28
Liyor u fithik’ e gonop*Hebrew e de yog riy ko mini’ e non.
1 Bay boch e yiy ni yima ker e silber riy;
ma bay yu yang ni yima renrennag e gol riy ngan chuweg e chabung u fithik’.
2 Girdi’ e ma ker e wasay u fithik’ e but’,
ma copper e yima renrennag u fithik’ e malang.
3 Girdi’ e yad be magow ko yungin th’abi lumor.
Yad be magow ko gin th’abi to’ar ko fayleng
ni yad be fu’og e war u fithik’ e lumor.
4 Yad ba palog ko gin ma par e girdi’ riy
ni dariy be’ ni ka’e milekag ngay,
girdi’ e ma ker yupa’ i yiy u tan e but’.
Ni aram e gin ni ur marwelgad riy ni go’yad
ni kar chichi’iyed pa’rad ko gaf u lan fapi yiy.
5 Ggan e ma tugul u daken e but’,
machane tanggin e re but’ nem
e ke mogoth.
6 Malang u fithik’ e but’ e bay e sapphire riy,
ma chubngen e malang e bay e gol riy.
7 Dariy ba arche’ ni hawk nike guy e pi kanawo’ ni yan ko fapi yiy,
ma ku dariy ba arche’ ni vulture nma chengag u daken e pi kanawo’ nem.
8 Dariy ba layon fa boch e gamanman ni malboch
nike yan u daken e yupa’ i kanawo’ nem.
9 Girdi’en e fu’og yiy e ra fu’oged e tin th’abi el e war,
miyad pug e pi burey u but’.
10 Ngiyal’ ni yad be fu’og wo’rad u fithik’ e war,
miyad pir’eg e malang nib tolang puluwon.
11 Miyad fu’og i yan nga p’ebgul e lul’
ngar feked i yib ko tamilang e tin nib mith.
12 Machane uw e yira pir’eg e gonop riy?
Uw e gadad ra nangfan riy?
13 Gonop e dab ni pir’eg u fithik’ e girdi;
dariy be’ ni manang e bin rriyul’ i fal’ngin.
14 Pi t’ay e regur nge pi day
e yow be yog ni gonop e dab ni pir’eg u rom.
15 Dabiyag i chuwi’iy ko silber nge gol.
16 Tin th’abi fel’ e gol nge churwa’
e dabi chugur nga fal’ngin.
17 Dariy ban’en nra ta’reb rogon ngay —
ni mada’ ko rume’ ni gol nge, therik nib tolang puluwon.
18 Pulwon e gonop e ba ga’ nga puluwon
e malang ni lugoch ara crystal ara rubies.
19 Tin th’abi fel’ e malang ni topaz nge gol
e dabyag i ta’rebnag nga felngin e gonop.
20 Ere, uw e yib e gonop riy?
Uw e rayag ni nga da nanged fan riy?
21 Dariy ban’en nib fos nike guy,
ni mus ko arche’ ni be changag.
22 Mus ko yam’ nge riya’
e karognew ni kay gu rung’agew murung’agen.
23 Kemus ni go’ Got e manang e kanawo’ ngay,
manang e gin ni yira pir’eg e gonop riy,
24 Ni bochan e be guy e gin ni mus e fayleng riy,
ma be guy gubin ban’en u tanggin e tharmiy.
25 Nap’an e ra pi Got gelngin e nifeng
me duwgiliy ga’ngin e day;
26 Nap’an nra duwgiliy Got ko uw e nge aw e n’uw riy,
nge kanawo’en e manileng nma chub e dira’ riy;
27 Ireram e gin ni guy e gonop riy me sikengnag fal’ngin —
ma bmagan’ ngay.
28 Ga’ar Got ngodad e girdi’,
“Ga ra gonop, ma aram e ke yib dugwen SOMOL u wan’um.