1 Pi lolgen e tabnaw ko fare ke girdi’ rok Gilead e ranod ra guyed Moses nge ku boch e tayugang’. I Gilead e ba mo’on ni fak Makir nib mo’on ni fak Manasseh nib mo’on ni fak Josef. 2 Miyad ga’ar, “I SOMOL e keyog ngomed ni ngam f’othed e binaw ko girdi’ nu Israel ni duwgil ko pow nra girengyed. Miki yog ngomed ni ngam pi’ed e binaw nge tafnay fapi ppin ni pifak Zelofehad ni girdi’ rodad. 3 Machane ngu’um nanged ni fa’anra figirngiy bagyad reb e pumo’on nga yug reb e ganong, ma binaw rok e ra mil suwon ko fare ganong, ma aram oren e f’oth ni nge yag ngodad e ra lichlich. 4 U lan fare Duwan e Felfelan’, e aram urngin e binaw ni kan pi’ ni chuway’ e nge sul ko pi’in nri taferad, ma binaw rok fapi ppin ni pifak Zelofehad e ra par nike mang bang i tafen fapi ganong ni kar leg’ed mra thay u pa’ e birodad e ganong.”

5 Ma aram me pi Moses ngak fapi girdi’ nu Israel e tin ba’aray e motochiyel rok SOMOL. I ga’ar, “Bmat’aw e bin keyog fare ganong rok Manasseh, 6 ma aram fan nike yog SOMOL ni ppin ni pifak Zelofehad e ba puf mat’awrad ni ngar figirngiyed e en ni yad be leamnag machane kemus nu lan e ganong rorad. 7 Pi gayog ni tafen yu Israel e nge par ni tafen e re ganong nni pi’ ni nge tafnay. 8 Urngin e ppin ni ba’ e gayog rorad ko binaw u lan e ganong nu Israel e thingar ra figirngiyed e pumo’on ni be’ ko re ganong nem. Irera’ rogon me yag nra bagyad yu Israel me tafnay e gayog ko pi ga’ rorad ni kakrom, 9 me par e gayog ni dabi af u reb e ganong nga reb. Ra reb e ganong me par e gayog rok, rok.” 10-11 Ma aram e Mahlah, Irzah, Hoglah, Milcah, nge Noah, ni pi’in ni ppin ni pifak Zelofehad, e ra folgad ko tin keyog SOMOL ngak Moses. Miyad figirngiy pifak walagen e chitamangirad fa chitingirad. 12 Miyad mabgol ko fapi yu ke girdi’ u lan e ganong rok Manasseh nib mo’on ni fak Josef, ma gayog rorad e ki par ko ganong ko chitamangirad.

13 Irera’ e pi gafal nge pi gam’ing ni pi’ SOMOL ngak yu Israel u daken Moses u lan e tafel’fel’ u Moab u charen e lul’ nu Jordan ni bay’ yu Jeriko nga barba’ riy.

<- NUMBERS 35