1 Bang ko fare gi but’ ni bay ko ngal u Jordan e ni pi’ ngak boch fapi tabnaw ni owchen e bin nganni’ e pumo’on ni fak Josef ni aram Manasseh. Me Makir e chitamngin Gilead ma irreram e bin nganni’ e pumo’on u fak Manasseh, cha’anem i Makir e reb e salthaw nrib cheag mab flu’, ere ni pi’ yu Gilead nge yu Bashan ngak ni bay ko ngek ko Jordan. 2 Ma bang e binaw ni bay nga ba’ ni ngal u Jordan e ni pi’ ngak e tin kabay ko fapi tabnaw rok Manasseh, ni aram Abiezer, Helek, Asriel, Shekem, Hefer, nge Shemida. Pi cha’ney e pumo’on ni owchen Manasseh ni fak Josef, ma yad lolugen e pi tabnaw. 3 Me Zelofehad nib mo’on ni fak Hefer, nib mo’on ni fak Gilead, nib mo’on ni fak Makir, nib mo’on ni fak Manasseh, me Zelofehad e dariy e pumo’on ni fak ya kemus ni go’ ppin. Fithingrad e Mahlah, Noah, Hoglah, Milkah, nge Tirzah. 4 Mranod ngak Eleazar ni fare prist nge ngak Joshua ni be’ ni pumo’on ni fak Nun nge ngak e pi tayugang’ me lungurad, “Keyog SOMOL ngak Moses ni nge pi’ ngomad nge pi pumo’on ni pibe’ romad bang ko re gi but’ ney ni nggu tafned.” Ere rogon ni yog SOMOL ni ngan rin’ e aram rogon nrin’, ni pi’ bang e binaw ngorad nge ngak e pi pumo’on ni pibe’ rorad. 5 Irera’ e n’en ni rin’ me yag ragag e f’oth ngak Manasseh ngki puthuy nga Gilead nge Bashan u ba’ ni ngek e Jordan, 6 ya pi’in owchen nib ppin nge pumo’on e go’ ni pi’ taferad binaw. Fare gi binaw nu Gilead e ni pi’ ngak e tin kabay ko pi’in owchen Manasseh.

7 Fa gin’em ni tafen Manasseh e yan u Asher nge mada’ nga Mikmethath, ko ngek u Shekem. Me yan e mathil riy ko yimuch nge un e girdi’ nu Entappuah ngay. 8 Fare gi but’ nib liyeg yu Tappuah e ba milfan ngak Manasseh, machane fachi binaw nu Tappuah ni bay ko mathil e ba milfan ngak e pi’in owchan Efraim. 9 Me yan fare mathil nga pe’ning nge taw ko fachipa’ i lul’ ni Kanah. Fapi binaw ko yimuch ko fachipa’ i lul’ e ba milfan ngak Efraim, ni yug aram rogon ni yad bay ngalan tafen Manasseh. Ma mathil rok Manasseh e yan u mirichlen fachipa’ i lul’ u ba’ ni lel’och nge yan i mus ko fare gi Day ni Mediterranean. 10 Efraim e bay ko yimuch, ma Manasseh e bay ko lel’och, ma fare gi Day ni Mediterranean e aram e mathil rorow ko ngal. Me Asher e bay ko lel’och ni ngal, me Issakar e bay ko lel’och ni ngek. 11 Mu lan e yungin ni tafen Issakar nge Asher e binaw e kubay tafen Manasseh riy ni aram yu Beth Shean ngu Ibleam, nib mu’un e yuchi binaw nib liyeg fa gal binaw ngay, ku aramrogon yu Dor (fare binaw ni bay u dap’el’ay), ngu Endor, ngu Taanak, ngu Megiddo, nge yuchi binaw nib liyeg e pi binaw nem. 12 Fapi girdi’ rok Manasseh e de yag rorad ni ngar tulufed fapi girdi’ ni yad ma par u lan e pi binaw nem ngar chuwgad, ere miki par piyu Kanaan u rom. 13 Mus ko ngiyal’ nike gel lungun yu Israel i yan ma dar tulufed nge chuw piyu Kanaan ni gubin u rom, machane ra tedrad ni ngu’ur marwelgad ngorad.

14 Me ga’ar e pi’in owchen Josef ngak Joshua, “Mangfan ni kemus ni ta’bang ko fare gi binaw e kam pi’ ngomad ni nggu tafned? Gamad ba yo’or ni bochan e ke fal’eg SOMOL wa’athmad.”

15 Me fulweg Joshua ni ga’ar, “Fa’anra kaygu myo’orgad ma dakumur fel’gad u daken fare gi binaw ni go’ burey u Efraim, me’ere mmarod ngalan e pi loway ngam tamilang niged bang ngam pired riy u tafen e piyu Periz nge pi Refaim.”

16 Miyad fulweg ni lungurad, “Fare gi binaw ni go’ burey e dab gu fel’gad nga daken, ma piyu Kanaan u lan e tafelfel’, e bay e chariot ni wasey rorad, ni yad ruw ulung nma par bochi i yad u Beth Shean nge yochi binaw nib liyeg, ma bochi i yad e ma par u lan fare loway ni Jezreel.”

17 Me ga’ar Joshua ngak e ganong rok Efraim nge ba’ ni Ngal e Manasseh, “Rriyul’ ni gimed ba yo’or, ma rib gel gelingmed. Dabisiy ni nge yo’or e f’oth romed ko ta’reb. 18 Gin’en ni go’ burey e bayi par romed. Yug aram rogon nib upong ko gek’iy, ma bay mu tamilang niged mi gimed tafna’ u baley nge mada’ nga baley. Ma piyu Kanaan e bay mu tulufedrad ngar chuwgad u rom, ni yug aram rogon ni bay e pi chariot ni wasey rorad ma yad bogi girdi’ ni yad ba gel.”

<- JOSHUA 16JOSHUA 18 ->