1 I ga’ar SOMOL ngak Moses, 2 “Mu gechignag piyu Midian ko n’en ni kar rin’ed ngak e girdi’ nu Israel. Ma tomuren ni gra mu’nag e binem, ma bay mum’.”

3 Ma aram me ga’ar Moses ngak e girdi’, “Mu fal’eged rogomed ko mael, ya nge yag nim chamgad ko Midian ni gechig rorad ko n’en nrin’ed ngak SOMOL. 4 Ra reb e ganong nu Israel ma nge pi’ reb e 1,000 riy nge yan ko mael.”

5 Ere ra reb fapi ganong ma reb e 1,000 nni mel’eg riy, aram me yan i gaman 12,000 e pumo’on ni nge yan ko mael. 6 Ma aram me pi’rad Moses ko mael u tan lungun Finehas nib mo’on ni fak Eleazar ni prist, ni ir e i ayweg e pin’en nib thothup nge pi yabul ni yima thoy ni pow u ban’en. 7 Miyad cham nga Midian, ni bod rogon ni yog SOMOL ngak Moses, mra li’ed gubin e pumo’on, 8 nib mu’un fa lal i pilung nu Midian ngay: ni Evi, Rekem, Zur, Hur, nge Reba. Ku ra li’ed Balaam ni fak Beor.

9 Me leag e girdi’ nu Israel e ppin nu Midian nge bitir, miyad fek e garbaw nge yu ran’ i gamanman rorad, miyad fek u yargal urngin e tin falel’ ban’en, 10 miyad urfiy gubin e binaw nge Tent rorad. 11 Miyad fek urngin e chugom, nib mu’un e pi’in kalbus ngay nge gamanman, 12 ngar feked i yan ngak Moses nge Eleazar nge girdi’en yu Israel, ni yad bay ko tafel’fel’ u Moab u puluwon yu Jeriko nga barba e lul’ u Jordan.

13 I Moses, Eleazar, nge gubin fa tin kabay e tayugang’ ko ulung nu Israel e ranod nga wuru’ e gin yad be par riy ngar mada’ niged fare raba’ i salthaw. 14 Mri damumuw Moses ko fapi tolang ko salthaw 15 me fithrad ni ga’ar, “Mangfan ni kam ted gubin e ppin ni kabfos? 16 Gimed manang ni ppin e i fol ko n’en ni i yog Balaam u Peor ngar waliyed e girdi’ ndaki yul’yul’ ngak SOMOL. Ni aram e ren’en ni girengiy e liliy nga daken e girdi’ rok SOMOL. [a] 17 Ere chiney e ngam li’ed urngin e pagel nge urngin e ppin nike nang e pumo’on, 18 machane dab mu thanged e pogofan rok urngin e bulyal nge ppin ni dawor i nang e pumo’on nge par nike mil fanrad ngomed. 19 Chine’ e urngin i gimed ni thang reb e pogofan fa math nga ba ldow e thangri par nga wuru’ e gin nma par yu Israel riy ni medlip fen. Ma bin ni dalip e rran nge bin medlip fen e ngam be’ech niged gimed nge ppin ni gimed e mu yag niged. 20 Thingar kumu be’ech niged urngin yang e mad romed nge gubin ban’en nni ngongliy u keru’ e garbaw, nge bunu’en e kaming fa ren.”

21 I Eleazar ni fare prist e ga’ar ko fapi pumo’on ni kar sulod ko mael, “Irera’ e pi gafal ni pi’ SOMOL ngak Moses. 22-23 Urngin e tin dabi yik, ni aram e gol, silber, bronze, wasey, kobre’, fa lead, e ngan be’echnag ni ngan laeg u mit e nifiy. Ma urngin e tin kabay e ngan be’echnag ko ran ni fan ko machalbog. 24 Ma bin ni medlip fen ngay, e thingar mu maluk niged e yung i mad romed; ma aram e gimed ra be’ech iip ma yira ni pagmed nga langgin e gin be par yu Israel riy.”

