1 Me yib Jesus u daken fare burey nga but’, me yib e girdi’ ni pire’ ngar uned ngak. 2 Me yib be’ nib daraw ngak, ngeb i ragbug u p’eowchen nga but’, me ga’ar, “Somol, fa’anra mm’agan’um ngay, mrayag rom ni ngam be’ech nigeg.”*NGAM BE’ECH NIGEG: Re m’ar ni daraw ney e ra bay rok be’ ma ke alit ko yalen rorad.

3 Me k’iyag Jesus pa’ nge math ngak. Me fulweg ni ga’ar, “Bm’agan’ug ngay, aram e ngam be’ech!” Kachingiyal’ nem me chuw e daraw rok. 4 Ma aram me ga’ar Jesus ngak, “Dabmog murung’agen e n’en ni kug rin’ ngom ku be’, machane mman ndab mu tal u bang ngam man mu taw ngak e prist nge guy ko kabay e daraw rom fa dakuriy, ma ga pi’ fare maligach ni fa’ani yog Moses, ni ir e nge mang mich rom ngak urngin e girdi’ ndakuriy e daraw rom e chiney.”

5 Nap’an ni yan Jesus ngalan yu Kapernaum me yib be’ ngak nreb e tolang ko salthaw nu Roma ngeb i wenig ngak ni nge ayuweg ni ga’ar, 6 “Tapigpig rog e bm’ar ni bay u bet u tabinaw rog ndabkiyag ni nge mithmith ma kari gafgow.”

7 Me ga’ar Jesus, “Bay gu wan gu chuweg e m’ar rok.”

8 Me fulweg fare tolang ko salthaw ni ga’ar, “Dariy rogog ngabang ni nga mub nga naun rog. Ere yugu mog ni nge chuw e m’ar rok e tapigpig rog nge gol. 9 Ya ku errogon gag ni bay boch i pilungen e salthaw nga dakenag, ma bay boch e salthaw nga tanginag; ra lungug ko biney, ‘Mman!’ me yan; mra lungug ko binem, ‘Moy!’ me yib; mra lungug ko sib rog, ‘Mu rin’ e biney!’ me rin’.”

10 Ri gin Jesus ko re bugithin ney ni rung’ag, me ga’ar ko fapi girdi’ ni yad be un ngak, “Nggog ngomed, ndawor gguy be’ u Israel nrib mich Got u wan’ ni bod gelngin nib mich Got u wan’ e cha’ney. 11 Mu ted fanmediyan ko re bugithin ney! Bo’or e girdi’ ni bay rabad u lan e ngek ngu lan e ngal ngar uned ngak Abraham, nge Isak, nge Jakob ko par nga tebel ko gin nsuwon Got u tharmiy. 12 Ma pi’in nsusun e ngar pired ko gin nsuwon Got e bay nin’rad nga wuru’ e gin nsuwon Got nga fithik’ e lumor, ko gin ni bay ur yorgad riy ma be chachafin nguwelrad.” 13 Me ga’ar Jesus ngak fa en ni ir reb e tolang ko salthaw, “Mu sul nga tabinaw rom, ya rogon nike michan’um e aram rogon ni bay nrin’ ni fan ngom.” Ma fare tapigpig rok fa’anem ni reb e tolang ko salthaw e ka lan e re awa nem e gol riy.

14 Me yan Jesus nga tafen Peter, me guy e en ni chitiningin leengin Peter u bet nib m’ar nib gel e gowel u daken. 15 Me math Jesus nga pa’; me chuw e gowel u daken, me suwon ngalang me tabab i ayuweg Jesus ko tin ni nge yag ngak.

16 Ma fa’ani neap’, min fek i yib ngak Jesus e girdi’ ni pire’ nike ying e mo’onyan’ ngorad. Me tuluf Jesus fapi mo’onyan’ nga ta’ab bugithin ngar chuwgad rok fa pi’in kar yinggad ngorad, me golnag urngin e pi’in yad bm’ar. 17 I rin’ e ren’ey ni fan e nge yib i m’ug nib riyul’ e tin ni yog Isaiah ni profet ni ga’ar, “I ir e fek e m’ar rodad me fek e liliy rodad nge chuweg.”

