1 I non SOMOL ngog u nap’an ni be cham Nebukadnezzar ni Pilung nu Babylon nge salthaw rok, nge yu raba’ i salthaw u gubin e nam ni ku yad be pi’ e ayuw ngak, nge gubin mit e girdi’ u lan gil’ilungun nga Jerusalem nge yochi binaw nib chuchugur ngaram. 2 I SOMOL, ni fare Got rok yu Israel e yog ngog ni nggu waen gog ngak Zedekiah ni Pilung nu Judah ni ga’ar, “I Gag SOMOL e bay gu pi’ e re binaw ney nga pa’ e pilung nu Babylon, nge urfiy nga but’. 3 Dabyag ni ngam mil; bay ni kolem ngan pi’em nga pa’. Bay mmada’nag nge sabal owchamew ngam nnow. Ma aram e bay ni fekem nga Babylon. 4 Zedekiah, motoyil ko n’en ni gu be yog u murung’agem. Dab ni li’em ngamum’ u fithik’ e mael. 5 Bay mum’ u fithik e gapas, ni bod rogon e girdi’ ni urfiy e incense u nap’an ni yad be ke’yag e pi’ ga’ rom kakrom, ni ur pilunggad u m’on ngom, ma ku aram rogon ni yad ra urfiy e incense ni fan ngom. Bay ur yor niged gur ni yad be ga’ar, ‘Ke yim’ e pilung romad!’ I Gag SOMOL e kugog e pi thin ney.”

6 Ma aram mu gu waen gog e re thin ney ngak Zedekiah ni Pilung u Jerusalem 7 u nap’an ni be cham e salthaw rok fare pilung nu Babylon ko fare binaw. Fa raba’ i salthaw e ki cham nga Lakish ngu Azekah, ni kari mus e gal binaw ni ka ni yororiy ni fan ko mael ni magach u lan yu Judah.

8 Zedekiah ni Pilung nge girdi’ nu Jerusalem e ra dugliyed ni ngar paged 9 nge puf mat’won e pi sib rorad ni Hebrew, ni pumo’on nge ppin, ya nge dabki sib be’ nu Israel rok be’. 10 Gubin e girdi’ nge pi tayugang’ ni m’aguwan’rad ni ngar paged nge puf mat’won e pi sib rorad ma dakriy bi’id ni ngkur manged sib. Ra paged yad nge puf mat’wonrad, 11 machane de n’uw nap’an me thil lanin’rad, miyad fulweg fapi cha’ ngan motogel ngorad ngkur manged sib bayay.

12 Ma aram e fare SOMOL, 13 ni Got nu Israel, e yog ngog ni ngugog ko girdi’ ni nge lungug: “Gu ngongliy ba m’ag u thilmad e pi chitamangimed u nap’an ni gu chuwegrad u pa’ yu Egypt nggu pithigrad ko sib ni ur ted. Mu gog ngorad ni 14 gubin e medlip e duw ma ngar paged pi sib nu Hebrew nike pigpig ngorad u lan nel’ e duw. Machane pi’ chitamangimed e dar folgad rog ma dar motoyilgad ko n’en ni gog. 15 Dawri n’uw nap’an nim thilyeged lanin’med ngam rin’ed e n’en nib magan’ug ngay. Gimed gubin ni magan’med ngay ni ngam paged e girdi’ nu Israel nge puf matawrad, mi gimed ngongliy ba m’ag u p’eowcheg, u lan fare Tempel ni yima liyor ngog riy. 16 Machane mukum thiliyeged e tafnay romed bayay ngam m’ay niged fag. Gimed gubin ni mu fulweged fapi sib ni kam paged kepuf rograd ni aram rogon ni yad ba’adag, ngam motogel gad ngorad ngkur manged sib bayay. 17 Ere chiney, I Gag SOMOL e gu be yog ni damur folgad rog; dawor mu pi’ed e pufrogon nga Israel ni polo’. Ere kefel’, bay gu pi’ e pufrogon ngomed: nge pufrogmed ngam m’ad, u fithik’ e mael, ko liliy, nge uyngol. Bay gu pag gubin e nam nu fayleng ngar da’da’gad ni marus ko pin’en ni bay gu rin’ ngomed. 18-19 Pi tolang ko salthaw nu Judah ngu Jerusalem, nge pi’in ba ga’ lungrad u tafen e pilung, nge pi prist, nge gubin e tayugang’, ni nra ngongliyed ba m’ag u thilmad ni rseyed ba garbaw nge ruw raba’ ngranod u thilin. Miyad cheal ngar th’abed fare m’ag ni dar folgad ko tin bay riy. Ere bay gu rin’ ko pi girdi’ ney e n’en rin’ed ko fare garbaw. 20 Bay gu pi’rad nga pa’ e pi to’ogor rorad, ni pi’in yad be finey ni ngar thanged e fan rorad, ma ldow rorad e bayi longuy e arche’ nge gamanman ni malboch. 21 Ku bay gu pi’ Zedekiah ni Pilung nu Judah nge pi tolang ko salthaw rok nga pa’ e pi’in yad be finey ni ngar thanged e fan rorad. Bay gu pi’rad nga pa’ fa raba’ i salthaw nu Babylon, ni fa’an kar talegned e cham ngom. 22 Bay gu pi’ e thin, ma bay ra sulod ko re binaw ney. Bay rachamgad ngay ngar koled miyad urfiy nga but’. Bay gu tay e yochi binaw nu Judah ni bod bang i ted ni dariy be’ nma par riy. I Gag SOMOL e kugog e pi thin ney.”

<- JEREMIAH 33JEREMIAH 35 ->