1 Me ga’ar SOMOL ngak Moses, 2 “Mog ngak Aron ni nge ayliy fa medlip i magal ni ngi i mat nga m’on.” 3 Me fol Aron riy nge ayliy fapi magal nib sap nga m’on. 4 Re tagil’ e magal nem e ni ngongliy ko gol ni ga’ngin nni ammanag nge yani aw ni bod rogon ya’an ni yog SOMOL ngak Moses.

5 Me ga’ar SOMOL ngak Moses, 6 “Mu fael ngabang e pi Levite u fithik’ piyu Israel ngam machalbog nagrad 7 ni ba’aray rogon: mu atngiy fare ran nma machalbog nigey nga dakenrad magog ngorad ngar puyed e piy u dowrad ni ga’ngin miyad luknag e mad rorad. Ma aram miyad machalbog. 8 Ma aram miyad fek ba fak e garbaw ni pumo’on nge fare maligach ni grain ni aram e flour ni kan athkuy e gapgep ni olive ngay; me gur e ngam fek reb e garbaw ni pumo’on ni fen fare maligach ko denen. 9 Aram ma ga kunuy yu Israel ni yad gubin nga ta’bang ma ga tay e pi Levite nga mit fare Tent u p’eowcheg ni yad ba sak’iy. 10 Fapi girdi’ nu Israel e ngar ted rifrifen pa’rad nga daken lolugen e pi Levite, 11 ma aram me pi’ Aron e pi Levite ngog ni aram e ba tow’ath nib mal’eag nike pi’ yu Israel, ya ngar ngongliyed e maruwel rog. 12 Me tay e pi Levite rifrifen pa’rad nga daken lolugen fa gal garbaw ni pumo’on; reb e ngan pi’ nib maligach ni fan ko denen ma reb e nge mang ba maligach ni mo’oruf, ni aram bangbengin ni nge machalbog e pi Levite.

13 “Mu pi’ ngog e pi Levite nib tow’ath nib mal’eag, ma ga tay Aron nge pumo’on ni pifak ni yad e ngrogned e n’en ngu’ur rin’ed. 14 Ara’rogon ni ngam fael nga bang e pi Levite u fithik’ piyu Israel, ya nge milfarad ngog. 15 Nga tomuren ni kam machalbog nagrad ka mu pi’ rad ngog, ma aram e ke bung rogorad ni ngar maruwelgad u lan fare Tent. 16 Kug mel’agrad ni ngar yin’ed luwan urngin e tin ba nganni’ e pumo’on ni pifak yu Israel, ma kemus ni gag e bmilfarad ngog. 17 Nap’an ni gu thang e pogofan rok gubin e tin ba nganni’ e pumo’on ni pifak yu Egypt, mu gu fael ngabang ni aram e ke milfan ngog e tin ba nganni’ e pumo’on u pifak gubin e tabnaw nu Israel, nge tin ba nganni’ u pifak urngin e gamanman rorad. 18 Ere gag e chiney e nggu fek e pi Levite nge yan nga luwan e tin nganni’ e pumo’on u pifak piyu Israel, 19 Are kug pi’ e pi Levite ngak Aron nge pifak ni pumo’on, nib tow’ath nike yib rok yu Israel, ni ngar maruwelgad u lan fare Tent ni fan ko girdi’ nu Israel ma ngkur yororgad rok yu Israel ko riya’ nra aw ngorad ni fa’an yad ra chuchugur nga charen fa Gin nib Thothup.”

20 Ma aram e Moses, nge Aron, nge urngin e girdi’ nu Israel e rrin’ed gubin fa pin’em ngak e pi Levite nri bod rogon ni yog SOMOL ngak Moses ni ngan rin’ ngorad. 21 Pi Levite e ra machalbog niged yad miyad luknag e mad rorad, me pi’rad Aron nib tow’ath nib mal’eag ngak SOMOL. Ma aram miki bangbeng nagrad Aron ni ngar machalboggad. 22 Me rin’ gubin e girdi’ e tin ni yog SOMOL ngak Moses nib l’ag rogon ngak e pi Levite. Ma aram e ke bung rogon e pi Levite ni ngar maruwelgad u lan fare Tent u tan pa’ Aron nge pifak ni pumo’on.

23 Me ga’ar SOMOL ngak Moses, 24 “Fin ra gaman e rliw’ nge lal e duw yangren reb e Levite mrayag ni nge maruwel u lan fare Tent u p’eowcheg, 25 mra gaman e wugem e duw rok bagyad ma nge tal ko maruwel. 26 Nap’an nra taw ko duw rok be’ ni nge tal ko maruwel, ma ku rayag ni ngi i pi’ e ayuw ngak e tin kabe maruwel e girdi’ u lan fare Tent, machane dab kun pagfan reb e maruwel ngak ni yigo’ ir ngay. Irera’ rogon ni ngu’um gafaliy rogon e maruwel ni ngi i rin’ e pi Levite.”

<- NUMBERS 7NUMBERS 9 ->