1 Ma aram mu ku gguy reb e engel nib gel nike yib u tharmiy nga but’, ni bangi manileng e mad rok, ni ba longob ba ragim nga lolugen; ma owchen e bod lan mit e yal’, ma ay e bod ruw pa’ i nifiy. 2 Ni bay bangi babyor ni kan pithig u pa’ ni immoy ni kan bachiy. Me tay e ba’ ni mat’aw i ay nga daken e day, me tay e ba’ ni gilay’ i ay nga daken e binaw, 3 me non ni ba ga’ laman ni gowa laman bogi layon nra nonod nta’ab yay. Ma fa’ani mu’ ko numon me fulweg fa medlip i dirra’ ta’ab yay ni ba ga’ lingrad ni chub. 4 Ma nap’an nra nonod mu gu wan ni nggu yol. Machane mu gu rung’ag ba lam nike non u tharmiy ni ga’ar, “Mu tay nib mith e tin keyog fa medlip i dirra’; dab mu yoloy!”

5 Ma fare engel ni gguy nike sak’iy nga daken e day nge nga daken e binaw e yip’ pa’ nga tharmiy 6 me micheg bbugithin nga fithingan Got nma par nib fos ndariy n’umngin nap’an, ni ir e sunumiy e tharmiy nge urngin ban’en ni bay riy, nge fayleng nge urngin ban’en ni bay riy, nge day nge urngin ban’en ni bay u fithik’. Me ga’ar fare engel, “Dab kun sowath! 7 Machane ngiyal’ nra thoy e bin medlip e engel e rappa rok riy, e aram e nge rin’ Got e tin ni kem’ay i leamnag rok ni bod rogon ni yog ngak e pi tapigpig rok ni pi profet, mi i par nib mith.”

8 Ma fare lam ni gu rung’ag laman ni be non u tharmiy e ki non ngog bayay ni be ga’ar, “Mman mu fek fare gi babyor ni kan pithig ni bay u pa’ fare engel nib sak’iy nga daken e day nge binaw.” 9 Mu gu wan ngak fare engel mu gu wenig ngak nge pi’ fachi gi babyor ngog ni kan bachiy. Me ga’ar ngog, “Mfek ngam longuy; ya bayi piliyeg nge mugnin u lan e gil’iggan rom, machane bayi athibthib u lan l’ugunam ni bod lamen e honey.” 10 Mu gu fek u pa’ fachi gi babyor ni kan bachiy nggu longuy, ma ba athibthib lamen u lan l’ugunag ni bod e honey. Ma fa’an gu mu’ i ful’ me pig nge mugnin u lan e gil’iggan rog.

11 Ma aram min ga’ar ngog, “Thingar mu yi’iynag bayay e tin ke turguy Got ni fan ngak e girdi’ ko pi nam i yan, ni gubin mit e girdi’, nge thin, nge pilung.”

<- REVELATION 9REVELATION 11 ->