18 Me guy Jesus e girdi’ ni aram urngirad ni kar mu’ulunggad ngak me yog ngak pi gachalpen ni nga ni yan nga baraba’ fare lipath. 19 Me yib be’ ni tamchib ko Motochiyel ngak, me ga’ar, “Tamchib, kug fal’eg rogog ni nggu un ngom ko yungi n’en ni ngam man ngay.”

20 Me fulweg Jesus ngak ni ga’ar, “Gamanman ni fox e bay e low ni taferad, ma arche’ e bay taferad ni kar toyed, machane en ni Fak e Girdi’ e dariy bang ni nge pag ir riy nga but’ nge toffan.”

21 Ma be’ ni ir reb i gachalpen e ga’ar ngak Jesus, “Somol mu son, nga’ag wan gu k’eyag e chitamag.”

22 Me fulweg Jesus ngak ni ga’ar, “Mu lekeg, mpag e pi’in yad ba yam’ ngar k’eyged e yam’ rorad.”

23 Me af Jesus nga bowoch, me un pi gachalpen ngak ngranod. 24 Me yib e nifeng nrib gel nib tomgin, mi i t’ar e n’ew ngalan fare bowoch. Machane be mol Jesus. 25 Me yan pi gachalpen ngak ngar puged, me lungurad ngak, “Somol, mu guy rogon ngad fosgad! Ya ere ngad m’ad!”

26 Me fulweg Jesus ni ga’ar, “Mang ni kari mu rusgad? Rib achig e michan’ romed ngak Got!” Me sak’iy ngalang nge non ko nifeng nge n’ew, me ri mocha’.

27 Mi yigo’o gin fa pi’inem ngak me lungurad, “Ba mang girdi’ e cha’ney? Ya mus ko nifeng nge n’ew ma be fol rok!”

28 Me yib Jesus ko nug nu Gadara, ni bay u ba’nem fare lipath, me yib l’agruw i mo’on ngak nra bow u fithik’ bogi yiy ni yima chibgiliy e yam’ riy. Gali cha’nem e ke ying e mo’onyan’ ngorow, ma ri yow ba damumuw nrayag ni ngar kalgow ngak be’, ni aram fan ndariy be’ nrayag rok ni nge yan u daken e re pa’ i kanawo’ nem. 29 Ka chingiyal’ nem miyow tolul ni be lungurow, “Fak Got, mang e kam finey ni ngam rin’ ngomow? Ka mub ni ngam gechig nagmow u m’on ko ngiyal’ ni bay ni gechig nagmow riy?”

30 Ma bay ba ran’ i babiy ni yad be abich ndar mal’afgad. 31 Me wenig fapi mo’onyan’ ngak Jesus ni be lungurad, “Fa’anra ngam tulufmad nggu chuwgad u fithik’ e gali cha’ney, me ere mol’ogmad nggu warod gu yinggad ngak e re ran’ i babiy nem.”

32 Me ga’ar Jesus ngorad, “Mmarod,” ma aram miyad chuw ngranod ra chuwgad nga fithik’ fapi babiy. Me mil fare ran’ i babiy ngranod ra mulgad u taban bangi war ngalan fare lipath ngar limochgad.

33 Me ere mil fa picha’ ni ur gafaliyed fapi babiy ngranod ngalan binaw, miyad weliy urngin e tin kar guyed nge n’en ke rin’ fa gali mo’on ni ying e mo’onyan’ ngorow. 34 Ma aram e gubin e girdi’ ko re binaw nem nranod nga wuru’ e binaw ni ngar mada’gad Jesus; ma fa’anra guyed miyad wenig ngak ni nge chuw ko nug rorad.