BABYOR NI

JOB
Murung’agen e Re Ke Babyor Ney
Fare Babyor ni Job e murung’agen be’ nib mo’on ni bfel’, ni aw e gafgow ngak nib gel, ni yim’ urngin e bitir rok, me mul u pa’ urngin ban’en rok, me yib ba mit e m’ar nib sonogor nga downgin. Rogon ni non Job nge pi tafager rok e be dag rogon e leam rok bagayad nge bagayad ko re gafgow nem ni yib ngak Job. Ma tomur riy me non Got ngak Job.
Pi tafager rok Job e yad ma leamnag ni Got e ma pi’ puluwon e tin bfel’ nma rin’ e girdi’, mma gechignag e girdi’ nike rin’ e kireb, ere re gafgow nem nike yib ngak Job e kar dugliyed nike rin’ Job ban’en nib kireb. Machane me leamnag Job ni gathi aram rogon, ya i par nrib mat’aw ma mmanigil, ma dariy rogon ni nge yib e binem e gechig ngak. Denang Job ko mangfan ni pag Got e binem e gafgow nge yib ngak. I Job e de mul e michan’ rok ngak Got, machane ba’adag ni nge yib i m’ug ni ir be’ nib mat’aw u p’eowchen Got.
Me non Got ngak Job ni be dag rogon feni gonop nge feni gel gelngin. De pi’ e fulweg u urngin e thin ni fith Job, machane me ayuweg ni bochan e michan’ rok ngak. Me yog Job u fithik’ e sobut’an’ ni Got e ba gonop ma ba sorok, me kalngan’ ko thin ni yog nib sor fan ngak Got u fithik’ e damumuw.
Me fulweg Got Job nga rogon me ayuweg nge fel’ rogon ko som’on. Me puwan’ Somol ngak e pi tafager rok Job ni bochan e deyag nra nanged fan e gafgow ni yib ngak Job. Kemus ni Job e manang rok raragon Got ni kab sorok ma kab ga’ nga rogon ni yima weliy ko taliw rorad.
Gathon e Re Ke Babyor Ney
Somm’on riy 1:1—2:13
Job nge pi tafager rok 3:1—31:40
a. Tini yog Job ndabun 3:1–26
b. Bin m’on e welthin 4:1—14:22
c. Bin l’agruw e welthin 15:1—21:34
d. Bin dalip e welthin 22:1—27:23
e. Feni ga’ fan e Gonop 28:1–28
f. Thin ni yog Job ntomur 29:1—31:40
Pi welthin rok Elihu 32:1—37:24
I Somol ni fulweg lungun Job 38:1—42:6
Thin nni weliy ko tomur 42:7–17

Mo’onyan’ ni sikengnag Job

1 Immoy be’ nib mo’on ni Job fithingan, ni i par ko nam nu Uz. I par ni be liyor ngak Got ma ba yul’yul’ ngak. I par ni ir be’ nib manigil ma be ayuw ni nge dabi rin’ ban’en nib kireb. 2 Medlip e pagel ma dalip e ppin ni fak, 3 ma bay 7,000 e saf rok, ma 3,000 e kamel, ma 1,000 e garbaw, ma 500 e dongki. Ma ku bpire’ e pi tapigpig rok, me ir e th’abi yo’or ban’en rok u rom u lan e ngek.

4 Fapi pumo’on ni fak e yad ma ngongliy e mur ni be cheal u dakenrad, bayi ngongliy bagayad e mur, me pining urngin pi walagen ngarbad ngay. Ma gubin ngiyal’ ni yad ma pi’ e thin ngak fa dalip i ppin ni walagrad ni ngarbad ra uned ngorad ko mur. 5 Nap’an ni yad ra mu’u reb e mur me reb e rran riy nri kab kadbul me od Job nge li’ e gamanman nge pi’ ni maligach ngak Got ni fan e nge n’ag Got fan e denen rok pifak ngar machalboggad. Gubin yay ni i rin’ ni aray rogon, ya be leamnag nrichey ma ke denen bagayad ni gomanga keyog bbugithin nib tagan ngak Got, ni gathi ri aram rogon ni leamnag.