25 Me ga’ar SOMOL ngak Moses, 26 “I gur nge Eleazar, e ngam unew ngak e pi tayugang’ ko ulung nu Israel, ngam the’eged urngin e tin kan kol, nib mu’un e kalbus ngay nge gamanman. 27 Mi gimed f’oth ni l’agruw guruy ni ta’reb rogon, nib guruy e nge yan ko salthaw ma ba guruy e nge yan ko ulung nu Israel. 28 Ma guruy nib milfan ko salthaw, e ngan fek e tax riy ni fen SOMOL ni ta’reb u gubin e 500 e kalbus ma ku aram rogon e garbaw, dongki, saf, nge kaming. 29 Min pi’ ngak Eleazar ni prist ba f’oth nib mal’eag nifen SOMOL. 30 Ma guruy ni kan pi ko tin kaba’ e girdi’ e ngan fek ta’reb u fithik’ urngin e yu wugem ko pi kalbus ma ku aram rogon ni ngan rin’ ko garbaw, dongki, saf, nge kaming. Min pi’ ngak e pi Levite ni yad e ba milfan e Tent rok SOMOL ngorad.” 31 I Moses nge Eleazar e rrin’ew ni bod ni yog SOMOL ni ngan rin’.

32-35 Irera’ babyoren e tin ni kol e salthaw u tan e mael, nib chagil ko tin kar ted ni nge par rorad: 675,000 e saf nge kaming, 72,000 e garbaw, 61,000 e dongki, ma 32,000 e ppin ni dawor i nang e pumo’on. 36-40 Baley ko fare f’oth ni yag ngak e salthaw e 337,500 e saf nge kaming, ma 675 riy e tax nni pi’ ngak SOMOL; 36,000 e garbaw rok e salthaw, ma medlip i ragag nge l’agruw riy e tax nni pi’ ngak SOMOL; 30,500 e dongki rok e salthaw, ma nel’ i ragag nge ta’reb riy e tax nni pi’ ngak SOMOL; ma 16,000 e ppin ndawor i nang e pumo’on ni nge milfan ko salthaw, ma guyey nge l’agruw riy e tax nni pi’ ngak SOMOL. 41 Ere pi’ Moses ngak Eleazar fare tax nib mel’eg ni f’oth ku SOMOL, aram rogon ni yog SOMOL.

42-46 Bin f’oth rok e ulung nu Israel e ta’reb oren ko birok e salthaw: 337,500 e saf nge kaming, 36,000 e garbaw, 30,500 e dongki, ma 16,000 e ppin ni dawor i nang e pumo’on. 47 Biney e f’oth e fek Moses ta’reb u fithik’ urngin e yu wugem ko pi kalbus nge gamanman, ni bod ni yog SOMOL, ni ngan pi’ ko pi Levite ni yad e ba milfan fare Tent rok SOMOL ngorad.

48 Ma aram e pi’in ga’ ko salthaw e ranod ngak Moses 49 ngar ga’argad ngak, “Siro’, kug the’eged e salthaw ni yad bay u tan pa’mad ma dariy baygad nike malog. 50 Ere kug feked i yib e nunuw ni gol, ni armlet, bachel, luwow, talbuch, nge yukiy i churwo’ nra bagmad ma tin ke fek. Ni nggu ognaged ngak SOMOL ni puluwon e yafos romad, ya ngi i yoror romad.” 51 Me fek Moses nge Eleazar fapi gol, ni gubin ma go’ bogi nunuw. 52 Tomalngin e re mukun nem ni pi’ e pi ga’ ko pi salthaw e ba yo’or ko 400 pawn. 53 Ma pi’in gathi yad fapi ga’ ko salthaw e ra cha’ariyed e tin nra feked ko mael. 54 Ma aram me fek Moses nge Eleazar e gol i yan ko fare Tent, ya SOMOL e ngi i yoror ko girdi’ nu Israel.

<- NUMBERS 30NUMBERS 32 ->