gelnag e thin rok ngak e girdi’ ni yad be par u fayleng ni ngar ted fan ma yad be meybil ngak fa bin som’on e gamanman, ni ir e ke fos fa gi maad’ad u dow ni susun e ra yim’ riy! 13 Ma biney e gamanman ni ir e bin migid e ba ga’ bogi maang’ang ni i ngongliy; i muruwliy e nifiy nge mul u lanelang nga daken e fayleng u p’eowchen urngin e girdi’. 14 Me bannag urngin e girdi’ ni yad be par u daken e fayleng ni bochan fapi maang’ang nni pag ni nge ngongliy u p’eowchen fa bin som’on e gamanman. Me yog fare gamanman ngak urngin e girdi’ nu fayleng ni ngar ngongliyed ba liyos ni ngan tayfan fare gamanman ni fa’an nni maad’adnag ko saydon, machane de yim’. 15 Ma fa bin migid e gamanman e ni pag ni nge pag athon l’ugun ni bay e yafos riy nga fithik’ fare liyos ni kan ngongliy ni ya’an fa bin som’on e gamanman, me yog ni nge non fare liyos ma rayag ni nge gagiyeg ngan li’ ngem’ urngin e pi’in ndab ra ted fan ma dab ra meybilgad ngak. 16 Me gelnag fare gamanman ir ngak urngin e girdi’ ni pi’in yad ba sobut’ nge pi’in yad ba tolang, nge pi’in ni bo’or ban’en rorad nge pi’in yad ba gafgow, nge pi’in yad e sib nge pi’in ni gathi yad e sib ni ngan tay ba pow nga daken e rifrif u ba’ ni mat’aw i pa’rad nge nga daken peri’rad, 17 ni dariy be’ nrayag ni nge chuw’iy ban’en fe pi’ ban’en nchuway’ ni fa’anra dariy e re pow ney rok, ni aram e fithingan fare gamanman ara re matha’eg nike yan nga luwan fithingan.

18 Ren’ey e ngan gonopiy. Ya en ni ba llowan’ e rayag ni nge pir’eg fan fare namba rok fare gamanman, ya re namba nem e ke yan nga luwan fithingan be’ nib mo’on. Namba rok e nel’ mir’ay nge nel’ i ragag nge nel’.

<- REVELATION 12REVELATION 14 ->