6 Fa’ani taw ko rofen ni nge yan e pi chon e tharmiy*PI CHON E THARMIY: Pi kan ni yad ma pigpig ngak Got u tharmiy. nga p’eowchen SOMOL, ma bay Satan†SATAN: Bbugithin ni Hebrew ni fithingan fare pilungen e mo’onyan’, ni be dag ni ir e togopluw rok e girdi’. u fithik’rad. 7 Me fith SOMOL ngak ni ga’ar, “Mang e ku’um rin’ boch?”

Me fulweg Satan ni ga’ar, “Ku’ug yanyan ni gu be liyeg e fayleng.”

8 Me ga’ar SOMOL, “Mog, kam guy fare tapigpig rog i Job? Dariy be’ u fayleng nib yul’yul’ ma bfel’ ni bod ir. Bay madgug u wan’ mma ayuw ni nge dabi ngongliy e kireb.”

9 Me fulweg Satan ni ga’ar, “Gur ra i par Job ni bay madgum u wan’ ni fa’anra der yib e fel’ riy ngak? 10 Kam par ni ga be yoror rok nge girdi’ nu tabinaw rok nge urngin ban’en ni bay rok. Ga be fal’eg wa’athan u urngin e tin be ngongliy, ma urngin e garbaw ni ka mu pi’ ngak e ke yo’or u daken e ted i yan. 11 Machane ga ra fek rok urngin e tin bay rok, ma ra yog nga owchem e thin nib togopluw ngom.”

12 Me ga’ar SOMOL ngak Satan, “Kefel’, ke milfan e urngin rok ngom, machane dab mu gad pa’am ngak.” Ma aram me yan Satan.

Job ni mul pifak u pa’ nge gubin ban’en rok

13 Me reb e rran ni be mur pifak Job u tabinaw rok e bin ilal i fak ni pumo’on, 14 me mil be’ i yib ngak Job nge yib i yog e thin ngak ni ga’ar, “Gamad be maruwel ko garbaw be gi’ e but’ u milay’, ma bay e pi dongki ni yad be kay e pan ni yad ba chugur ngomad. 15 Ma gamad gin ma ke yib e girdi’ ni kanog e pi Sabean‡ ngorad, ra chamgad ngomad miyad fek fapi garbaw nge dongki ni urngin. Miyad li’ urngin fapi tapigpig rom, kemus ni gag e kug thay ku gub ni nggu weliy ngom.”

16 Dawori mu’ ko welthin, me taw yug reb e tapigpig rok me ga’ar ngak, “Ke aw e dirra’ ngak fapi saf nge pi’in yad be gafaliyrad karm’ad ni yad gubin. Kemus ni gag e kug thay ku gub ni nggu weliy ngom.”

17 Dawori mu’ ko welthin, me taw yug reb e tapigpig rok me ga’ar ngak, “Dalip ulung e girdi’ ni kanog e pi Kaldean§KALDEAN: Fithingan bogi girdi’ ni yad ma milekag i yan ni yad ma yib ko lel’och. ngorad e karbad ra oggad ngomad, ka ra feked fapi kamel ma kar li’ed urngin e tapigpig rom. Kemus ni gag e kug thay ku gub ni nggu weliy ngom.”

18 Dawori mu’ ko welthin, me taw yug reb e tapigpig rok me ga’ar ngak, “Pifakam e yad be mur u tafen e bin ilal e pumo’on ni fakam, 19 me yib ba yoko’ u daken e ted ni desert ngorad. Me buthug e naun ngarm’ad ni yad gubin. Kemus ni gag e kug thay ku gub ni nggu weliy ngom.”

20 Me sak’iy Job nge guchthuy e mad rok ni kari kireban’. Me suruy e piy u chugen nge m’ay me paraw nga but’. 21 Me ga’ar, “Ni gargel nigeg ndariy ban’en rog; ere bay gum’ ndariy ban’en nra un ngog. I SOMOL e ma pi’, me ir e ke fek rog e chiney. Ngan pining e sorok nga fithingan SOMOL!” 22 Yug aram rogon e tin yib ngak, machane de denen Job, ya de yin’ e kireb riy nga daken Got.

JOB 2 ->